ഒട്ടാവ: കാനഡയിൽ ഇത്തവണ നികുതി റിട്ടേൺ സമർപ്പിച്ച ഭൂരിഭാഗം ആളുകൾക്കും റീഫണ്ട് തുക ലഭിക്കാൻ താമസം നേരിടുന്നതായി റിപ്പോർട്ട്. നിശ്ചിത സമയപരിധിക്കുള്ളിൽ കൃത്യമായി ടാക്സ് ഫയൽ ചെയ്തിട്ടും ആഴ്ചകൾ പിന്നിട്ടിട്ടും റീഫണ്ടോ, നികുതി വിവരങ്ങളുടെ ചുരുക്കപ്പട്ടികയായ ‘നോട്ടീസ് ഓഫ് അസസ്മെന്റോ’ (NOA) ലഭ്യമായിട്ടില്ലെന്നാണ് പരക്കെ ഉയരുന്ന പരാതി. കാനഡയിലെ ഭൂരിഭാഗം നികുതിദായകർക്കും ടാക്സ് ഫയൽ ചെയ്യാനുള്ള അവസാന തീയതി ഏപ്രിൽ 30 ആയിരുന്നു. എന്നാൽ നടപടികൾ അനിശ്ചിതമായി നീളുന്നതിനെത്തുടർന്ന് സോഷ്യൽ മീഡിയ പ്ലാറ്റ്ഫോമുകളിലൂടെ നിരവധിപേരാണ് കാനഡ റവന്യൂ ഏജൻസിക്കെതിരെ (CRA) പരസ്യമായി രംഗത്തെത്തുന്നത്.
ഓൺലൈൻ വഴി സമർപ്പിക്കുന്ന ഭൂരിഭാഗം അപേക്ഷകളും ‘ഉടൻ തന്നെ’ (Immediately) പ്രൊസസ്സ് ചെയ്യുമെന്നാണ് കാനഡ റവന്യൂ ഏജൻസി തങ്ങളുടെ ഔദ്യോഗിക വെബ്സൈറ്റിൽ വ്യക്തമാക്കുന്നത്. എന്നാൽ ഇത്തവണ മാർച്ച് 23-ന് തന്നെ ടാക്സ് ഫയലിംഗ് പൂർത്തിയാക്കിയവർക്ക് പോലും ഇതുവരെ റീഫണ്ട് ലഭിച്ചിട്ടില്ലെന്ന് ഫേസ്ബുക്ക്, എക്സ് (X) തുടങ്ങിയ മാധ്യമങ്ങളിലൂടെ ഉപഭോക്താക്കൾ പരാതിപ്പെടുന്നു. സാധാരണയായി നികുതി റിട്ടേൺ പരിശോധിച്ച ശേഷം സിആർഎ നൽകുന്ന നോട്ടീസ് ഓഫ് അസസ്മെന്റും (NOA), അതിൽ എന്തെങ്കിലും മാറ്റങ്ങളുണ്ടെങ്കിൽ നൽകുന്ന നോട്ടീസ് ഓഫ് റീഅസസ്മെന്റും (NOR) ഉപഭോക്താക്കളുടെ ഓൺലൈൻ സിആർഎ അക്കൗണ്ടിൽ ലഭ്യമാകാറുണ്ട്. എന്നാൽ ദിവസങ്ങൾ കഴിഞ്ഞിട്ടും അക്കൗണ്ടുകളിൽ വിവരങ്ങൾ ഒന്നും അപ്ഡേറ്റ് ചെയ്യാത്തതാണ് നികുതിദായകരെ വലയ്ക്കുന്നത്.
നികുതിദായകരുടെ പ്രതിഷേധം ശക്തമായതോടെ വിശദീകരണവുമായി സിആർഎ (CRA) രംഗത്തെത്തിയിട്ടുണ്ട്. ഓരോ വ്യക്തിയുടെയും അപേക്ഷകളിലെ പ്രത്യേക സാഹചര്യങ്ങൾ അനുസരിച്ച് പ്രൊസസ്സിംഗ് സമയത്തിൽ വ്യത്യാസമുണ്ടാകാമെന്നാണ് എക്സ് (X) പ്ലാറ്റ്ഫോമിലൂടെ ഏജൻസി വ്യക്തമാക്കുന്നത്. അപേക്ഷകളിൽ ഉണ്ടാകുന്ന പിഴവുകൾ, പൂർണ്ണമല്ലാത്ത വിവരങ്ങൾ, അപേക്ഷകൾ കൂടുതൽ സൂക്ഷ്മമായി പരിശോധിക്കേണ്ടി വരുന്ന സാഹചര്യം (Specialized processing), വിശദമായ വിലയിരുത്തലുകൾ എന്നിവയാണ് വൈകലിന് പ്രധാന കാരണമായി അധികൃതർ ചൂണ്ടിക്കാണിക്കുന്നത്. ഇതുമായി ബന്ധപ്പെട്ട് സംശയങ്ങളുള്ളവർക്ക് ഹെൽപ്പ് ലൈൻ നമ്പറുകൾ വഴി ഏജന്റുമാരുമായി നേരിട്ട് ബന്ധപ്പെടാമെന്നും സിആർഎ അറിയിച്ചു.
മുൻവർഷങ്ങളിൽ ദിവസങ്ങൾക്കകം ലഭ്യമായിരുന്ന ടാക്സ് റീഫണ്ടാണ് ഇത്തവണ വലിയ രീതിയിൽ വൈകുന്നത്. ഇതേത്തുടർന്ന് കാനഡയിലെ മുൻനിര മാധ്യമമായ സിടിവി ന്യൂസ് (CTVNews.ca) നികുതിദായകർക്കായി പ്രത്യേക പ്രതികരണ വേദി ഒരുക്കിയിട്ടുണ്ട്. നികുതി റിട്ടേൺ ലഭിക്കാൻ നിങ്ങളും കാനഡയിൽ ബുദ്ധിമുട്ട് നേരിടുന്നുണ്ടോ? എത്ര നാളായി നിങ്ങൾ കാത്തിരിക്കുന്നു? മുൻപ് ഇത്തരം അനുഭവം ഉണ്ടായിട്ടുണ്ടോ? നിങ്ങളുടെ അനുഭവങ്ങളും പ്രതികരണങ്ങളും പേരും സ്ഥലവും ഫോൺ നമ്പറും സഹിതം dotcom@bellmedia.ca എന്ന ഇമെയിൽ വിലാസത്തിലേക്ക് അയക്കാവുന്നതാണ്.
Tax refund delays; Taxpayers in Canada in crisis, CRA explains
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
