കുവൈത്ത് സിറ്റി: കുവൈത്തിലെ പൊതുആരോഗ്യ മേഖലയിൽ സേവനമനുഷ്ഠിക്കുന്ന നഴ്സിംഗ്, മിഡ്വൈഫറി ജീവനക്കാരുടെ സാമ്പത്തിക ആനുകൂല്യങ്ങളും വിവിധ പ്രതിമാസ അലവൻസുകളും വർധിപ്പിച്ചുകൊണ്ട് കുവൈത്ത് ആരോഗ്യ മന്ത്രാലയം ഔദ്യോഗിക ഉത്തരവ് പുറപ്പെടുവിച്ചു. കുവൈത്ത് ആരോഗ്യ മന്ത്രി ഡോ. അഹമ്മദ് അൽ അവാദി ഒപ്പുവെച്ച ഉത്തരവിലാണ് ആനുകൂല്യങ്ങൾ പുതുക്കി നിശ്ചയിച്ചത്. തസ്തികകൾ, തൊഴിൽ പരിചയം, പ്രൊമോഷനുകൾ എന്നിവയുടെ അടിസ്ഥാനത്തിലാണ് കുവൈത്ത് പൗരന്മാർക്കും വിദേശികളായ ജീവനക്കാർക്കും ഒരുപോലെ പ്രയോജനപ്പെടുന്ന രീതിയിലുള്ള അലവൻസ് വർധനവ് നടപ്പിലാക്കിയിരിക്കുന്നത്. ആരോഗ്യ മേഖലയുടെ നിലവാരം മെച്ചപ്പെടുത്തുന്നതിനും അതോടൊപ്പം തന്നെ വൈദഗ്ധ്യമുള്ള ജീവനക്കാരെ രാജ്യത്തേക്ക് ആകർഷിക്കുന്നതിനും നിലനിർത്തുന്നതിനുമാണ് ഈ സുപ്രധാന തീരുമാനത്തിലൂടെ മന്ത്രാലയം ലക്ഷ്യമിടുന്നത്.
പുതിയ ഉത്തരവ് അനുസരിച്ച് നഴ്സിംഗ് മേഖലയിലുള്ളവരുടെ ജോലി സ്വഭാവ അലവൻസ്, ജോബ് ലെവൽ ബോണസ്, പ്രോത്സാഹന അലവൻസ്, ജീവിതച്ചെലവ്, ഷിഫ്റ്റ് അലവൻസ്, സൂപ്പർവിഷൻ അലവൻസ്, ട്രെയിനിംഗ് അലവൻസ്, ഓൺ-കോൾ അലവൻസ് എന്നിവ ഉൾപ്പെടുന്ന പ്രതിമാസ ആനുകൂല്യങ്ങളിലാണ് പ്രധാനമായും വർധനവ് വരുത്തിയിട്ടുള്ളത്. സ്വദേശികളായ ഹെഡ് നഴ്സിംഗ് സ്പെഷ്യലിസ്റ്റുകൾക്ക് പ്രതിമാസം 1,510 ദിനാറും, സീനിയർ സ്പെഷ്യലിസ്റ്റുകൾക്ക് 1,430 ദിനാറും, സ്പെഷ്യലിസ്റ്റുകൾക്ക് 1,350 ദിനാറും ലഭ്യമാകും. കൂടാതെ സീനിയർ നഴ്സുമാർക്ക് 1,170 ദിനാറും നഴ്സുമാർക്ക് 1,110 ദിനാറും അസിസ്റ്റന്റ് നഴ്സുമാർക്ക് 1,040 ദിനാറുമാണ് പുതിയ നിരക്കുകൾ പ്രകാരം നിർണയിച്ചിട്ടുള്ളത്. ജീവനക്കാരുടെ സാങ്കേതിക നിലവാരം ഉയർത്തുന്നതിനും ഏകീകൃത തൊഴിൽ ക്രമീകരണങ്ങൾ നടപ്പിലാക്കുന്നതിനും ആവശ്യമായ നിർദ്ദേശങ്ങളും ഈ ഉത്തരവിലൂടെ മുന്നോട്ട് വെച്ചിട്ടുണ്ട്.
കുവൈത്തിൽ സേവനമനുഷ്ഠിക്കുന്ന മലയാളികൾ അടക്കമുള്ള വിദേശി നഴ്സിംഗ് സമൂഹത്തിനും ഈ ആനുകൂല്യ വർധനവിന്റെ വ്യക്തമായ പ്രയോജനം ലഭിക്കും. കുവൈത്ത് പൗരന്മാരല്ലാത്ത സീനിയർ നഴ്സിംഗ് സർവീസ് ടെക്നീഷ്യൻമാർക്ക് കാറ്റഗറി എ-യ്ക്ക് 130 ദിനാറും കാറ്റഗറി ബി-യ്ക്ക് 90 ദിനാറും വർക്ക് നേച്ചർ അലവൻസായി അനുവദിച്ചിട്ടുണ്ട്. ഇതിന് പുറമെ 60 ദിനാർ ജോബ് ലെവൽ ബോണസ്, 50 ദിനാർ ജീവിതച്ചെലവ് അലവൻസ്, 100 ദിനാർ ഓൺ-കോൾ അലവൻസ് എന്നിവയും വിദേശി സീനിയർ ടെക്നീഷ്യൻമാർക്ക് ഇനി മുതൽ ലഭിക്കും. നഴ്സിംഗ് സർവീസ് ടെക്നീഷ്യൻ വിഭാഗത്തിൽപ്പെടുന്ന വിദേശികൾക്ക് കാറ്റഗറി എ-യ്ക്ക് 110 ദിനാറും കാറ്റഗറി ബി-യ്ക്ക് 80 ദിനാറും വർക്ക് നേച്ചർ അലവൻസിന് പുറമെ 50 ദിനാർ വീതം ജോബ് ലെവൽ ബോണസും ജീവിതച്ചെലവ് അലവൻസും 100 ദിനാർ ഓൺ-കോൾ അലവൻസും ലഭിക്കുന്ന തരത്തിലാണ് പുതിയ തുക ക്രമീകരിച്ചിരിക്കുന്നത്.
ഉന്നത വിദ്യാഭ്യാസ ബിരുദമുള്ള ആരോഗ്യ പ്രവർത്തകർക്കായി പ്രത്യേക അക്കാദമിക് ബോണസുകളും പുതിയ ഉത്തരവിൽ ഉൾപ്പെടുത്തിയിട്ടുണ്ട്. നഴ്സിംഗിലോ മിഡ്വൈഫറിയിലോ സ്പെഷ്യലൈസ് ചെയ്ത യൂണിവേഴ്സിറ്റി ബിരുദമുള്ള കുവൈത്തി ജീവനക്കാർക്ക് അവരുടെ തസ്തികയ്ക്ക് അനുസരിച്ച് 100 ദിനാർ മുതൽ 500 ദിനാർ വരെ അധിക ബോണസായി ലഭിക്കും. ഇതുകൂടാതെ ഉന്നത വിദ്യാഭ്യാസ യോഗ്യതയുള്ള കുവൈത്തി നഴ്സുമാർക്ക് ഡോക്ടറേറ്റിന് 150 ദിനാറും മാസ്റ്റേഴ്സ് ബിരുദത്തിന് 75 ദിനാറും പ്രതിമാസം അനുവദിക്കും. കുവൈത്തേതര ജീവനക്കാർക്ക് ഡോക്ടറേറ്റിന് 50 ദിനാറും മാസ്റ്റേഴ്സിന് 25 ദിനാറുമാണ് അക്കാദമിക് ആനുകൂല്യം. ഈ പ്രത്യേക ആനുകൂല്യങ്ങൾക്ക് അർഹത നേടുന്നതിന് ഉദ്യോഗാർത്ഥികളുടെ അക്കാദമിക് സർട്ടിഫിക്കറ്റുകൾ കുവൈത്ത് ആരോഗ്യ മന്ത്രാലയവും വിദ്യാഭ്യാസ വകുപ്പും ഔദ്യോഗികമായി അംഗീകരിച്ചതും നഴ്സിംഗ് മേഖലയുമായി നേരിട്ട് ബന്ധപ്പെട്ടതുമായിരിക്കണം എന്ന് ഉത്തരവിൽ പ്രത്യേകമായി വ്യക്തമാക്കുന്നുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Significant increase in benefits for nursing staff in Kuwait; Ministry of Health issues new order.
