ഒട്ടാവ: പോസ്റ്റ് ഗ്രാജ്വേറ്റ് വർക്ക് പെർമിറ്റിന്റെ (PGWP) കാലാവധി ഉടൻ അവസാനിക്കുന്ന പതിനായിരക്കണക്കിന് അന്താരാഷ്ട്ര വിദ്യാർത്ഥികളുടെ ഭാവി കാനഡയിൽ അനിശ്ചിതത്വത്തിൽ. ഈ വർഷം ഡിസംബർ 31-ഓടെ ഏകദേശം 31,610 പേരുടെ PGWP വിസ കാലാവധി തീരും, ഇത് കാനഡയിലെ സ്ഥിരതാമസ (PR) മോഹങ്ങളുമായി എത്തിയവരെ ആശങ്കയിലാക്കിയിരിക്കുകയാണ്.സ്ഥിരമായി വിദേശ തൊഴിലാളികളുടെയും വിദ്യാർത്ഥികളുടെയും ഒഴുക്ക് നിയന്ത്രിക്കാൻ കാനഡ ലക്ഷ്യമിടുന്ന പശ്ചാത്തലത്തിലാണ് ഈ പ്രതിസന്ധി. വിസ കാലാവധി കഴിഞ്ഞതിന് ശേഷവും എത്രപേർ കാനഡയിൽ രേഖകളില്ലാത്ത (Undocumented) താമസക്കാരായി തുടരുമെന്നതിനെക്കുറിച്ചുള്ള ആശങ്കകളും സാമ്പത്തിക വിദഗ്ധർ പങ്കുവെക്കുന്നുണ്ട്.
പെർമിറ്റ് കാലാവധി കഴിഞ്ഞാൽ എന്ത് സംഭവിക്കും?
PGWP ഉടമകളിൽ ഭൂരിഭാഗവും PR നേടാൻ കഴിയാതെ രാജ്യം വിടുകയോ, അല്ലെങ്കിൽ നിലവിലെ നിയമങ്ങൾ കാരണം മറ്റ് വഴിയില്ലാതെ കാനഡയിൽ രേഖകളില്ലാത്ത താമസക്കാരായി തുടരുകയോ ചെയ്യാനാണ് സാധ്യത. 2022-ൽ സ്ഥിരതാമസം നേടിയവരിൽ 12% പേർ മാത്രമാണ് മുൻപ് PGWP കൈവശം വെച്ചിരുന്നവർ. ഇത് PGWP ഉടമകളിൽ വളരെ കുറഞ്ഞ ശതമാനം പേർക്ക് മാത്രമാണ് PR ലഭിക്കുന്നുള്ളൂ എന്നതിൻ്റെ സൂചന നൽകുന്നു. 2025-ൽ വിസ കാലാവധി കഴിഞ്ഞ ഏകദേശം 1,15,000 പേരിൽ, 12% പേർക്ക് മാത്രമേ വർക്ക് പെർമിറ്റ് പുതുക്കാനോ മറ്റ് പെർമിറ്റുകളിലേക്ക് മാറാനോ കഴിഞ്ഞിട്ടുള്ളൂ. വർദ്ധിച്ചു വരുന്ന ജീവിതച്ചെലവും, കുറഞ്ഞ വേതനവും, PR ലഭിക്കാനുള്ള സാധ്യതകൾ കുറഞ്ഞതും വിദ്യാർത്ഥികൾക്ക് കാനഡയിലെ ജീവിതം ദുസ്സഹമാക്കുന്നുവെന്ന് മൈഗ്രന്റ് വർക്കേഴ്സ് അലയൻസ് ഫോർ ചേഞ്ച് എക്സിക്യൂട്ടീവ് ഡയറക്ടർ അഭിപ്രായപ്പെടുന്നു.
നയമാറ്റങ്ങൾ വിദ്യാർത്ഥികളെ പ്രതിസന്ധിയിലാക്കി
കഴിഞ്ഞ അഞ്ച് വർഷത്തിനിടെ ഒരു മില്യണിലധികം അന്താരാഷ്ട്ര വിദ്യാർത്ഥികൾക്ക് കാനഡ സ്റ്റഡി പെർമിറ്റ് നൽകിയിരുന്നു. എന്നാൽ, ഭവന ലഭ്യത ഉൾപ്പെടെയുള്ള പ്രശ്നങ്ങളുമായി കുടിയേറ്റത്തെ ബന്ധിപ്പിച്ച് കനേഡിയൻ പൗരന്മാർക്കിടയിൽ ആശങ്ക വർദ്ധിച്ചതോടെ, 2024 മുതൽ സർക്കാർ ഇമിഗ്രേഷൻ നയങ്ങൾ കർശനമാക്കി. സ്ഥിരതാമസം നേടാനുള്ള വാഗ്ദാനങ്ങൾ നൽകിയാണ് വിദ്യാർത്ഥികളെ കാനഡയിലേക്ക് ക്ഷണിച്ചത്. എന്നാൽ നയം പെട്ടെന്ന് മാറ്റിയതിനെതിരെ ഇമിഗ്രേഷൻ വിദഗ്ധർ വിമർശനമുന്നയിക്കുന്നു. 2021, 2022, 2023 വർഷങ്ങളിൽ കാനഡയിൽ എത്തിയ വിദ്യാർത്ഥികളെയാണ് ഈ നയമാറ്റങ്ങൾ ഏറ്റവും കൂടുതൽ ബാധിക്കുന്നത്. വലിയ കടമെടുത്ത് ഫീസ് അടച്ച നിരവധി വിദ്യാർത്ഥികളാണ് ഇപ്പോൾ തങ്ങളുടെ ഭാവി എന്താകുമെന്ന് അറിയാതെ കാനഡയിൽ ആശങ്കയോടെ കഴിയുന്നത്. പുതിയ പ്രഖ്യാപനങ്ങളോ നയപരമായ ഇളവുകളോ ഉണ്ടാകാത്തപക്ഷം, പതിനായിരക്കണക്കിന് PGWP ഉടമകൾക്ക് ഈ വർഷാവസാനത്തോടെ കാനഡ വിടേണ്ടിവരും, അല്ലെങ്കിൽ രേഖകളില്ലാത്ത നിലയിലേക്ക് മാറേണ്ടിവരും.
ഒരു അംഗീകൃത ഇമിഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)
📢കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Thousands of former international students’ visas will expire soon
