സസ്കാച്ചവാൻ: കഴിഞ്ഞ വർഷം സസ്കാച്ചെവനിൽ ഉണ്ടായ കാട്ടുതീ ദുരന്തത്തെത്തുടർന്നുണ്ടായ വിമർശനങ്ങൾക്കിടെ, സസ്കാച്ചെവൻ പബ്ലിക് സേഫ്റ്റി ഏജൻസിയുടെ (SPSA) വൈസ് പ്രസിഡന്റ് സ്റ്റീവ് റോബർട്ട്സ് സ്ഥാനമൊഴിയുന്നു. ജൂൺ 30-ഓടെ അദ്ദേഹം ഔദ്യോഗികമായി വിരമിക്കുമെന്നാണ് ഏജൻസി അറിയിച്ചിരിക്കുന്നത്. ഇരുപതിലേറെ വർഷത്തെ സേവനത്തിന് ശേഷമാണ് അദ്ദേഹത്തിന്റെ പടിയിറക്കം.
കഴിഞ്ഞ വർഷത്തെ കാട്ടുതീ പ്രതിസന്ധിയെ കൈകാര്യം ചെയ്യുന്നതിൽ ഏജൻസി പരാജയപ്പെട്ടുവെന്ന് വ്യക്തമാക്കുന്ന സ്വതന്ത്ര റിപ്പോർട്ട് പുറത്തുവന്നതിന് പിന്നാലെയാണ് ഈ നടപടി. എം.എൻ.പി എന്ന കൺസൾട്ടിംഗ് സ്ഥാപനം നടത്തിയ പഠനത്തിൽ, അസാധാരണമായ തീപിടിത്തങ്ങളുടെ വ്യാപ്തിയെ നേരിടാൻ എസ്.പി.എസ്.എയ്ക്ക് സാധിച്ചില്ലെന്നും, ഏജൻസിയുടെ പ്രവർത്തനങ്ങളിൽ ഗുരുതരമായ വീഴ്ചകൾ സംഭവിച്ചുവെന്നും കണ്ടെത്തിയിരുന്നു.
കഴിഞ്ഞ വർഷം 514 തീപിടിത്തങ്ങളിലായി ഏകദേശം 2.9 ദശലക്ഷം ഹെക്ടർ വനഭൂമിയാണ് കത്തിനശിച്ചത്. പതിനായിരത്തിലധികം ആളുകളെ വീടുകളിൽ നിന്ന് ഒഴിപ്പിക്കേണ്ടി വന്നു. തങ്ങളുടെ വീടുകൾ നഷ്ടപ്പെട്ട നാട്ടുകാർ ഉൾപ്പെടെയുള്ളവർ ഏജൻസി നേതൃത്വത്തിന്റെ രാജിക്കായി നേരത്തെ തന്നെ ആവശ്യപ്പെട്ടിരുന്നു. ആശയവിനിമയത്തിലും ഏകോപനത്തിലും വലിയ പാളിച്ചകൾ ഉണ്ടായെന്നും ഇത് സാധാരണക്കാരുടെ ജീവിതത്തെ പ്രതികൂലമായി ബാധിച്ചുവെന്നും സർക്കാർ തന്നെ സമ്മതിച്ചിരുന്നു.
ദുരന്തത്തെത്തുടർന്ന് സർക്കാർ നിയോഗിച്ച വിദഗ്ധ സമിതി മുന്നോട്ടുവെച്ച 11 സുപ്രധാന നിർദ്ദേശങ്ങൾ നടപ്പിലാക്കാനുള്ള പ്രവർത്തനങ്ങൾ ആരംഭിച്ചിട്ടുണ്ട്. ഇതിനായി പുതിയ വൈസ് പ്രസിഡന്റിനെ ഉടൻ തന്നെ കണ്ടെത്തുമെന്ന് ഏജൻസി അറിയിച്ചു. കാട്ടുതീ മുൻകൂട്ടി കാണാനും, ഒഴിപ്പിക്കൽ നടപടികൾ കൂടുതൽ കാര്യക്ഷമമാക്കാനും, ഏജൻസികൾ തമ്മിലുള്ള ആശയവിനിമയം ശക്തമാക്കാനും ഈ പുതിയ പദ്ധതി ലക്ഷ്യമിടുന്നു.
SPSA vice-president stepping down following wildfire review
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
