കൊച്ചി: സജിൻ ഗോപു, നിഖില വിമൽ എന്നിവരെ പ്രധാന കഥാപാത്രങ്ങളാക്കി സുധി മാഡിസൺ സംവിധാനം ചെയ്യുന്ന ‘ധൂമകേതു’ എന്ന ചിത്രത്തിന്റെ ഫസ്റ്റ് ലുക്ക് പോസ്റ്ററിന് പിന്നിലെ ചിത്രീകരണ വിവരങ്ങൾ പുറത്തുവിട്ടു. നടി നിഖില വിമൽ വെള്ളത്തിനടിയിൽ വെച്ച് നടത്തുന്ന അപകടകരമായ അണ്ടർവാട്ടർ ഷൂട്ടിന്റെ ബിഹൈൻഡ് ദി സീൻസ് (BTS) വീഡിയോയാണ് അണിയറപ്രവർത്തകർ ഇപ്പോൾ സോഷ്യൽ മീഡിയയിലൂടെ പങ്കുവെച്ചിരിക്കുന്നത്. കഴിഞ്ഞ ദിവസം പുറത്തിറങ്ങിയ ചിത്രത്തിന്റെ ഫസ്റ്റ് ലുക്ക് പോസ്റ്റർ വലിയ രീതിയിൽ ശ്രദ്ധിക്കപ്പെട്ടിരുന്നു. ഇതിന് പിന്നാലെയാണ് പോസ്റ്ററിലെ ദൃശ്യം എഡിറ്റിംഗോ കൃത്രിമ സാങ്കേതികവിദ്യയോ (AI) ഉപയോഗിച്ച് നിർമ്മിച്ചതല്ലെന്നും, യഥാർത്ഥമായി വെള്ളത്തിനടിയിൽ ചിത്രീകരിച്ചതാണെന്നും വ്യക്തമാക്കുന്ന വീഡിയോ ഛായാഗ്രാഹകൻ ഷൈജു ഖാലിദ് ഇൻസ്റ്റഗ്രാമിലൂടെ പുറത്തുവിട്ടത്.
മലയാള സിനിമയിൽ അപൂർവ്വമായി മാത്രം കാണാറുള്ള കൃത്യതയാർന്ന അണ്ടർവാട്ടർ രംഗങ്ങളുമായാണ് ‘ധൂമകേതു’ പ്രേക്ഷകരിലേക്ക് എത്തുന്നതെന്നാണ് ഈ വീഡിയോ നൽകുന്ന സൂചന. വെള്ളത്തിലേക്ക് ചാടിയുള്ള ഈ വെല്ലുവിളി നിറഞ്ഞ ചിത്രീകരണത്തിന്റെ ദൃശ്യങ്ങൾ ഇതിനകം തന്നെ സോഷ്യൽ മീഡിയയിൽ വൈറലായിക്കഴിഞ്ഞു. ‘സൂക്ഷ്മദർശിനി’ എന്ന വിജയചിത്രത്തിന് ശേഷം ഹാപ്പി അവേഴ്സ് എന്റർടെയ്ൻമെന്റ്സും എ ആൻഡ് എച്ച്എസ് പ്രൊഡക്ഷൻ ഹൗസും ചേർന്നാണ് ഈ ചിത്രം നിർമ്മിക്കുന്നത്. ചിത്രത്തിന്റെ പ്രധാന ഷൂട്ടിംഗ് പൂർത്തിയായതായും നിലവിൽ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണെന്നും അണിയറപ്രവർത്തകർ അറിയിച്ചു.
സമീർ താഹിർ, ഷൈജു ഖാലിദ്, സജിൻ അലി, അബ്ബാസ് തിരുനാവായ എന്നിവർ ചേർന്ന് നിർമ്മിക്കുന്ന ഈ ചിത്രത്തിന് സോണിയും മനുവും ചേർന്നാണ് തിരക്കഥയൊരുക്കിയിരിക്കുന്നത്. ജിന്റോ ജോർജ്ജ് ഛായാഗ്രഹണവും വിവേക് ഹർഷൻ എഡിറ്റിംഗും നിർവ്വഹിക്കുന്നു. ഷൈൻ ടോം ചാക്കോ, ഗണപതി, മഞ്ജു പിള്ള, നിയാസ് ബക്കർ, സിദ്ധാർത്ഥ് ഭരതൻ എന്നിവരാണ് ചിത്രത്തിലെ മറ്റ് പ്രധാന താരങ്ങൾ. ഭാവന റിലീസ് ആണ് ചിത്രം തീയേറ്ററുകളിൽ എത്തിക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
"If he's jumping, let the camera jump along too!" — The 'Dhumakethu' team turns a Sreenivasan quip into reality.
