ഓട്ടവ : ചൈനയുമായി വ്യാപാര കരാറുകളിൽ ഏർപ്പെടുന്ന അമേരിക്കയുടെ ഇരട്ടത്താപ്പ് നയങ്ങൾക്കെതിരെ വിദഗ്ധരുടെ വിമർശനം. ചൈനീസ് പ്രസിഡന്റ് ഷി ജിൻപിങ്ങുമായി വ്യാപാര ബന്ധങ്ങൾ ശക്തമാക്കാനും കരാറുകൾ ദീർഘിപ്പിക്കാനും യു.എസ് പ്രസിഡന്റ് ഡൊണാൾഡ് ട്രംപ് തയ്യാറാകുമ്പോൾ, സമാനമായ രീതിയിൽ കാനഡ ചൈനയുമായി വ്യാപാര ബന്ധം സ്ഥാപിക്കുന്നതിനെ വാഷിംഗ്ടൺ വിമർശിക്കുന്നത് ഇരട്ടത്താപ്പാണെന്നാണ് ചൂണ്ടിക്കാണിക്കപ്പെടുന്നത്.
പ്രധാനമന്ത്രി മാർക്ക് കാർണി ചൈനയുമായി ചെറിയൊരു വ്യാപാര കരാറുണ്ടാക്കിയതിനെ ട്രംപ് ഭരണകൂടം രൂക്ഷമായി വിമർശിച്ചിരുന്നു. കാനഡയിൽ 49,000 ഇലക്ട്രിക് വാഹനങ്ങൾ ഇറക്കുമതി ചെയ്യാൻ അനുവദിച്ചതും കാനോല അടക്കമുള്ള ഉൽപ്പന്നങ്ങളുടെ തീരുവ കുറച്ചതുമാണ് അമേരിക്കൻ ഉദ്യോഗസ്ഥരെ പ്രകോപിപ്പിച്ചത്. എന്നാൽ ചൈനീസ് കാർ നിർമ്മാതാക്കൾ അമേരിക്കയിൽ ഫാക്ടറികൾ തുറക്കുന്നതിൽ തനിക്ക് എതിർപ്പില്ലെന്നാണ് ട്രംപ് അടുത്തിടെ വ്യക്തമാക്കിയത്.
അമേരിക്കയുടെ ഈ നിലപാട് പ്രകടമായ ഇരട്ടത്താപ്പാണെന്ന് ആൽബർട്ട സർവ്വകലാശാലയിലെ ചൈന ഇൻസ്റ്റിറ്റ്യൂട്ട് സീനിയർ ഫെല്ലോ ജിയ വാങ് ചൂണ്ടിക്കാണിച്ചു. തങ്ങൾ ഒരു കാര്യങ്ങൾ ചെയ്യുകയും പങ്കാളികളായ മറ്റ് രാജ്യങ്ങളെ അതിൽ നിന്ന് വിലക്കുകയും ചെയ്യുന്ന സമീപനമാണിത്. 2025-ൽ ചൈനയിൽ നിന്ന് അമേരിക്ക 434 ഡോളർ ബില്യണിലധികം വിലമതിക്കുന്ന സാധനങ്ങൾ ഇറക്കുമതി ചെയ്തപ്പോൾ കാനഡ ഇറക്കുമതി ചെയ്തത് 90 ബില്യൺ ഡോളർ മാത്രമാണെന്നതും ശ്രദ്ധേയമാണ്.
ചൈനയുമായുള്ള വ്യാപാരത്തിന്റെ പേരിൽ കാനഡ അമേരിക്കയുടെ ശത്രുപക്ഷത്താകുമെന്ന് ഫ്ലോറിഡ സെനറ്റർ റിക്ക് സ്കോട്ട് ഉൾപ്പെടെയുള്ളവർ മുന്നറിയിപ്പ് നൽകിയിരുന്നു. എന്നാൽ ഫ്ലോറിഡ ഉൾപ്പെടെയുള്ള അമേരിക്കൻ സംസ്ഥാനങ്ങൾ ചൈനയിൽ നിന്നാണ് ഏറ്റവും കൂടുതൽ ഉൽപ്പന്നങ്ങൾ ഇറക്കുമതി ചെയ്യുന്നതെന്ന് വിദഗ്ധർ ചൂണ്ടിക്കാണിക്കുന്നു. രാഷ്ട്രീയ ലക്ഷ്യങ്ങളോടെയുള്ള ട്രംപിന്റെ ഇത്തരം നിലപാടുകളെ കാര്യമായെടുക്കേണ്ടതില്ലെന്നാണ് കാനഡയുടെ വിലയിരുത്തൽ.
ലോകത്തിലെ ഏറ്റവും വലിയ രണ്ടാമത്തെയും ഒന്നാമത്തെയും സാമ്പത്തിക ശക്തികളായ അമേരിക്കയുമായും ചൈനയുമായും ഒരുപോലെ ബന്ധം മുന്നോട്ട് കൊണ്ടുപോകേണ്ടത് കാനഡയെ സംബന്ധിച്ചിടത്തോളം നിർണായകമാണെന്ന് വിദഗ്ധർ അഭിപ്രായപ്പെടുന്നു. ഇരു ശക്തികൾക്കുമിടയിൽ നയതന്ത്രപരമായ നീക്കങ്ങളിലൂടെ മുന്നേറാൻ കാനഡയ്ക്ക് ശക്തമായ നേതൃത്വവും തന്ത്രപരമായ തീരുമാനങ്ങളും ആവശ്യമാണെന്നും വിലയിരുത്തപ്പെടുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
