ടൊറന്റോ: കാനഡയിലേക്ക് കുടിയേറാൻ ആഗ്രഹിക്കുന്നവർക്കും നിലവിലുള്ളവർക്കും ഒരുപോലെ ആശങ്ക നൽകുന്ന വിവരങ്ങളുമായി പുതിയ പഠന റിപ്പോർട്ട് പുറത്ത്. കാനഡയിലെ പ്രമുഖ മെട്രോപൊളിറ്റൻ നഗരങ്ങളിലൊന്നായ മോൺട്രിയലിൽ വരും വർഷങ്ങളിൽ ജനസംഖ്യ കുത്തനെ കുറയുമെന്നാണ് ഒബ്സർവേറ്ററി ഗ്രാൻഡ് മോൺട്രിയൽ (Observatoire Grand Montréal) പുറത്തുവിട്ട ഏറ്റവും പുതിയ കണക്കുകൾ വ്യക്തമാക്കുന്നത്. രാജ്യത്തെ മറ്റ് പ്രധാന നഗരങ്ങളായ ടൊറന്റോയും വാൻകൂവറും വൻ ജനസംഖ്യാ വളർച്ചയിലേക്ക് കുതിക്കുമ്പോഴാണ് മോൺട്രിയലിന് ഈ തിരിച്ചടിയെന്നത് ശ്രദ്ധേയമാണ്.
കുറഞ്ഞ കുടിയേറ്റ നിരക്കും അതിവേഗം പ്രായമേറുന്ന ജനസമൂഹവുമാണ് മോൺട്രിയലിനെ ഈ പ്രതിസന്ധിയിലേക്ക് നയിക്കുന്നത്. നിലവിലെ പ്രവണത തുടർന്നാൽ വരും വർഷങ്ങളിൽ നഗരത്തിൽ ജനസംഖ്യാ വളർച്ച പൂർണ്ണമായും നിലയ്ക്കുമെന്ന് റിപ്പോർട്ട് മുന്നറിയിപ്പ് നൽകുന്നു. ഒടുവിലത്തെ കണക്കനുസരിച്ച് 2025-ൽ 43 ലക്ഷമായിരുന്നു മോൺട്രിയലിലെ ജനസംഖ്യ. എന്നാൽ 2050 ആകുമ്പോഴേക്കും ഇതിൽ 1.3 ശതമാനത്തിന്റെ കുറവുണ്ടാകാനാണ് സാധ്യത. ഇതിന് വിപരീതമായി, ഉയർന്ന കുടിയേറ്റ നിരക്കും യുവാക്കളുടെ സാന്നിധ്യവും മൂലം 2050-ഓടെ ടൊറന്റോയിൽ 14.6 ശതമാനവും വാൻകൂവറിൽ 21.9 ശതമാനവും ജനസംഖ്യാ വളർച്ച രേഖപ്പെടുത്തുമെന്നും കമ്മ്യൂണിറ്റി മെട്രോപൊളിറ്റൻ ഡി മോൺട്രിയൽ (CMM) വ്യക്തമാക്കുന്നു.
കോവിഡ് മഹാമാരിക്ക് ശേഷം ആദ്യമായി മോൺട്രിയലിൽ 29 വയസ്സിന് താഴെയുള്ള യുവാക്കളുടെയും കുട്ടികളുടെയും എണ്ണത്തിൽ വലിയ കുറവാണ് രേഖപ്പെടുത്തിയിരിക്കുന്നത്. അതേസമയം, 65 വയസ്സിന് മുകളിലുള്ളവരുടെ എണ്ണം 2.9 ശതമാനം വർദ്ധിക്കുകയും ചെയ്തു. കഴിഞ്ഞ 25 വർഷമായി നഗരത്തിൽ പ്രകടമാകുന്ന പ്രതിസന്ധിയാണിത്. 2006 മുതൽ നഗരത്തിൽ ആശ്രയിച്ചു ജീവിക്കുന്നവരുടെ (കുട്ടികളും പ്രായമായവരും) എണ്ണം ജോലി ചെയ്യുന്ന പ്രായത്തിലുള്ളവരേക്കാൾ ഇരട്ടി വേഗത്തിലാണ് വളരുന്നത്. ഇത് 2050-ഓടെ നഗരത്തിലെ ഡിപെൻഡൻസി റേഷ്യോ (Dependency Ratio) അഥവാ ആശ്രയത്വ അനുപാതം 74.7 ശതമാനമായി ഉയർത്തും. ടൊറന്റോയിലും (64%) വാൻകൂവറിലും (61%) ഇത് വളരെ കുറവായിരിക്കുമെന്നത് മോൺട്രിയലിന്റെ ഭാവിയെ ആശങ്കയിലാക്കുന്നു.
തൊഴിൽ മേഖലയിലും പൊതു ധനകാര്യത്തിലും ഈ മാറ്റം കടുത്ത സമ്മർദ്ദമുണ്ടാക്കുമെന്ന് സിഎംഎം ചൂണ്ടിക്കാണിക്കുന്നു. പ്രായമായവർ കൂടുന്നതോടെ ചെറിയ ഭവനസൗകര്യങ്ങൾക്കും ആരോഗ്യ സേവനങ്ങൾക്കും ഡിമാൻഡ് കൂടും. കഴിഞ്ഞ രണ്ടു വർഷങ്ങളിൽ താൽക്കാലികമായി എത്തിയ പുതിയ കുടിയേറ്റക്കാരാണ് നഗരത്തിന്റെ സമ്പദ്വ്യവസ്ഥയെ താങ്ങിനിർത്തിയത്. പ്രകൃതിദത്തമായ ജനസംഖ്യാ വളർച്ച ഇല്ലാത്ത മോൺട്രിയലിൽ തൊഴിൽ പ്രതിസന്ധി മറികടക്കാനും നികുതിദായകർക്ക് മേലുള്ള അമിത ഭാരം കുറയ്ക്കാനും കുടിയേറ്റം മാത്രമാണ് ഏക പോംവഴിയെന്ന് റിപ്പോർട്ട് അടിവരയിടുന്നു. കാനഡയിലെ കുടിയേറ്റ നയങ്ങളിൽ വരുന്ന മാറ്റങ്ങൾ മോൺട്രിയലിനെ എങ്ങനെ ബാധിക്കുമെന്നാണ് ഇനി ഉറ്റുനോക്കേണ്ടത്.
This major city in Canada is facing a major crisis
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
