ഒട്ടാവ: മാനസികാരോഗ്യ ചികിത്സാ രംഗത്ത് വിദഗ്ധരായ തെറാപ്പിസ്റ്റുകളുടെ കുറവ് രോഗികളെ പ്രതിസന്ധിയിലാക്കുന്നതായി റിപ്പോർട്ട്. പൊതുജനാരോഗ്യ സംവിധാനത്തിൽ ആവശ്യത്തിന് വിദഗ്ധരില്ലാത്തതും, സ്വകാര്യ മേഖലയിൽ മതിയായ പ്രായോഗിക പരിശീലനമില്ലാത്തവർ കടന്നുവരുന്നതും ചികിത്സയുടെ ഗുണനിലവാരത്തെ ബാധിക്കുന്നതായി ആരോഗ്യ മേഖലയിലെ വിദഗ്ധർ മുന്നറിയിപ്പ് നൽകുന്നു. പുതുവർഷത്തിൽ കൂടുതൽ ആളുകൾ മാനസികാരോഗ്യ സേവനങ്ങൾ തേടി എത്തുന്ന സാഹചര്യത്തിലാണ് ഈ വെളിപ്പെടുത്തൽ.
മുൻകാലങ്ങളിൽ പൊതുജനാരോഗ്യ കേന്ദ്രങ്ങളിൽ ദീർഘകാലം പരിശീലനവും മേൽനോട്ടവും ലഭിച്ച ശേഷമാണ് തെറാപ്പിസ്റ്റുകൾ സ്വകാര്യ പ്രാക്ടീസ് ആരംഭിച്ചിരുന്നത്. എന്നാൽ കോവിഡ് കാലത്തിന് ശേഷം ഈ രീതിയിൽ മാറ്റം വന്നതായി ‘കനേഡിയൻ അസോസിയേഷൻ ഫോർ കപ്പിൾ ആൻഡ് ഫാമിലി തെറാപ്പി’ പ്രസിഡന്റ് ആൻഡ്രൂ സോഫിൻ ചൂണ്ടിക്കാട്ടി. ഉന്നത പഠനം കഴിഞ്ഞയുടൻ മതിയായ പ്രായോഗിക പരിചയമില്ലാതെ പലരും നേരിട്ട് സ്വകാര്യ ചികിത്സാ രംഗത്തേക്ക് പ്രവേശിക്കുന്നത് രോഗികൾക്ക് ഗുണകരമാകില്ലെന്ന് അദ്ദേഹം പറഞ്ഞു.
കാനഡയിലെ വിവിധ പ്രവിശ്യകളിൽ തെറാപ്പിസ്റ്റുകൾക്ക് വ്യത്യസ്തമായ മാനദണ്ഡങ്ങളാണ് നിലവിലുള്ളത്. ഒന്റാറിയോ പോലുള്ള ഇടങ്ങളിൽ കർശനമായ നിയന്ത്രണങ്ങളുണ്ടെങ്കിലും ബി.സി, സസ്കാച്ചെവാൻ തുടങ്ങിയ പ്രവിശ്യകളിൽ ‘തെറാപ്പിസ്റ്റ്’ അല്ലെങ്കിൽ ‘കൗൺസിലർ’ എന്ന പദവി ഉപയോഗിക്കുന്നതിന് കൃത്യമായ നിയമപരമായ നിയന്ത്രണങ്ങളില്ല. ഇത് ഏത് വിദഗ്ധനെ സമീപിക്കണം എന്ന കാര്യത്തിൽ സാധാരണക്കാരിൽ ആശയക്കുഴപ്പമുണ്ടാക്കുന്നു. കുടുംബ പ്രശ്നങ്ങൾ, ലഹരിവിമോചനം തുടങ്ങിയ പ്രത്യേക മേഖലകളിൽ വൈദഗ്ധ്യമില്ലാത്തവർ ചികിത്സ നൽകുന്നത് ഗുണത്തേക്കാളേറെ ദോഷം ചെയ്യുമെന്ന് വിദഗ്ധർ ഓർമ്മിപ്പിക്കുന്നു.
ചികിത്സ തേടുന്നതിന് മുൻപ് തെറാപ്പിസ്റ്റിന്റെ യോഗ്യത, പരിശീലനം, ഔദ്യോഗിക അംഗീകാരങ്ങൾ എന്നിവ ചോദിച്ചറിയണമെന്ന് സെന്റർ ഓഫ് അഡിക്ഷൻ ആൻഡ് മെന്റൽ ഹെൽത്തിലെ (CAMH) മുതിർന്ന ശാസ്ത്രജ്ഞ ഷെല്ലി മക്മെയ്ൻ നിർദ്ദേശിച്ചു. ആദ്യത്തെ കുറച്ച് സെഷനുകൾക്ക് ശേഷം മാറ്റങ്ങളൊന്നും പ്രകടമാകുന്നില്ലെങ്കിൽ മറ്റൊരു വിദഗ്ധനെ തേടുന്നതിൽ തെറ്റില്ലെന്നും, ചികിത്സാ ബന്ധത്തിൽ വിശ്വാസവും പുരോഗതിയും പ്രധാനമാണെന്നും വിദഗ്ധർ ചൂണ്ടിക്കാട്ടി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Shortage of skilled therapists: Ensure qualifications before seeking counseling; Health experts offer suggestions
