സെബു, ഫിലിപ്പീൻസ് :ഫിലിപ്പീൻസിൽ ടൈഫൂൺ കൽമേഗി ദുരന്തത്തിൽ മരിച്ചവരുടെ എണ്ണം 114 ആയി ഉയർന്നതായി രാജ്യത്തെ ദുരന്ത നിവാരണ ഏജൻസി അറിയിച്ചു. 127 പേരെ ഇനിയും കണ്ടെത്താനുണ്ടെന്നാണ് വിവരം. ഈ ആഴ്ച ആദ്യം രാജ്യത്തിന്റെ മധ്യമേഖലയിൽ നാശം വിതച്ച ശക്തമായ കൊടുങ്കാറ്റ് ഇപ്പോൾ തെക്കൻ ചൈനാ കടലിലൂടെ വിയറ്റ്നാമിലേക്ക് നീങ്ങുമ്പോൾ കൂടുതൽ ശക്തി പ്രാപിക്കുകയാണ്. ഇതിനെ തുടർന്ന് വിയറ്റ്നാമിൽ വൻതോതിലുള്ള ഒഴിപ്പിക്കലും അടിയന്തര മുന്നറിയിപ്പുകളും പ്രഖ്യാപിച്ചു.
ഏറ്റവും കൂടുതൽ നാശനഷ്ടമുണ്ടായ ഫിലിപ്പീൻസിലെ സെബു പ്രവിശ്യയിൽ വെള്ളം ഇറങ്ങിത്തുടങ്ങിയതോടെയാണ് നാശനഷ്ടത്തിന്റെ യഥാർത്ഥ ചിത്രം വ്യക്തമായത്. വീടുകൾ തകർന്നും വാഹനങ്ങൾ തലകീഴായി മറിഞ്ഞും തെരുവുകൾ അവശിഷ്ടങ്ങൾ നിറഞ്ഞും കിടക്കുകയാണ്. ടൈഫൂൺ ചൊവ്വാഴ്ച കരയിലെത്തുന്നതിനു മുൻപ് 2 ലക്ഷത്തിലധികം ആളുകളെയാണ് സുരക്ഷിത സ്ഥാനങ്ങളിലേക്ക് മാറ്റിയത്. എന്നാൽ, അവരിൽ പലരും വീടുകൾ തകർന്ന നിലയിൽ കാണാനായി തിരിച്ചെത്തി. “ഇപ്പോൾ ഏറ്റവും വലിയ വെല്ലുവിളി അവശിഷ്ടങ്ങൾ നീക്കം ചെയ്യുക എന്നതാണ്,” സീനിയർ സിവിൽ ഡിഫൻസ് ഉദ്യോഗസ്ഥനായ റാഫി അലജാൻഡ്രോ പറഞ്ഞു. കാണാതായവരെ കണ്ടെത്താനും ദുരിതാശ്വാസ പ്രവർത്തനങ്ങൾ വേഗത്തിലാക്കാനും അടിയന്തര ശ്രദ്ധ ആവശ്യമാണെന്നും അദ്ദേഹം കൂട്ടിച്ചേർത്തു.
അതേസമയം, വിയറ്റ്നാമിൽ കൽമേഗി കൊടുങ്കാറ്റിനെ നേരിടാൻ അധികൃതർ തയ്യാറെടുപ്പുകൾ ഊർജിതമാക്കി. കനത്ത മഴയ്ക്കും അതിശക്തമായ കാറ്റിനും സാധ്യതയുള്ളതിനാൽ ഗിയ ലായ് പ്രവിശ്യയിൽ ഏകദേശം 3.5 ലക്ഷം താമസക്കാരെ ഒഴിപ്പിക്കാൻ ഉത്തരവിട്ടു. വ്യാപകമായ വെള്ളപ്പൊക്കം, കൃഷിഭൂമികൾക്കുണ്ടാകാൻ സാധ്യതയുള്ള നാശനഷ്ടങ്ങൾ, ഗതാഗത-അടിസ്ഥാന സൗകര്യങ്ങളിലെ വലിയ തടസ്സങ്ങൾ എന്നിവ അധികൃതർ മുന്നറിയിപ്പ് നൽകി. കൊടുങ്കാറ്റ് അടുക്കുന്ന സാഹചര്യത്തിൽ ഡാ നാങ് അന്താരാഷ്ട്ര വിമാനത്താവളം ഉൾപ്പെടെ എട്ട് വിമാനത്താവളങ്ങളിലെ സർവീസുകളെ ബാധിക്കാൻ സാധ്യതയുണ്ടെന്ന് വിയറ്റ്നാമിലെ വ്യോമയാന അധികൃതർ സ്ഥിരീകരിച്ചു.
ഫിലിപ്പീൻസ് നിരീക്ഷണ മേഖലയിൽ നിന്ന് പുറത്തുകടക്കുന്ന കൽമേഗിക്ക് പിന്നാലെ, മിൻഡാനോറിന് കിഴക്കായി മറ്റൊരു ന്യൂനമർദ്ദം രൂപം കൊള്ളുന്നതായി കാലാവസ്ഥാ നിരീക്ഷകർ കണ്ടെത്തിയിട്ടുണ്ട്. അടുത്ത ആഴ്ച ഇത് ഒരു ടൈഫൂണായി മാറാൻ സാധ്യതയുണ്ട്. ഈ വർഷം ഫിലിപ്പീൻസിനെ ബാധിക്കുന്ന ഇരുപതാമത്തെ കൊടുങ്കാറ്റാണിത്. ഒരു മാസം മുമ്പ് വടക്കൻ സെബുവിൽ ഉണ്ടായ 6.9 തീവ്രത രേഖപ്പെടുത്തിയ ഭൂകമ്പത്തിനു തൊട്ടുപിന്നാലെയാണ് ഈ ദുരന്തം. കൂടുതൽ നാശനഷ്ടങ്ങൾ മുൻകൂട്ടി കണ്ട് ഇരു രാജ്യങ്ങളും സൈനികരെയും ദുരന്ത നിവാരണ സേനാംഗങ്ങളെയും സജ്ജമാക്കിക്കൊണ്ടിരിക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Typhoon Kalmaegi: Death toll in Philippines rises to 114
