ട്രംപ് സഞ്ചരിച്ച ഹെലികോപ്റ്ററിന് മുന്നിൽ യാത്രാവിമാനം! അമേരിക്കയിൽ വൻ സുരക്ഷാ വീഴ്ച

വാഷിങ്ടണ്‍: യുഎസ് പ്രസിഡന്റ് ഡോണാൾഡ് ട്രംപ് സഞ്ചരിച്ച സൈനിക ഹെലികോപ്റ്ററിന് (മറൈൻ വൺ) തൊട്ടടുത്ത് കൂടി യാത്രാവിമാനം പറന്നുയർന്ന സംഭവത്തിൽ സുരക്ഷാ ഏജൻസികൾ അന്വേഷണം ആരംഭിച്ചു. വൈറ്റ് ഹൗസിൽ നിന്ന് ആൻഡ്രൂസ് എയർ ഫോഴ്സ് ബേസിലേക്ക് പ്രസിഡന്റുമായി പുറപ്പെട്ട ഹെലികോപ്റ്ററിന് സമീപത്തുകൂടിയാണ് അമേരിക്കൻ എയർലൈൻസിന്റെ ആഭ്യന്തര യാത്രാവിമാനം കടന്നുപോയത്. ചൊവ്വാഴ്ച പ്രാദേശിക സമയം ഉച്ചയ്ക്ക് 2:30-ഓടെയാണ് വിമാനങ്ങൾ തമ്മിലുള്ള നിർബന്ധിത സുരക്ഷിത അകലം ലംഘിക്കപ്പെട്ട ‘ലോസ് ഓഫ് സെപ്പറേഷൻ’ (Loss of Separation) സംഭവിച്ചത്. റോണാൾഡ് റീഗൻ വാഷിങ്ടൺ നാഷണൽ എയർപോർട്ടിൽ നിന്നും പറന്നുയർന്ന യാത്രാവിമാനവും പ്രസിഡന്റിന്റെ ഹെലികോപ്റ്ററും തമ്മിലുള്ള ആശയവിനിമയം എയർ ട്രാഫിക് കൺട്രോളർമാരുമായി തടസ്സപ്പെട്ടതാണ് സംഭവത്തിന് വഴിവെച്ചതെന്നാണ് ന്യൂയോർക്ക് ടൈംസ് റിപ്പോർട്ട് ചെയ്യുന്നത്. നാഷണൽ ട്രാൻസ്പോർട്ടേഷൻ സേഫ്റ്റി ബോർഡും (NTSB) ഫെഡറൽ ഏവിയേഷൻ അഡ്മിനിസ്ട്രേഷനും (FAA) ഇതിൽ വിശദമായ അന്വേഷണം പ്രഖ്യാപിച്ചിട്ടുണ്ട്.

സംഭവം വൻ സുരക്ഷാ വീഴ്ചയാണെന്ന വിലയിരുത്തലുകൾ ഉയർന്നുവന്നെങ്കിലും, പ്രസിഡന്റ് പൂർണ്ണ സുരക്ഷിതനാണെന്ന് വൈറ്റ് ഹൗസ് വക്താവ് കുഷ് ദേശായ് വ്യക്തമാക്കി. പ്രസിഡന്റിന് ഒരു ഘട്ടത്തിലും അപകടസാധ്യത ഉണ്ടായിരുന്നില്ലെന്നും ലോകത്തിലെ തന്നെ ഏറ്റവും മികച്ച പൈലറ്റുമാരാണ് മറൈൻ വൺ വിമാനങ്ങൾ പറത്തുന്നതെന്നും വൈറ്റ് ഹൗസ് കൂട്ടിച്ചേർത്തു. സുരക്ഷിത അകലം നഷ്ടപ്പെട്ട നിമിഷങ്ങളിൽ എയർ ട്രാഫിക് കൺട്രോളർമാർ യാത്രാവിമാനത്തിലെ പൈലറ്റുമായും മറൈൻ വണ്ണിലെ പൈലറ്റുമായും നിരന്തരം ബന്ധപ്പെടുന്നുണ്ടായിരുന്നുവെന്ന് ഫെഡറൽ ഏവിയേഷൻ അഡ്മിനിസ്ട്രേഷൻ അറിയിച്ചു. സാഹചര്യം വിശദമായി അവലോകനം ചെയ്തുവരികയാണെന്നും അന്വേഷണ കണ്ടെത്തലുകളുടെ അടിസ്ഥാനത്തിൽ ആവശ്യമായ തിരുത്തൽ നടപടികൾ ഉടനടി നടപ്പിലാക്കുമെന്നും അധികൃതർ അറിയിച്ചിട്ടുണ്ട്.

കഴിഞ്ഞ വർഷം വാഷിങ്ടൺ നാഷണൽ എയർപോർട്ടിന് സമീപം സൈനിക ഹെലികോപ്റ്ററും യാത്രാവിമാനവും കൂട്ടിയിടിച്ച് 67 പേർ കൊല്ലപ്പെട്ട ദാരുണ സംഭവത്തിന് പിന്നാലെ പ്രദേശത്ത് വിമാന ഗതാഗത സുരക്ഷാ ക്രമീകരണങ്ങൾ ശക്തമാക്കിയിരുന്നു. എന്നാൽ ഈ ശക്തമായ സുരക്ഷാ മാനദണ്ഡ നിലനിൽക്കെയാണ് അമേരിക്കൻ പ്രസിഡന്റിന്റെ യാത്രാവേളയിൽ പോലും വീണ്ടും സമാനമായ രീതിയിൽ ‘ലോസ് ഓഫ് സെപ്പറേഷൻ’ റിപ്പോർട്ട് ചെയ്യപ്പെട്ടിരിക്കുന്നത്. എയർ ട്രാഫിക് കൺട്രോൾ സംവിധാനത്തിലെ ആശയവിനിമയ തടസ്സങ്ങളും വിമാനത്താവളങ്ങളിലെ റൺവേ തിരക്കുകളുമാണ് ഇത്തരം സംഭവങ്ങളിലേക്ക് നയിക്കുന്നതെന്ന വിമർശനം വ്യോമയാന വിദഗ്ധർക്കിടയിൽ വീണ്ടും ശക്തമാകാൻ ഇത് കാരണമായിട്ടുണ്ട്.

Plane Crosses Trump’s Helicopter Path, Security Scare in US

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt