മധ്യ സ്‌പെയിനിലെ തൊലേദോ പ്രവിശ്യയിൽ രണ്ട് അതിവേഗ ട്രെയിനുകൾ കൂട്ടിയിടിച്ച് ഉണ്ടായ ദാരുണമായ അപകടത്തിൽ ചുരുങ്ങിയത് 30 പേർ മരണപ്പെടുകയും നിരവധി പേർക്ക് പരിക്കേൽക്കുകയും ചെയ്തു. നിറുത്തിയിട്ടിരുന്ന ട്രെയിനിന്റെ പിൻഭാഗത്തേക്ക് അതേ ദിശയിൽ സഞ്ചരിക്കുകയായിരുന്ന മറ്റൊരു അതിവേഗ ട്രെയിൻ ഇടിച്ചുകയറിയാണ് അപകടമുണ്ടായത്. തലസ്ഥാനമായ മാഡ്രിഡിൽ നിന്ന് സെവിയ്യയിലേക്ക് നൂറുകണക്കിന് യാത്രക്കാരുമായി പോകുകയായിരുന്ന ട്രെയിനുകളാണ് ഊർദയ്ക്കും ലോസ് യെബെനെസിനും ഇടയിലുള്ള തുറസ്സായ പാതയിൽ അപകടത്തിൽപ്പെട്ടത്. കൂട്ടിയിടിയുടെ ആഘാതത്തിൽ ട്രെയിനിന്റെ രണ്ട് ബോഗികൾ പാളം തെറ്റി തകരുകയും അവശിഷ്ടങ്ങൾ പരിസരമാകെ ചിതറിത്തെറിക്കുകയും ചെയ്തു.
സ്‌പെയിൻ സർക്കാരിന്റെ ഉടമസ്ഥതയിലുള്ള ‘റെൻഫെ’ (RENFE), ഇറ്റാലിയൻ ഉടമസ്ഥതയിലുള്ള സ്വകാര്യ കമ്പനിയായ ‘ഇറിയോ’ (IRYO) എന്നിവയുടെ ട്രെയിനുകളാണ് അപകടത്തിൽ ഉൾപ്പെട്ടത്. റെൻഫെ ട്രെയിനിൽ 397 യാത്രക്കാരും ഇറിയോ ട്രെയിനിൽ 147 യാത്രക്കാരും ഉണ്ടായിരുന്നു. അപകടത്തെത്തുടർന്ന് മാഡ്രിഡ്, സിയുഡാഡ് റിയൽ, അൻഡലൂസിയ മേഖലകൾ തമ്മിലുള്ള റെയിൽ ഗതാഗതം പൂർണ്ണമായും നിർത്തിവെച്ചതായി സ്‌പാനിഷ് റെയിൽവേ ഓപ്പറേറ്ററായ അഡിഫ് (ADIF) അറിയിച്ചു. അപകടകാരണം വ്യക്തമല്ലെന്നും സുരക്ഷാ പ്രോട്ടോക്കോളുകൾ പാലിച്ച് അന്വേഷണവുമായി സഹകരിക്കുമെന്നും ഇറിയോ അധികൃതർ അറിയിച്ചു.
അപകടസ്ഥലത്ത് അഗ്നിശമന സേന, പോലീസ്, സൈനിക എമർജൻസി ബ്രിഗേഡ് എന്നിവരുടെ നേതൃത്വത്തിൽ യുദ്ധകാലാടിസ്ഥാനത്തിൽ രക്ഷാപ്രവർത്തനം പുരോഗമിക്കുകയാണ്. തകർന്ന ബോഗികളിൽ കുടുങ്ങിക്കിടക്കുന്നവരെ പുറത്തെടുക്കുന്നതിനാണ് പ്രഥമ പരിഗണന നൽകുന്നതെന്നും പരിക്കേറ്റവരെ സമീപത്തെ വിവിധ ആശുപത്രികളിലേക്ക് മാറ്റുകയാണെന്നും ആരോഗ്യമന്ത്രി മോണിക്ക ഗാർസിയ വ്യക്തമാക്കി. പരിക്കേറ്റവരെ പ്രവേശിപ്പിക്കുന്നതിനായി സമീപ നഗരമായ ഊർദയിലെ കായിക കേന്ദ്രം അടിയന്തരമായി സജ്ജീകരിക്കാൻ അധികൃതർ നിർദ്ദേശം നൽകിയിട്ടുണ്ട്. സ്‌പാനിഷ് പ്രധാനമന്ത്രി പെഡ്രോ സാഞ്ചസ് ഔദ്യോഗിക പരിപാടികൾ റദ്ദാക്കി ദുരന്തത്തിൽ അനുശോചനം രേഖപ്പെടുത്തുകയും രക്ഷാപ്രവർത്തനങ്ങൾക്ക് പൂർണ്ണ പിന്തുണ പ്രഖ്യാപിക്കുകയും ചെയ്തു.
ഈ വർഷം സ്‌പെയിനിൽ നടക്കുന്ന രണ്ടാമത്തെ വലിയ ട്രെയിൻ ദുരന്തമാണിത്. കഴിഞ്ഞ ജനുവരിയിൽ തെക്കൻ സ്‌പെയിനിൽ ട്രെയിൻ പാളം തെറ്റി മറ്റൊരു ട്രെയിനുമായി കൂട്ടിയിടിച്ച് 45 പേർ കൊല്ലപ്പെട്ടിരുന്നു. ലോകോത്തരമെന്ന് രാജ്യം അവകാശപ്പെടുന്ന അതിവേഗ റെയിൽവേ ശൃംഖലയുടെ സുരക്ഷയെക്കുറിച്ചും അറ്റകുറ്റപ്പണികളെക്കുറിച്ചും ജനങ്ങൾക്കിടയിലും രാഷ്ട്രീയ വൃത്തങ്ങളിലും വലിയ ആശങ്കകളും വിമർശനങ്ങളും ഉയർത്താൻ പുതിയ ദുരന്തം വഴിവെച്ചിരിക്കുകയാണ്.
Spain High-Speed Train Crash: Death Toll Exceeds 30
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
