‘അഹങ്കാരത്തിന്റെ ആൾരൂപം, കാപട്യത്തിന്റെ തമ്പുരാൻ’; സംഗീത സംവിധായകൻ എം. ജയചന്ദ്രന് പിന്നിലെ വിവാദങ്ങൾ ഇതൊക്കെയാണ്!

പതിനൊന്ന് സംസ്ഥാന അവാർഡുകളും ഒരു ദേശീയ അവാർഡും ഉൾപ്പെടെയുള്ള പുരസ്‌കാരങ്ങൾ കരസ്ഥമാക്കിയ മലയാളത്തിലെ പ്രമുഖ സംഗീത സംവിധായകനാണ് എം. ജയചന്ദ്രൻ. മലയാളികൾക്ക് വിലമതിക്കാനാവാത്ത മധുര ഗാനങ്ങൾ സമ്മാനിച്ച അദ്ദേഹത്തിന് സംഗീത ലോകം നൽകിയതാകട്ടെ നിരവധി ശത്രുക്കളെയാണ്. ‘അഹങ്കാരത്തിന്റെ ആൾരൂപം’, ‘കാപട്യത്തിന്റെ തമ്പുരാൻ’ എന്നുവരെ അദ്ദേഹത്തെ വിമർശകർ വിശേഷിപ്പിച്ചിട്ടുണ്ട്. ഈ പശ്ചാത്തലത്തിൽ, എം. ജയചന്ദ്രന്റെ തൊഴിൽപരമായ ജീവിതത്തിൽ ഉയർന്നുവന്ന പ്രധാന ആരോപണങ്ങളെക്കുറിച്ച് സംവിധായകൻ ആലപ്പി അഷ്റഫ് വെളിപ്പെടുത്തലുകൾ നടത്തിയിരിക്കുകയാണ്.

പ്രശസ്ത നോർത്ത് ഇന്ത്യൻ ഗായികയായ ശ്രേയ ഘോഷാലിന് മലയാളത്തിൽ തുടർച്ചയായി അവസരങ്ങൾ നൽകിയതോടെയാണ് ജയചന്ദ്രന് എതിരെയുള്ള വിമർശനങ്ങളും ശത്രുതയും ശക്തമായത്. ശ്രേയയെ മലയാളത്തിലേക്ക് ‘ഇറക്കുമതി ചെയ്തു’ എന്ന് ആരോപിച്ച് പല ഗായകരും അദ്ദേഹത്തിനെതിരെ പടവാൾ ഓങ്ങുകയും അധിക്ഷേപങ്ങൾ ഏറ്റുവാങ്ങേണ്ടിവരുകയും ചെയ്തു.

ശ്രേയ ഘോഷാലിനെ ആദ്യമായി മലയാളത്തിലേക്ക് കൊണ്ടുവന്നത് അൽഫോൺസ് ജോസഫാണെങ്കിലും, മലയാള സംഗീത ശാഖയിൽ ശ്രേയയുടെ സ്വരമാധുരി അടയാളപ്പെടുത്തിയത് എം. ജയചന്ദ്രന്റെ ഗാനങ്ങളായിരുന്നു. തൊഴിലിൽ വിട്ടുവീഴ്ച ചെയ്യാത്തതാണ് തനിക്ക് ഇത്രയധികം ശത്രുക്കൾ ഉണ്ടാകാൻ കാരണമെന്ന് ജയചന്ദ്രൻ പറയുന്നു.

ശ്രേയ വിവാദങ്ങൾക്കിടെ മുതിർന്ന ഗായകൻ പി. ജയചന്ദ്രനുമായി എം. ജയചന്ദ്രന് ഉരസലുണ്ടായതും വലിയ വാർത്തയായിരുന്നു. ‘നോട്ടം’ എന്ന സിനിമയിൽ പാടിപ്പിച്ച ഗാനം, താൻ ആവശ്യപ്പെട്ട രീതിയിലല്ല പാടിയതെന്നും, മാറ്റി പാടിത്തരാൻ ആവശ്യപ്പെട്ടപ്പോൾ ഗായകൻ അതിന് തയ്യാറായില്ലെന്നും സംഗീത സംവിധായകൻ എം. ജയചന്ദ്രൻ പറയുകയുണ്ടായി.

ഇതോടെ ആ ഗാനം സിനിമയിൽ നിന്ന് ഒഴിവാക്കി. തുടർന്ന് പി. ജയചന്ദ്രൻ പത്രസമ്മേളനം നടത്തി പ്രതിഷേധിച്ചത് ശത്രുക്കൾക്ക് അദ്ദേഹത്തെ ആക്രമിക്കാനുള്ള മറ്റൊരു ആയുധമായി മാറി. കൂടാതെ, ഗായിക ചിത്രയുടെ ഭർത്താവ് വിജയശങ്കറുമായുള്ള പിണക്കവും വിമർശകർ പുതിയ കഥകൾ മെനയാൻ ഉപയോഗിച്ചു.

ഗാനരചയിതാക്കളായ ബി.ആർ. പ്രസാദിനെയും വയലാർ ശരത്ചന്ദ്രനെയും ഇരുപതിലധികം സിനിമകളിൽ നിന്നും ഒഴിവാക്കിയത് എം. ജയചന്ദ്രന്റെ നിർബന്ധപ്രകാരമാണെന്ന് ഗാനരചയിതാവായ രാജീവ് ആലുങ്കൽ ഒരു അനുസ്മരണ ചടങ്ങിൽ വെച്ച് വെളിപ്പെടുത്തിയിരുന്നു. ഈ ആരോപണങ്ങൾ പിന്നീട് ജയചന്ദ്രൻ നിഷേധിച്ചു.

തനിക്കെതിരെ ശക്തമായ ഒറ്റപ്പെടുത്തൽ ലോബി ഉണ്ടെന്നും എന്നാൽ തനിക്ക് ഒപ്പം ഈശ്വരന്റെ ലോബിയുണ്ട് എന്നുമായിരുന്നു വിവാദങ്ങളോടുള്ള അദ്ദേഹത്തിന്റെ പ്രതികരണം. ചെയ്യുന്ന തൊഴിലിനോട് ആത്മാർത്ഥതയും സത്യസന്ധതയും പുലർത്തുന്ന വ്യക്തിയാണ് ജയചന്ദ്രനെന്നും പക്ഷപാതം കാണിക്കാറില്ലെന്നും സംവിധായകൻ ആലപ്പി അഷ്റഫ് സാക്ഷ്യപ്പെടുത്തുന്നു.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

‘The embodiment of arrogance, the lord of hypocrisy’; These are the controversies behind music director M. Jayachandran!