വാഷിംഗ്ടൺ: അമേരിക്കയിലെ ജനസംഖ്യാ കണക്കെടുപ്പ് (സെൻസസ്) രീതിയിൽ വലിയ മാറ്റങ്ങൾ വരുത്താൻ ട്രംപ് ഭരണകൂടം നീക്കം ആരംഭിച്ചു. ഔദ്യോഗിക രേഖകളില്ലാത്ത കുടിയേറ്റക്കാരെയും അഭയാർഥികളെയും വരാനിരിക്കുന്ന സെൻസസിൽ നിന്ന് ഒഴിവാക്കാനാണ് തീരുമാനം. യു.എസ് സെൻസസ് ബ്യൂറോ ഫെഡറൽ രജിസ്റ്ററിലൂടെ പുറത്തുവിട്ട പുതിയ നിർദേശങ്ങൾ പ്രകാരം, രാജ്യത്തെ സർക്കാർ നൽകുന്ന ആനുകൂല്യങ്ങളെയും ജനങ്ങളുടെ രാഷ്ട്രീയ അവകാശങ്ങളെയും സാരമായി ബാധിക്കുമെന്ന ആശങ്ക ശക്തമാക്കിയിട്ടുണ്ട്.
കുടിയേറ്റക്കാരുടെ നിയമപരമായ പദവിയും വംശീയ വിവരങ്ങളും അടിസ്ഥാനമാക്കിയാണ് വലിയൊരു വിഭാഗം ആളുകളെ ഇത്തവണത്തെ ജനസംഖ്യാ കണക്കെടുപ്പിൽ നിന്ന് പുറത്താക്കാൻ സർക്കാർ തീരുമാനിച്ചിരിക്കുന്നത്. അമേരിക്കയിലെ പാർലമെൻ്റിലേക്ക് ഓരോ സംസ്ഥാനത്തുനിന്നും എത്ര ജനപ്രതിനിധികൾ വേണമെന്നും, പ്രസിഡൻ്റ് തിരഞ്ഞെടുപ്പിൽ ഓരോ പ്രദേശത്തിനും എത്ര വോട്ടുകൾ ലഭിക്കണമെന്നും തീരുമാനിക്കുന്നത് ഈ സെൻസസ് കണക്കുകൾ നോക്കിയാണ്. അതുകൊണ്ടുതന്നെ, ഒരു പ്രദേശത്തെ ലക്ഷക്കണക്കിന് വരുന്ന കുടിയേറ്റക്കാരെ കണക്കിൽ നിന്ന് ഒഴിവാക്കുമ്പോൾ അവിടുത്തെ ആകെ ജനസംഖ്യ കുറഞ്ഞു കാണിക്കുകയും, അത് ആ പ്രദേശത്തിന് കിട്ടേണ്ട രാഷ്ട്രീയ അധികാരത്തെയും വോട്ടു അവകാശങ്ങളെയും നേരിട്ട് ബാധിക്കുകയും ചെയ്യും. കൂടാതെ, ജനങ്ങളുടെ വംശ പശ്ചാത്തലത്തെക്കുറിച്ചും LGBTQ+ സമൂഹത്തെക്കുറിച്ചുമുള്ള പരമ്പരാഗത ചോദ്യങ്ങൾ ഒഴിവാക്കുന്നത് മൂലം ന്യൂനപക്ഷങ്ങളുടെ കൃത്യമായ വിവരങ്ങൾ ലഭിക്കാതെ പോകുമെന്നും ഇത് വിവേചനങ്ങൾ പഠിക്കുന്നതിനെ തടസ്സപ്പെടുത്തുമെന്നും വിദഗ്ധർ ചൂണ്ടിക്കാണിക്കുന്നു.
Also Read: സർക്കാർ ജോലി വേണോ? മുൻപരിചയമില്ലാത്തവർക്കും അവസരമൊരുക്കി കാനഡ റവന്യൂ ഏജൻസി
ജനസംഖ്യ കുറച്ചു കാണിക്കുന്നത് പൊതുജനാരോഗ്യം, പ്രകൃതിദുരന്ത നിവാരണം, വികസന പദ്ധതികൾ എന്നിവയ്ക്കുള്ള കേന്ദ്ര ഫണ്ട് ലഭ്യതയെ പ്രതികൂലമായി ബാധിക്കും. കൃത്യമായ കണക്കുകൾ ലഭിക്കാതെ വരുന്നത് സർക്കാരിന്റെ സേവനങ്ങൾ ജനങ്ങളിലേക്ക് എത്തുന്നതിൽ തടസ്സം സൃഷ്ടിക്കുമെന്ന് വിദഗ്ധർ വ്യക്തമാക്കുന്നു. 1790 മുതൽ തുടർന്നുപോരുന്ന പരമ്പരാഗത രീതികൾ മാറ്റുന്നത് ഡാറ്റയുടെ ഗുണനിലവാരത്തെ ബാധിക്കുമെന്ന മുന്നറിയിപ്പും ഉയർന്നിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
