മൊൺട്രിയൽ ട്രാൻസിറ്റ് അതോറിറ്റിയുടെ (STM) മെയിന്റനൻസ് ജീവനക്കാർ ഇന്ന് (തിങ്കളാഴ്ച) മുതൽ ഒരാഴ്ച നീളുന്ന പണിമുടക്ക് ആരംഭിച്ചു. രാവിലെ മുതൽ തന്നെ നഗരത്തിലെ ബസ്സ്, മെട്രോ സർവീസുകൾ കാര്യമായ തടസ്സം നേരിട്ട് വരികയാണ്. സി.എസ്.എന്നിന്റെ കീഴിലുള്ള സിൻഡിക്കേറ്റ് ഡു ട്രാൻസ്പോർട്ട് ഡി മൊൺട്രിയൽ ആണ് പണിമുടക്കിന് നേതൃത്വം നൽകുന്നത്. കരാർ സംബന്ധിച്ച തർക്കങ്ങളാണ് പണിമുടക്കിന് പിന്നിലെ പ്രധാന കാരണം.
ഈ പണിമുടക്ക് കാരണം പൊതുഗതാഗത സർവീസുകൾക്ക് സമയനിയന്ത്രണം ഏർപ്പെടുത്തിയിട്ടുണ്ട്. രാവിലെ 6:30 മുതൽ 9:38 വരെയും, ഉച്ചയ്ക്ക് 2:45 മുതൽ 5:48 വരെയും, രാത്രി 11:00 മുതൽ പുലർച്ചെ 1:00 വരെയും മാത്രമായിരിക്കും ബസ്, മെട്രോ സർവീസുകൾ ലഭ്യമാകുക. പ്രത്യേകിച്ച് ജൂൺ 9, 10, 11 തീയതികളിൽ ഗതാഗതക്കുരുക്കും ക്രമരഹിതമായ സർവീസുകളും ഉണ്ടാകാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി.
ഇന്ന് രാവിലെ നടന്ന വാർത്താ സമ്മേളനത്തിൽ യൂണിയൻ അവരുടെ ആവശ്യങ്ങൾ വിശദീകരിച്ചു. പണിമുടക്ക് ആരംഭിച്ചതിന്റെ ഭാഗമായി മെയിന്റനൻസ് ജീവനക്കാർ പ്രകടനങ്ങൾ നടത്തി. വരും ദിവസങ്ങളിലും ചർച്ചകളും പണിമുടക്കും തുടരുമെന്നും, ഇത് സംബന്ധിച്ചുള്ള പുതിയ വിവരങ്ങൾ യഥാസമയം പുറത്തുവിടുമെന്നും അധികൃതർ അറിയിച്ചു.
