കാനഡയിൽ ഈ മേഖലയിൽ ജോലി ചെയ്യുന്നവർക്ക് നികുതി ക്രെഡിറ്റ്; അറിയാം പുതിയ പദ്ധതി

ഒട്ടാവ: കാനഡയിലെ പേഴ്സണൽ സപ്പോർട്ട് വർക്കർമാർക്ക് (Personal Support Workers – PSWs) സാമ്പത്തിക പിന്തുണ ഉറപ്പാക്കാൻ ഫെഡറൽ സർക്കാറിന്റെ പുതിയ പദ്ധതി. വർഷാവർഷം $1,100 വരെ തിരികെ ലഭിക്കുന്ന പുതിയ നികുതി ക്രെഡിറ്റിനാണ് (Refundable Tax Credit) 2025-ലെ ബഡ്ജറ്റിൽ നിർദ്ദേശിച്ചിരിക്കുന്നത്.

ഈ നിർദ്ദേശം ഹൗസ് ഓഫ് കോമൺസിൽ (House of Commons) അംഗീകരിച്ചാൽ മാത്രമേ നിയമമായി നിലവിൽ വരുകയുള്ളൂ. നിയമമായാൽ, 2026 മുതൽ 2030 വരെയുള്ള വർഷങ്ങളിൽ ഇത് രാജ്യത്തുടനീളമുള്ള മുൻനിര പരിചരണ തൊഴിലാളികൾക്ക് വലിയ ആശ്വാസമാകും.

പുതിയ പേഴ്സണൽ സപ്പോർട്ട് വർക്കേഴ്സ് ടാക്സ് ക്രെഡിറ്റ് (PSWTC), യോഗ്യതയുള്ള വരുമാനത്തിന്റെ 5% ആയിരിക്കും. ഒരു വർഷം പരമാവധി $1,100 വരെ ലഭിക്കും. $22,000-ഓ അതിൽ കൂടുതലോ വരുമാനമുള്ള PSW-മാർക്ക് മുഴുവൻ $1,100 ലഭിക്കും. നികുതി അടയ്ക്കുന്ന ബാധ്യതയില്ലെങ്കിൽ പോലും തൊഴിലാളികൾക്ക് ഈ പണം റീഫണ്ടായി ലഭിക്കും. ഇത് കുറഞ്ഞ വരുമാനമുള്ള തൊഴിലാളികൾക്ക് പ്രത്യേകിച്ചും പ്രയോജനകരമാണ്. ഇത് താൽക്കാലിക നടപടിയാണ്. 2026, 2027, 2028, 2029, 2030 എന്നീ നികുതി വർഷങ്ങളിൽ മാത്രമേ ഇത് ബാധകമാവുകയുള്ളൂ.

ആർക്കൊക്കെ യോഗ്യതയുണ്ടാകും?

രോഗികളെ കുളിപ്പിക്കുക, വസ്ത്രം ധരിപ്പിക്കുക, ഭക്ഷണം നൽകുക, ശുചിത്വം പാലിക്കാൻ സഹായിക്കുക, മൊബിലിറ്റി പിന്തുണ നൽകുക തുടങ്ങിയ അവശ്യ പരിചരണ ജോലികൾ ചെയ്യുന്നവർ ഈ ആനുകൂല്യത്തിന് യോ​ഗ്യതയുണ്ട്. ഹോസ്പിറ്റലുകൾ, നഴ്സിംഗ് കെയർ സൗകര്യങ്ങൾ, റസിഡൻഷ്യൽ കെയർ സൗകര്യങ്ങൾ, കമ്മ്യൂണിറ്റി കെയർ കേന്ദ്രങ്ങൾ, ലൈസൻസുള്ള ഹോം-കെയർ ഏജൻസികൾ തുടങ്ങിയ നിയന്ത്രിത ആരോഗ്യ സംരക്ഷണ സ്ഥാപനങ്ങളിൽ (Regulated Health Care Establishments) ജോലി ചെയ്യുന്നവർക്ക് മാത്രമാണ് യോഗ്യത. അഡ്മിനിസ്ട്രേറ്റീവ്, ക്ലറിക്കൽ, അല്ലെങ്കിൽ ക്ലീനിംഗ് ജോലികൾ മാത്രം ചെയ്യുന്നവരെ ഒഴിവാക്കിയിട്ടുണ്ട്.

ബ്രിട്ടീഷ് കൊളംബിയ (British Columbia), ന്യൂഫൗണ്ട്ലാൻഡ് ആൻഡ് ലാബ്രഡോർ (Newfoundland and Labrador) ,നോർത്ത് വെസ്റ്റ് ടെറിട്ടറീസ് (Northwest Territories) എന്നീ മൂന്ന് പ്രദേശങ്ങളിൽ ഈ നികുതി ആനുകൂല്യം ബാധകമായിരിക്കില്ല. ഈ പ്രദേശങ്ങൾക്ക് ഫെഡറൽ ഗവൺമെന്റുമായി വേതന വർദ്ധനവിനായി പ്രത്യേക കരാറുകളുള്ളതുകൊണ്ടാണ് ഈ ആനുകൂല്യം ബാധകമല്ലാത്തത്.

എപ്പോൾ മുതൽ ലഭിക്കും?

PSWs 2027-ൽ നികുതി റിട്ടേൺ (Tax Return) ഫയൽ ചെയ്യുമ്പോൾ ആദ്യമായി ഈ ആനുകൂല്യം ക്ലെയിം ചെയ്യാൻ കഴിയും. ഈ ക്രെഡിറ്റ് ലഭിക്കാൻ PSW-മാർ ടാക്സ് റിട്ടേൺ ഫയൽ ചെയ്യേണ്ടത് നിർബന്ധമാണ്. കൂടാതെ, ഓരോ PSW-ന്റെയും യോഗ്യതയുള്ള വരുമാനം തൊഴിലുടമ സാക്ഷ്യപ്പെടുത്തുകയും വേണം. കാനഡയുടെ ആരോഗ്യപരിപാലന മേഖലയിലെ ഈ മുൻനിര തൊഴിലാളികൾക്ക് സാമ്പത്തിക ആശ്വാസം നൽകാനും, ജോലിയിൽ നിലനിർത്താനും, പുതിയ ആളുകളെ ആകർഷിക്കാനും ലക്ഷ്യമിട്ടുള്ള സുപ്രധാന നടപടിയാണ് ഈ നിർദ്ദേശം.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Tax credit for those working in this sector in Canada;