ക്യൂബെക്: ക്യൂബെക്കിൽ സ്കീയിങ്ങിനിടെയുണ്ടായ അപകടത്തിൽ ഗുരുതരമായി പരിക്കേറ്റ് ചികിത്സയിലായിരുന്ന നാല് വയസ്സുകാരി മരിച്ചു. കഴിഞ്ഞ മാസം ഗാറ്റിനോയ്ക്ക് വടക്കുള്ള പ്രശസ്തമായ നക്കെർട്ടോക്ക് നോർഡിക് സ്കീ സെന്ററിൽ വെച്ചായിരുന്നു അപകടം സംഭവിച്ചത്. ഫെബ്രുവരി 22-ന് നടന്ന ഈ ദാരുണമായ സംഭവത്തിൽ, മലയിറങ്ങുന്നതിനിടെ മുതിർന്ന സ്കീയിങ് താരം അബദ്ധത്തിൽ കുട്ടിയുടെ മേൽ വീഴുകയായിരുന്നുവെന്ന് പ്രാദേശിക അധികൃതർ സ്ഥിരീകരിച്ചു.
അപകടസമയത്ത് ഒരു മുതിർന്ന വ്യക്തി വലിച്ചിരുന്ന സ്ലൈഡിൽ യാത്ര ചെയ്യുകയായിരുന്നു കുട്ടി. അപകടം നടന്ന ഉടനെ രക്ഷാപ്രവർത്തകർ സ്ഥലത്തെത്തി പ്രഥമശുശ്രൂഷ നൽകിയ ശേഷം ഒന്റാറിയോയിലെ ചിൽഡ്രൻസ് ഹോസ്പിറ്റലിലേക്ക് (CHEO) മാറ്റി. ഒരാഴ്ചയോളമായി അതീവ ഗുരുതരാവസ്ഥയിൽ വെന്റിലേറ്ററിൽ തുടരവേ തിങ്കളാഴ്ചയാണ് കുട്ടി മരണത്തിന് കീഴടങ്ങിയത്. കുടുംബത്തിന്റെ അഭ്യർത്ഥനപ്രകാരം കുട്ടിയുടെ പേരുവിവരങ്ങൾ പോലീസ് പുറത്തുവിട്ടിട്ടില്ല.
സംഭവത്തിൽ ഒന്റാറിയോ കൊറോണർ ഓഫീസ് വിശദമായ അന്വേഷണം ആരംഭിച്ചിട്ടുണ്ട്. വിനോദസഞ്ചാര കേന്ദ്രത്തിലെ സുരക്ഷാ മുൻകരുതലുകൾ സംബന്ധിച്ച് പോലീസ് പരിശോധന നടത്തിവരികയാണ്. ക്യൂബെക്കിലെ സ്കീയിങ് കേന്ദ്രങ്ങളിൽ സമീപകാലത്ത് നടക്കുന്ന രണ്ടാമത്തെ കുട്ടിയുടെ മരണമാണിത്. ഫെബ്രുവരി ആദ്യവാരം സ്കീ റിസോർട്ടിലെ ചെയർലിഫ്റ്റിൽ വസ്ത്രം കുരുങ്ങി 13 വയസ്സുകാരി മരിച്ചിരുന്നു. ഈ തുടർച്ചയായ അപകടങ്ങൾ കാനഡയിലെ ശീതകാല കായിക വിനോദങ്ങളുടെ സുരക്ഷയെക്കുറിച്ചുള്ള പുതിയ ചർച്ചകൾക്ക് വഴിതുറന്നിരിക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Tragedy strikes during Quebec excursion; 4-year-old girl dies after skiing accident
