വിന്നിപെഗ്: വിന്നിപെഗിലെ സെന്റ് ബോണിഫസ് ഹോസ്പിറ്റൽ പരിസരത്തുണ്ടായ ലൈംഗികാതിക്രമ ശ്രമത്തിന് പിന്നാലെ ആശുപത്രി ജീവനക്കാർ കടുത്ത സുരക്ഷാഭീതിയിൽ. സുരക്ഷാ പ്രശ്നങ്ങൾ ചൂണ്ടിക്കാട്ടി ആശുപത്രിയെ ‘ഗ്രേ ലിസ്റ്റ്’ ചെയ്യുന്നതിനെക്കുറിച്ച് ആലോചിക്കുകയാണെന്ന് മാനിറ്റോബ നഴ്സസ് യൂണിയൻ (MNU) പ്രസിഡന്റ് ഡാർലീൻ ജാക്സൺ അറിയിച്ചു. കഴിഞ്ഞ ദിവസമാണ് ആശുപത്രി പാർക്കിംഗ് സ്ഥലത്ത് വെച്ച് ഒരു വനിതാ ജീവനക്കാരിക്ക് നേരെ ആക്രമണ ശ്രമമുണ്ടായത്. രണ്ട് വാഹനങ്ങൾക്കിടയിൽ കുടുങ്ങിയ ജീവനക്കാരി നിലവിളിച്ചതിനെത്തുടർന്ന് അക്രമി ഓടി രക്ഷപ്പെട്ടു. സംഭവത്തിൽ പോലീസ് ഒരാളെ അറസ്റ്റ് ചെയ്തിട്ടുണ്ട്. തുടർച്ചയായ സുരക്ഷാ വീഴ്ചകളാണ് യൂണിയൻ ഈ കടുത്ത നടപടിയിലേക്ക് നീങ്ങാൻ കാരണം.
നഴ്സുമാരുടെ സുരക്ഷയെക്കുറിച്ച് ഏറെ നാളുകളായി യൂണിയൻ ആശങ്ക പ്രകടിപ്പിക്കുന്നുണ്ട്. ഈ വർഷം വേനൽക്കാലത്ത് ഹെൽത്ത് സയൻസസ് സെന്റർ (HSC) ഇതേ കാരണങ്ങളാൽ നഴ്സുമാർ ഗ്രേ ലിസ്റ്റ് ചെയ്യാൻ വോട്ട് ചെയ്തിരുന്നു. ഒരു ആശുപത്രിയെ ‘ഗ്രേ ലിസ്റ്റ്’ ചെയ്താൽ അവിടെ ജോലിയിൽ പ്രവേശിക്കുന്നതിൽ നിന്ന് നഴ്സുമാരെ യൂണിയൻ നിരുത്സാഹപ്പെടുത്തും. ഇത് ജീവനക്കാരുടെ എണ്ണത്തിൽ വലിയ കുറവുണ്ടാക്കാൻ സാധ്യതയുണ്ട്. വിന്നിപെഗിലെ ആശുപത്രികൾക്ക് പുറമെ, നോർത്തേൺ മാനിറ്റോബയിലെ തോംസൺ ജനറൽ ഹോസ്പിറ്റലിലും ജീവനക്കാരുടെ കുറവും അക്രമസംഭവങ്ങളും കാരണം ഗ്രേ ലിസ്റ്റിംഗിനായുള്ള വോട്ടെടുപ്പ് നടക്കുകയാണ്.
തൊഴിലിടങ്ങളിലെ സുരക്ഷ ഉറപ്പാക്കുന്നതിൽ ഭരണകൂടം പരാജയപ്പെടുന്നതിലുള്ള ശക്തമായ പ്രതിഷേധമാണ് യൂണിയൻ നടപടി. ആശുപത്രികൾക്ക് പുറത്ത് മാത്രമല്ല, അകത്തും ജീവനക്കാർ സുരക്ഷിതരല്ലെന്ന തോന്നലാണ് ശക്തമായിരിക്കുന്നത്. ഈ സാഹചര്യത്തിൽ ജീവനക്കാരുടെ ആശങ്കകൾ സർക്കാർ അടിയന്തരമായി പരിഗണിക്കണം. അല്ലാത്തപക്ഷം കൂടുതൽ ആശുപത്രികളെ ഗ്രേ ലിസ്റ്റ് ചെയ്യേണ്ട സാഹചര്യം ഉണ്ടായേക്കാം. ആരോഗ്യമേഖലയിലെ ജീവനക്കാരുടെ സുരക്ഷ ഉറപ്പാക്കാൻ ശക്തമായ നടപടികൾ സ്വീകരിക്കണമെന്നും യൂണിയൻ ആവശ്യപ്പെട്ടു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
No safety: Manitoba nurses in fear; union demands hospital be greylisted
