വൈൻ വിപണിയിൽ ട്വിസ്റ്റ്!; ക്യൂബെക്ക് താരമാകുമ്പോൾ അമേരിക്കൻ മദ്യത്തിന് തിരിച്ചടി!

അമേരിക്കൻ മദ്യ ഉൽപന്നങ്ങൾ വിപണിയിൽ നിന്ന് പിൻവലിച്ചതോടെ, ക്യൂബെക്കിലെ പ്രാദേശിക വൈനുകൾക്ക് ആവശ്യക്കാരേറി. കഴിഞ്ഞ മാർച്ചിലാണ് SAQ (Société des alcools du Québec) തങ്ങളുടെ ഷെൽഫുകളിൽ നിന്ന് അമേരിക്കൻ മദ്യം ഒഴിവാക്കിയത്. അതോടെ, ഇവിടുത്തെ വൈൻ നിർമ്മാതാക്കൾക്ക് തിരക്കോടു തിരക്ക്! ഈ പുതിയ ഡിമാൻഡ് നിറവേറ്റാൻ അവർ രാവും പകലും കഷ്ടപ്പെടുകയാണ്.

ക്യൂബെക്കിലെ മുന്തിരിത്തോട്ടങ്ങളിൽ നിന്നുള്ള വൈനുകൾക്ക് ചില അദ്ഭുതങ്ങളുണ്ട്. അറ്റ്‌വാട്ടർ മാർക്കറ്റിലെ ലെസ് ഡൗസേഴ്‌സ് ഡു മാർച്ചിന്റെ മൈക്ക് ലാക്രോയിക്സ് പറയുന്നത് കേട്ടോ, “ഇവിടുത്തെ കാലാവസ്ഥയ്ക്ക് ചേരുന്ന സങ്കരയിനം മുന്തിരികൾ കൊണ്ടാണ് ഈ വൈനുകളുണ്ടാക്കുന്നത്.

അതുകൊണ്ട് ഇങ്ങനെയുള്ള മുന്തിരികൾ ലോകത്ത് മറ്റൊരിടത്തും കാണാൻ കഴിയില്ല!” SAQ അമേരിക്കൻ ഉൽപ്പന്നങ്ങൾ മാറ്റിയപ്പോൾ, പ്രാദേശിക വൈനുകളുടെ എണ്ണം കൂട്ടി. അതോടെ കാര്യങ്ങൾ മാറിമറിഞ്ഞെന്ന് ക്യൂബെക്ക് വൈൻ കൗൺസിൽ പ്രസിഡന്റ് മാത്യു ബോഷെമിൻ പറയുന്നു. കഴിഞ്ഞ കുറച്ച് മാസങ്ങളായി ക്യൂബെക്കിലെ വൈൻ വിൽപ്പനയിൽ ഞെട്ടിക്കുന്ന 60 ശതമാനം വർധനവാണുണ്ടായത്! സാധാരണ വൈൻ വിൽപ്പന കുറയുന്ന സമയത്താണ് ഈ അപ്രതീക്ഷിത കുതിപ്പ്.

പക്ഷേ, ഈ ‘ചാകര’ അധികകാലം ഉണ്ടാകില്ലെന്ന് മക്ഗിൽ യൂണിവേഴ്സിറ്റിയിലെ സാമ്പത്തിക വിദഗ്ദ്ധൻ പാസ്കൽ തെറിയോൾട്ട് മുന്നറിയിപ്പ് നൽകുന്നു. “ബഹിഷ്കരണങ്ങൾ സാധാരണയായി അധികം നിലനിൽക്കാറില്ല. പക്ഷേ, ഇത് പുതിയ ഉൽപ്പന്നങ്ങൾ കണ്ടെത്താൻ ഒരു അവസരമായി മാറി,” തെറിയോൾട്ട് പറയുന്നു. ഉപഭോക്താക്കൾക്ക് പുതിയതൊന്ന് പരീക്ഷിക്കാൻ താൽപ്പര്യമുണ്ടായിരുന്നു, ക്യൂബെക്ക് വൈനുകൾ അവരെ ശരിക്കും ആകർഷിച്ചു എന്നും അദ്ദേഹം കൂട്ടിച്ചേർത്തു.

നിലവിൽ പ്രതിവർഷം 3.5 ദശലക്ഷം കുപ്പികൾ വൈനാണ് ക്യൂബെക്ക് മുന്തിരിത്തോട്ടങ്ങളിൽ നിന്ന് പുറത്തിറങ്ങുന്നത്. “ഞങ്ങൾ അതിവേഗം വളരുകയാണ്, പക്ഷേ ക്യൂബെക്കിലെ മൊത്തം വൈൻ ഉപഭോഗവുമായി താരതമ്യം ചെയ്യുമ്പോൾ ഇതൊരു ചെറിയ വ്യവസായം മാത്രമാണ്, കടലിലെ ഒരു തുള്ളി പോലെ,” ബോഷെമിൻ പറയുന്നു.

ക്യൂബെക്കിലെ വൈൻ വിൽപ്പനയുടെ 30 ശതമാനം SAQ വഴിയും, ബാക്കി 70 ശതമാനം റെസ്റ്റോറന്റുകളും ലെസ് ഡൗസേഴ്‌സ് ഡു മാർച്ചി പോലുള്ള ചെറിയ കടകൾ വഴിയുമാണ് നടക്കുന്നത്. ബഹിഷ്കരണത്തിന് മുമ്പും തൻ്റെ ഉപഭോക്താക്കൾ പ്രാദേശിക ഉൽപ്പന്നങ്ങളാണ് വാങ്ങിയിരുന്നതെന്ന് ലാക്രോയിക്സ് പറയുന്നു.

അമേരിക്കൻ വൈനുകൾ വീണ്ടും വിപണിയിൽ വന്നാലും പ്രാദേശിക വൈൻ നിർമ്മാതാക്കൾക്ക് എല്ലായ്പ്പോഴും ഒരു സ്ഥാനം ഉറപ്പാക്കണം എന്ന കാര്യത്തിൽ എല്ലാവരും ഒറ്റക്കെട്ടാണ്. ക്യൂബെക്കിലെ ഈ വൈൻ വിപ്ലവം എത്രത്തോളം മുന്നോട്ട് പോകുമെന്ന് കണ്ടറിയാം!

Twist in the wine market!; American alcohol suffers setback as Quebec becomes a star!