ഒട്ടാവ: സസ്കാച്ചുവാനിൽ ജനവാസ മേഖലയിലുണ്ടായ വെടിവെപ്പിൽ യുവാവിന് പരിക്ക്. യെല്ലോ ക്വിൽ ഫസ്റ്റ് നേഷൻ കമ്മ്യൂണിറ്റിയിൽ ശനിയാഴ്ച പുലർച്ചെയായിരുന്നു സംഭവം. വെടിവെപ്പിന് ശേഷം അക്രമി സംഭവസ്ഥലത്തുണ്ടായിരുന്ന കാറിന് തീയിട്ടതായും പോലീസ് സ്ഥിരീകരിച്ചു. സംഭവത്തിൽ യെല്ലോ ക്വിൽ ഫസ്റ്റ് നേഷൻ സ്വദേശിയായ കെയ്ൻ ചീച്ചൻ (26) എന്ന യുവാവിനായി റോയൽ കനേഡിയൻ മൗണ്ടഡ് പോലീസ് (RCMP) തെരച്ചിൽ ശക്തമാക്കി.
ശനിയാഴ്ച പുലർച്ചെ പ്രാദേശിക സമയം 4:35 ഓടെയാണ് വെടിവെപ്പ് സംബന്ധിച്ച വിവരം പോലീസിന് ലഭിക്കുന്നത്. സസ്കാറ്റൂണിൽ നിന്നും ഏകദേശം 300 കിലോമീറ്റർ കിഴക്കുമാറി സ്ഥിതി ചെയ്യുന്ന യെല്ലോ ക്വിൽ ഫസ്റ്റ് നേഷൻ കമ്മ്യൂണിറ്റിയിലെ ഒരു വീടിന് പുറത്താണ് പരിക്കേറ്റ നിലയിൽ യുവാവിനെ കണ്ടെത്തിയത്. റോസ് വാലി ഡിറ്റാച്ച്മെന്റിൽ നിന്നുള്ള പോലീസ് ഉദ്യോഗസ്ഥർ ഉടൻ തന്നെ സ്ഥലത്തെത്തി പരിക്കേറ്റയാളെ ആശുപത്രിയിലേക്ക് മാറ്റി. ഇയാളുടെ പരിക്ക് ഗുരുതരമല്ലെന്നാണ് ആരോഗ്യവിഭാഗം നൽകുന്ന വിവരം.
അക്രമം നടന്ന വീടിന് സമീപത്തുനിന്നും തീപിടിച്ച് നശിച്ച നിലയിൽ ഒരു വാഹനവും പോലീസ് കണ്ടെടുത്തു. പോലീസ് എത്തുന്നതിന് തൊട്ടുമുമ്പ് തന്നെ പ്രതി സംഭവസ്ഥലത്തുനിന്നും രക്ഷപ്പെട്ടിരുന്നു. ഇയാളെ കണ്ടെത്താനായി യോർക്ടൺ ആർസിഎംപി പോലീസ് ഡോഗ് സർവീസിന്റെ സഹായത്തോടെ പ്രദേശത്ത് വ്യാപകമായ തിരച്ചിൽ നടത്തിയെങ്കിലും കണ്ടെത്താനായില്ല. തുടർന്നാണ് പ്രതിക്കെതിരെ പോലീസ് അറസ്റ്റ് വാറന്റ് പുറപ്പെടുവിച്ചത്. അക്രമം നടത്താനുണ്ടായ കാരണത്തെക്കുറിച്ച് പോലീസ് അന്വേഷിച്ചുവരികയാണ്.
വധശ്രമം, മാരകായുധങ്ങൾ കൈവശം വെക്കൽ, അനുമതിയില്ലാതെ തോക്ക് ഉപയോഗിക്കൽ, വാഹനത്തിന് തീയിടൽ (ആർസൻ) ഉൾപ്പെടെയുള്ള നിരവധി ഗുരുതരമായ കുറ്റകൃത്യങ്ങളാണ് കെയ്ൻ ചീച്ചനെതിരെ ചുമത്തിയിട്ടുള്ളത്. അഞ്ചടി ഏഴിഞ്ച് ഉയരവും 176 പൗണ്ട് തൂക്കവുമുള്ള കെയ്ൻ ചീച്ചന് തവിട്ടുനിറമുള്ള കണ്ണുകളും കറുത്ത മുടിയുമാണുള്ളത്. പ്രതി സായുധനാകാൻ സാധ്യതയുള്ളതിനാൽ പൊതുജനങ്ങൾ ഇയാളുടെ അരികിലേക്ക് പോകരുതെന്നും, എന്തെങ്കിലും വിവരം ലഭിക്കുന്നവർ ഉടൻ തന്നെ പോലീസിനെ അറിയിക്കണമെന്നും ആർസിഎംപി മുന്നറിയിപ്പ് നൽകി.
Shooting in Saskatchewan: Car set on fire, young man injured
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
