ഇന്ത്യൻ ഐടി പ്രൊഫഷണലുകൾക്ക് വലിയ തിരിച്ചടിയായി H1B വിസ അപേക്ഷാ ഫീസ് വർദ്ധിപ്പിച്ച് യു.എസ്. പ്രസിഡന്റ് ഡൊണാൾഡ് ട്രംപ് ഉത്തരവിറക്കി. നിലവിൽ 1,700 മുതൽ 4,500 ഡോളർ വരെ ഉണ്ടായിരുന്ന ഫീസ് ഒരു ലക്ഷം ഡോളറായാണ് ഉയർത്തിയത്. സാങ്കേതിക രംഗത്ത് അമേരിക്കൻ പൗരന്മാർക്ക് കൂടുതൽ തൊഴിലവസരങ്ങൾ സൃഷ്ടിക്കുക എന്നതാണ് ഈ നീക്കത്തിലൂടെ ലക്ഷ്യമിടുന്നതെന്ന് ട്രംപ് വ്യക്തമാക്കി. ഈ തീരുമാനം ഇന്ത്യൻ ഐടി മേഖലയ്ക്കും ചെറുകിട കമ്പനികൾക്കും താങ്ങാനാവാത്ത ഒന്നാണ്. വൈദഗ്ധ്യം ആവശ്യമുള്ള മേഖലകളിൽ വിദേശ തൊഴിലാളികളെ നിയമിക്കാൻ കമ്പനികൾക്ക് അനുമതി നൽകുന്ന നോൺ-ഇമിഗ്രന്റ് വിസയാണ് H1B. വിവരസാങ്കേതികവിദ്യ, എഞ്ചിനീയറിംഗ്, ശാസ്ത്രം, ഫിനാൻസ്, വൈദ്യശാസ്ത്രം തുടങ്ങിയ മേഖലകളിൽ ഈ വിസ വ്യാപകമായി ഉപയോഗിച്ചുവരുന്നു.
അമേരിക്കയിലെ തൊഴിലുടമകൾക്കാണ് H1B വിസയ്ക്കായി അപേക്ഷിക്കാൻ കഴിയുക. യു.എസ്. സിറ്റിസൺഷിപ്പ് ആൻഡ് ഇമിഗ്രേഷൻ സർവീസസിലാണ് അപേക്ഷ നൽകേണ്ടത്. മൂന്ന് വർഷത്തെ കാലാവധിയുള്ള ഈ വിസ പിന്നീട് നീട്ടാനും സാധിക്കും. ലോകത്ത് ഏറ്റവും കൂടുതൽ H1B വിസകൾ ലഭിക്കുന്നത് ഇന്ത്യക്കാർക്കാണ്. അതുകൊണ്ടുതന്നെ ഫീസ് വർദ്ധനവിന്റെ ആഘാതം ഏറ്റവും കൂടുതൽ അനുഭവിക്കാൻ പോകുന്നത് ഇന്ത്യക്കാരായിരിക്കും. 2020 മുതൽ 2023 വരെയുള്ള കാലയളവിൽ അനുവദിച്ച H1B വിസകളിൽ 73 ശതമാനവും ഇന്ത്യക്കാർക്കായിരുന്നു. ഇന്ത്യൻ പ്രൊഫഷണലുകളുടെ അമേരിക്കൻ സ്വപ്നങ്ങൾക്ക് ഇത് വലിയ വെല്ലുവിളിയാകും.
അതേസമയം, സിന്തറ്റിക് ഓപിയോയിഡ് വിഭാഗത്തിൽപ്പെട്ട മയക്കുമരുന്ന് കടത്തുമായി ബന്ധമുണ്ടെന്ന് സംശയിച്ച് ചില ഇന്ത്യൻ വ്യവസായികളുടെയും കോർപ്പറേറ്റ് മേധാവികളുടെയും കുടുംബാംഗങ്ങളുടെയും വിസ അടുത്തിടെ അമേരിക്ക റദ്ദാക്കിയിരുന്നു. അപകടകരമായ മയക്കുമരുന്നുകളിൽ നിന്ന് അമേരിക്കൻ ജനതയെ സുരക്ഷിതരാക്കുക എന്ന ലക്ഷ്യത്തോടെയാണ് ഈ നടപടിയെന്ന് അമേരിക്കൻ എംബസി അറിയിച്ചു. അനധികൃതമായി മയക്കുമരുന്ന് ഉൽപ്പാദിപ്പിക്കുകയും കടത്തുകയും ചെയ്യുന്ന വ്യക്തികൾക്കും സ്ഥാപനങ്ങൾക്കും, അവരുടെ കുടുംബങ്ങൾക്കും യു.എസിലേക്ക് ഭാവിയിൽ പ്രവേശനം നിഷേധിക്കുമെന്നും എംബസി വ്യക്തമാക്കി. ഇത് ട്രംപ് ഭരണകൂടം മയക്കുമരുന്ന് കടത്തിനെതിരെ സ്വീകരിക്കുന്ന കർശന നിലപാടിന്റെ ഭാഗമാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Trump closes the door to Indians; H1B visa applications sharply increase
