ചാർലറ്റ് ടൗൺ: വിദ്യാർത്ഥികൾക്കിടയിൽ സൈക്കിൾ സവാരി പ്രോത്സാഹിപ്പിക്കുന്നതിനായി പ്രിൻസ് എഡ്വേർഡ് ഐലൻഡിൽ ആരംഭിച്ച ‘ബൈക്ക് ബസ്’ പദ്ധതി ശ്രദ്ധേയമാകുന്നു. കുട്ടികൾ കൂട്ടമായി ഒന്നിച്ച് സൈക്കിൾ ചവിട്ടി സുരക്ഷിതമായി സ്കൂളിൽ പോകുന്ന രീതിയാണിത്. പരിസ്ഥിതി സംരക്ഷണം, മികച്ച വ്യായാമം, റോഡ് സുരക്ഷാ ബോധവൽക്കരണം എന്നിവ ലക്ഷ്യമിട്ടാണ് വിവിധ സ്കൂളുകളെ കേന്ദ്രീകരിച്ച് ഈ മാതൃകാപരമായ കൂട്ടായ്മ രൂപീകരിച്ചിരിക്കുന്നത്.
മുതിർന്ന സന്നദ്ധപ്രവർത്തകരുടെ മേൽനോട്ടത്തിലാണ് വിദ്യാർത്ഥികൾ നിശ്ചിത റൂട്ടുകളിലൂടെ സ്കൂളുകളിലേക്ക് യാത്ര ചെയ്യുന്നത്. മുൻകൂട്ടി നിശ്ചയിച്ച പാതയിലൂടെയുള്ള യാത്രയ്ക്കിടയിൽ കൂടുതൽ കുട്ടികൾ ഈ സംഘത്തോടൊപ്പം ചേരും. എഡ്മന്റൺ, ഗ്രേറ്റർ ടൊറന്റോ തുടങ്ങിയ നഗരങ്ങളിൽ വിജയകരമായി നടപ്പാക്കിയ ഈ പദ്ധതി ഇപ്പോൾ ചാർലറ്റ് ടൗണിലെ മൂന്ന് സ്കൂളുകളിലേക്ക് കൂടി വ്യാപിപ്പിച്ചിരിക്കുകയാണ്. വരും മാസങ്ങളിൽ കൂടുതൽ വിദ്യാലയങ്ങൾ ഇതിന്റെ ഭാഗമാകുമെന്നാണ് സംഘാടകർ വ്യക്തമാക്കുന്നത്. വാഹനത്തിരക്കേറിയ ആധുനിക കാലത്ത് കുട്ടികൾക്ക് ആത്മവിശ്വാസത്തോടെയും സുരക്ഷിതമായും യാത്ര ചെയ്യാൻ പദ്ധതി സഹായിക്കുന്നുണ്ടെന്ന് രക്ഷിതാക്കളും പറയുന്നു.
യാത്രയ്ക്കിടയിൽ കുട്ടികൾക്ക് റോഡ് നിയമങ്ങൾ ലളിതമായി പഠിക്കാനും പരസ്പര സൗഹൃദം വർദ്ധിപ്പിക്കാനും ബൈക്ക് ബസ് അവസരമൊരുക്കുന്നുണ്ട്. സിറ്റി ഓഫ് ചാർലറ്റ് ടൗണിന്റെയും പ്രാദേശിക കൂട്ടായ്മകളുടെയും പിന്തുണയോടെയാണ് പ്രവർത്തനം. ഇതിന്റെ ഭാഗമായി വരും വർഷങ്ങളിൽ സൈക്കിൾ യാത്രക്കാർക്കായി പ്രത്യേക പാതകളും കോൺക്രീറ്റ് സുരക്ഷാ വേലികളും ഉൾപ്പെടെയുള്ള അടിസ്ഥാന സൗകര്യങ്ങൾ നഗരത്തിൽ വികസിപ്പിക്കുമെന്നും പ്രവശ്യ ഭരണകൂടം അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Students commute to school by bicycle; 'Bike Bus' project makes a splash in Charlottetown
