ഒട്ടാവ: പ്രധാനമന്ത്രി മാർക്ക് കാർണിയുടെ ലിബറൽ സർക്കാർ അവതരിപ്പിച്ച കന്നി ഫെഡറൽ ബഡ്ജറ്റിന്മേലുള്ള നിർണ്ണായകയാകമായ മൂന്നാമത്തെ വിശ്വാസ വോട്ടെടുപ്പ് നവംബർ 17-ന് നടക്കാനിരിക്കെ, കനേഡിയൻ രാഷ്ട്രീയത്തിൽ വീണ്ടും ഒരു തിരഞ്ഞെടുപ്പ് കൊടുങ്കാറ്റിനുള്ള സാധ്യത വർധിക്കുകയാണ്. ബഡ്ജറ്റിന് പ്രതിപക്ഷ പാർട്ടികൾ പിന്തുണ നൽകണമെന്ന് ഗവൺമെന്റ് ഹൗസ് നേതാവ് സ്റ്റീവൻ മക്കിന്നൻ ശക്തമായി ആവശ്യപ്പെട്ടു. കേവല ഭൂരിപക്ഷത്തിന് രണ്ട് സീറ്റുകൾ മാത്രം കുറവുള്ള ലിബറലുകൾ, ബജറ്റ് പാസാക്കിയില്ലെങ്കിൽ രാജ്യം ഒരു ഇടക്കാല തിരഞ്ഞെടുപ്പിലേക്ക് നീങ്ങാൻ സാധ്യതയുണ്ടെന്ന സൂചന നൽകിക്കൊണ്ട് പ്രതിപക്ഷത്തെ വെല്ലുവിളിച്ചിരിക്കുകയാണ്. കൺസർവേറ്റീവുകളും ബ്ളോക്ക് ക്യുബെക്കോയിസും ബജറ്റിനെ പിന്തുണക്കില്ലെന്ന് പ്രഖ്യാപിച്ചതോടെ, എൻ.ഡി.പി.യുടെ അന്തിമ നിലപാട് കാനഡയുടെ രാഷ്ട്രീയ ഭാവിയെ നിർണ്ണയിക്കുന്നതിൽ നിർണ്ണായകമാകും.
കൺസർവേറ്റീവ് നേതാവ് പിയറി പൊലിവ്രെയും ബ്ളോക്ക് ക്യുബെക്കോയിസ് നേതാവ് യെവ്സ്-ഫ്രാങ്കോയിസ് ബ്ലാഞ്ചെറ്റും ബഡ്ജറ്റിനെ പിന്തുണയ്ക്കില്ലെന്ന് പ്രഖ്യാപിച്ചിട്ടുണ്ട്. ഇരുപാർട്ടികളും തങ്ങളുടെ വോട്ടുകൾക്ക് പരസ്പരം വിട്ടുവീഴ്ചയില്ലാത്ത ആവശ്യങ്ങൾ മുന്നോട്ട് വെക്കുകയും ചെയ്തു. എന്നാൽ, എൻ.ഡി.പി. തങ്ങളുടെ അന്തിമ തീരുമാനം ഇതുവരെ അറിയിച്ചിട്ടില്ല. കൺസർവേറ്റീവുകൾ ഫെഡറൽ സർക്കാരിന് ലഭിക്കേണ്ട കോടിക്കണക്കിന് ഡോളർ വരുമാനം വെട്ടിക്കുറയ്ക്കാനും കമ്മികൂടി കുറയ്ക്കാനും ശ്രമിക്കുമ്പോൾ, ബ്ളോക്ക് ക്യുബെക്കോയിസ് 36 ബില്യൺ ഡോളറിൻ്റെ അധിക ചിലവ് ആവശ്യപ്പെടുന്നു. ഈ തീവ്രമായ ആവശ്യങ്ങളെ തൃപ്തിപ്പെടുത്താൻ സർക്കാരിന് കഴിയില്ലെന്ന് മക്കിന്നൻ ചൂണ്ടിക്കാട്ടി.
മുമ്പ് അവതരിപ്പിച്ച ഭേദഗതികളിന്മേലുള്ള വിശ്വാസ വോട്ടെടുപ്പുകൾ അതിജീവിച്ചെങ്കിലും, ബഡ്ജറ്റിൻ്റെ അന്തിമ അംഗീകാരത്തിനായുള്ള വോട്ടെടുപ്പ് നിർണ്ണായകമാണ്. ബഡ്ജറ്റ് പാസാകാത്ത പക്ഷം കാനഡ മറ്റൊരു തിരഞ്ഞെടുപ്പിലേക്ക് നീങ്ങാൻ സാധ്യതയുണ്ട്. കൺസർവേറ്റീവ് നേതാവ് പിയറി പൊലിവ്രെ തൻ്റെ പാർട്ടിയെ വ്യക്തമായി വലതുപക്ഷത്തേക്ക് നയിച്ചതിനാൽ, നിലവിലെ ബഡ്ജറ്റ് ഒരു “വളർച്ചാ ബജറ്റ്”, “കമ്മ്യൂണിറ്റി കേന്ദ്രീകൃത ബജറ്റ്” ആയതിനാൽ ഇത് കനേഡിയൻ രാഷ്ട്രീയത്തിൻ്റെ മധ്യഭാഗത്ത് നിലയുറപ്പിക്കുന്നു എന്ന് മക്കിന്നൻ വാദിച്ചു. കൺസർവേറ്റീവിന് വോട്ട് ചെയ്തവരും ബഡ്ജറ്റിലെ തുറമുഖ അടിസ്ഥാന സൗകര്യങ്ങൾ പോലുള്ള വിഷയങ്ങളെ പിന്തുണയ്ക്കുമെന്നും അദ്ദേഹം കൂട്ടിച്ചേർത്തു.
എന്നാൽ, ഭവന നിർമ്മാണം, കാലാവസ്ഥാ മാറ്റം, സാമ്പത്തിക സ്ഥിരത എന്നിവയുമായി ബന്ധപ്പെട്ട് ലിബറൽ പാർട്ടിയുടെ തിരഞ്ഞെടുപ്പ് വാഗ്ദാനങ്ങൾ പൂർണ്ണമായി പാലിക്കാൻ ബഡ്ജറ്റിന് കഴിഞ്ഞിട്ടില്ലെന്ന് മാധ്യമപ്രവർത്തക ചോദ്യങ്ങൾ ഉന്നയിച്ചു. ഇതിന് മറുപടിയായി, പ്രധാനമന്ത്രി കാർണി വാഗ്ദാനം ചെയ്ത കാര്യങ്ങൾ ബഡ്ജറ്റ് നിറവേറ്റുന്നുണ്ടെന്ന് മക്കിന്നൻ ആവർത്തിച്ച് ഉറപ്പിച്ചുപറഞ്ഞു. ബ്ളോക്കിൻ്റെയും കൺസർവേറ്റീവുകളുടെയും വ്യത്യസ്ത ആവശ്യങ്ങൾ ഉൾക്കൊള്ളാൻ കഴിയാത്തത് സ്വാഭാവികമാണെന്നും അദ്ദേഹം വിശദീകരിച്ചു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
The game will change in Canada; if the budget is not passed, will there be another election? Liberals challenge!
