ഒട്ടാവ: കനേഡിയൻ ജനതയുടെ ജീവിതസംതൃപ്തിയെക്കുറിച്ച് സ്റ്റാറ്റിസ്റ്റിക്സ് കാനഡ (StatCan) പുറത്തുവിട്ട ഏറ്റവും പുതിയ സർവ്വേ ഫലങ്ങളിൽ കൗതുകകരമായ വിവരങ്ങൾ പുറത്ത്. രാജ്യം മൊത്തത്തിൽ കഴിഞ്ഞ വർഷത്തെ അപേക്ഷിച്ച് കൂടുതൽ സംതൃപ്തി രേഖപ്പെടുത്തുമ്പോൾ, പ്രവിശ്യകൾക്കിടയിൽ വലിയ വ്യത്യാസങ്ങളാണ് പ്രകടമാകുന്നത്.
കാനഡയിലെ പ്രവിശ്യകളിൽ ജീവിതസംതൃപ്തി ഏറ്റവും കുറവ് രേഖപ്പെടുത്തിയത് ആൽബർട്ടയിലാണ്. ഇവിടെ സർവ്വേയിൽ പങ്കെടുത്തവരിൽ 38.1 ശതമാനം പേർക്ക് മാത്രമേ ഉയർന്ന ജീവിതസംതൃപ്തിയുള്ളൂ എന്ന് റിപ്പോർട്ട് വ്യക്തമാക്കുന്നു. ഏതാണ്ട് 29.1 ശതമാനം ആളുകളും തങ്ങളുടെ ജീവിതത്തിൽ അസംതൃപ്തരാണെന്നാണ് കണക്കുകൾ പറയുന്നത്. ആൽബർട്ടയ്ക്ക് തൊട്ടുപിന്നിൽ 42 ശതമാനം സംതൃപ്തിയുമായി ഒന്റാറിയോ ആണ് പട്ടികയിൽ താഴെയുള്ള മറ്റൊരു പ്രവിശ്യ.
അതേസമയം ജീവിതം ആഘോഷമാക്കുന്നതിൽ ക്യുബക്ക് ആണ് കാനഡയിൽ മുൻപന്തിയിൽ നിൽക്കുന്നത്. 57.3 ശതമാനം ക്യുബക്കുകാരും തങ്ങളുടെ ജീവിതത്തിൽ അങ്ങേയറ്റം സംതൃപ്തരാണെന്ന് സർവ്വേ പറയുന്നു. ക്യൂബെക്കിന്റെ അയൽ പ്രവിശ്യയായ ന്യൂ ബ്രൺസ്വിക് ആണ് 53.4 ശതമാനവുമായി ഈ പട്ടികയിൽ രണ്ടാം സ്ഥാനത്തുള്ളത്.
പ്രായവും ജീവിതസംതൃപ്തിയും തമ്മിൽ വലിയ ബന്ധമുണ്ടെന്നും സ്റ്റാറ്റിസ്റ്റിക്സ് കാനഡയുടെ കണക്കുകൾ സൂചിപ്പിക്കുന്നു. 75 വയസ്സിന് മുകളിലുള്ള മുതിർന്നവരിലാണ് ഏറ്റവും കൂടുതൽ സംതൃപ്തി (64%) കാണപ്പെടുന്നത്. എന്നാൽ കരിയറിലും മറ്റും ശ്രദ്ധ കേന്ദ്രീകരിക്കുന്ന 25 മുതൽ 34 വയസ്സുവരെയുള്ള യുവാക്കളിൽ വെറും 32.7 ശതമാനം പേർക്ക് മാത്രമാണ് ഉയർന്ന ജീവിതസംതൃപ്തിയുള്ളത്. 15 മുതൽ 24 വയസ്സുവരെയുള്ളവരിൽ 46 ശതമാനം പേർ സംതൃപ്തി രേഖപ്പെടുത്തിയിട്ടുണ്ട്.
2024-നെ അപേക്ഷിച്ച് 2025-ന്റെ രണ്ടാം പാദത്തിൽ കാനഡക്കാരുടെ ആകെ ജീവിതസംതൃപ്തിയിൽ 5.7 ശതമാനത്തിന്റെ വർദ്ധനവ് ഉണ്ടായിട്ടുണ്ട് എന്നത് ശ്രദ്ധേയമാണ്. ജീവിതത്തിന്റെ ലക്ഷ്യബോധത്തെക്കുറിച്ചും ഭാവി പ്രതീക്ഷകളെക്കുറിച്ചുമുള്ള ചോദ്യങ്ങൾക്കും കഴിഞ്ഞ വർഷത്തെക്കാൾ അനുകൂലമായ മറുപടികളാണ് ഭൂരിഭാഗം പേരും നൽകിയത്. പൂജ്യം മുതൽ പത്ത് വരെയുള്ള സ്കെയിലിൽ എട്ട്, ഒൻപത്, പത്ത് പോയിന്റുകൾ നൽകിയവരെയാണ് ‘ഉയർന്ന സംതൃപ്തിയുള്ളവർ’ എന്ന വിഭാഗത്തിൽ ഉൾപ്പെടുത്തിയിരിക്കുന്നത്.
This province reported the lowest percentage of life satisfaction, according to StatCan
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
