സസ്കാറ്റൂൺ: സ്കാറ്റൂണിൽ നിന്ന് വ്യാജരേഖകൾ ചമച്ച് തട്ടിയെടുത്ത ആഡംബര കാർ ഒടുവിൽ കണ്ടെത്തിയത് പതിനായിരക്കണക്കിന് കിലോമീറ്ററുകൾക്കപ്പുറമുള്ള പശ്ചിമാഫ്രിക്കൻ രാജ്യമായ ഘാനയിൽ! അന്താരാഷ്ട്ര തലത്തിൽ കണ്ണികളുള്ള വൻ വ്യാജ തിരിച്ചറിയൽ രേഖ തട്ടിപ്പാണ് സസ്കാറ്റൂൺ പോലീസിന്റെ അന്വേഷണത്തിൽ വെളിച്ചത്തുവന്നത്. സംഭവവുമായി ബന്ധപ്പെട്ട് 21 കാരനായ ആൽബർട്ട സ്വദേശിയെ പോലീസ് അറസ്റ്റ് ചെയ്തു.
കഴിഞ്ഞ വർഷം ജനുവരി 14-നാണ് കേസിനാസ്പദമായ സംഭവം നടക്കുന്നത്. സസ്കാറ്റൂണിലെ ഫെയ്ത്ത്ഫുൾ അവന്യൂവിലുള്ള ഒരു പ്രമുഖ ബിസിനസ്സ് സ്ഥാപനത്തിൽ എത്തിയ ആൽബർട്ട സ്വദേശിയായ യുവാവ് ഒരു ലക്ഷ്വറി ‘ലാൻഡ് റോവർ’ കാർ വിലയ്ക്ക് വാങ്ങി. എന്നാൽ പിന്നീട് നടത്തിയ പരിശോധനയിലാണ് മറ്റൊരാളുടെ വ്യാജ ഐഡന്റിറ്റി ഉപയോഗിച്ചാണ് ഇയാൾ കാർ സ്വന്തമാക്കിയതെന്ന് സ്ഥാപനത്തിന് മനസ്സിലായത്.
തുടർന്ന് സസ്കാറ്റൂൺ പോലീസ് നടത്തിയ വിശദമായ അന്വേഷണത്തിൽ കാർ ബ്രിട്ടീഷ് കൊളംബിയയിലേക്ക് കടത്തിയതായി കണ്ടെത്തി. എഡ്മന്റൺ പോലീസിന്റെയും കാനഡ ബോർഡർ സർവീസസ് ഏജൻസിയുടെയും (CBSA) സഹായത്തോടെ നടത്തിയ തിരച്ചിലിലാണ് ഞെട്ടിക്കുന്ന ആ വിവരം പുറത്തുവന്നത്—കാർ അപ്പോഴേക്കും കപ്പൽ മാർഗ്ഗം വെസ്റ്റ് ആഫ്രിക്കൻ രാജ്യമായ ഘാനയിലേക്ക് കടത്തിക്കഴിഞ്ഞിരുന്നു! പിന്നീട് ഘാന അധികൃതരുമായി ബന്ധപ്പെട്ട് കാർ അവിടെയുണ്ടെന്ന് പോലീസ് സ്ഥിരീകരിച്ചു.
ഈ കേസിന്റെ അന്വേഷണം പുരോഗമിക്കുന്നതിനിടയിലാണ് ഫെബ്രുവരി 3-ന് സസ്കാറ്റൂണിലെ ഇതേ റോഡിലുള്ള മറ്റൊരു സ്ഥാപനത്തിൽ നിന്ന് ഒരു ‘ബിഎംഡബ്ല്യു എക്സ്5’ (BMW X5) കാർ കൂടി സമാനമായ രീതിയിൽ തട്ടിയെടുക്കാൻ ശ്രമം നടന്നത്. ക്യൂബെക്കിൽ നിന്ന് നഷ്ടപ്പെട്ട ഒരു ഡ്രൈവിംഗ് ലൈസൻസിൽ കൃത്രിമം കാണിച്ച് തട്ടിപ്പിന് ശ്രമിച്ച പ്രതിയെ ഒടുവിൽ എഡ്മന്റണിൽ വെച്ച് പോലീസ് പിടികൂടുകയായിരുന്നു. രാജ്യാന്തര തലത്തിൽ വൻ ശൃംഖലയുള്ള ആഡംബര കാർ കടത്ത് സംഘത്തിലെ പ്രധാനിയാണ് പിടിയിലായതെന്നാണ് പോലീസിന്റെ നിഗമനം. പ്രതിയെ കോടതിയിൽ ഹാജരാക്കി തുടർനടപടികൾ സ്വീകരിച്ചു വരികയാണ്.
Vehicle stolen in Saskatoon found in West Africa
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
