ഒട്ടാവ : കാനഡയിലെ വിവിധ പ്രവിശ്യകളിൽ അന്തരീക്ഷ ആർദ്രതയും താപനിലയും കൂടിച്ചേർന്നുണ്ടാകുന്ന അസ്വസ്ഥത അളക്കുന്ന ഹ്യുമിഡെക്സ് സൂചിക 45 വരെ ഉയർന്നേക്കുമെന്ന് റിപ്പോർട്ടുകൾ വ്യക്തമാക്കുന്നു. കടുത്ത ഉഷ്ണതരംഗത്തെ തുടർന്ന് മാനിറ്റോബ, ക്യുബെക്, ഒന്റാറിയോ എന്നീ പ്രവിശ്യകളിൽ എൻവയോൺമെന്റ് കാനഡ അതീവ ജാഗ്രതാ നിർദേശം പുറപ്പെടുവിച്ചു. ചൊവ്വാഴ്ച ഒട്ടാവ, ടൊറന്റോ തുടങ്ങിയ നഗരങ്ങളിൽ പരമാവധി താപനില 37 ഡിഗ്രി സെൽഷ്യസ് വരെ ഉയരുമെന്നും ഹ്യുമിഡെക്സ് മൂലം ഇത് 45 ഡിഗ്രി സെൽഷ്യസിന് സമാനമായ ചൂടായി അനുഭവപ്പെടുമെന്നും അധികൃതർ അറിയിച്ചു.
ഒന്റാറിയോയിലെ ഹാമിൽട്ടൺ, ലണ്ടൻ, വിൻഡ്സർ തുടങ്ങിയ നഗരങ്ങളിലും സമാനമായ ഉയർന്ന താപനില അനുഭവപ്പെടും. വടക്കൻ നഗരങ്ങളായ തണ്ടർ ബേ, കെനോറ എന്നിവിടങ്ങളിൽ താപനില 35 ഡിഗ്രി സെൽഷ്യസും ഹ്യുമിഡെക്സ് 40-ഉം രേഖപ്പെടുത്തിയേക്കാം. ഉഷ്ണതരംഗം ആരോഗ്യത്തെ ബാധിക്കുമെന്നതിനാൽ ജനങ്ങൾ മുൻകരുതലുകൾ സ്വീകരിക്കണമെന്ന് എൻവയോൺമെന്റ് കാനഡ മുന്നറിയിപ്പ് നൽകി.
വടക്കൻ ഒന്റാറിയോയിലെ ആംസ്ട്രോങ്ങിൽ തിങ്കളാഴ്ച താപനില 40.7 ഡിഗ്രി സെൽഷ്യസ് രേഖപ്പെടുത്തിയിരുന്നു. ഇത് കഴിഞ്ഞ 90 വർഷത്തിനിടെ പ്രവിശ്യയിൽ രേഖപ്പെടുത്തിയ ഏറ്റവും ഉയർന്ന താപനിലയാണെന്ന് ദി വെതർ നെറ്റ്വർക്ക് വ്യക്തമാക്കുന്നു.
ടൊറന്റോയിൽ ഇതിനുമുൻപ് ജൂലൈ 14-ന് രേഖപ്പെടുത്തിയ ഏറ്റവും ഉയർന്ന താപനില 1995-ലെ 36.8 ഡിഗ്രി സെൽഷ്യസ് ആയിരുന്നു. സെൻട്രൽ, വടക്കുകിഴക്കൻ ഒന്റാറിയോ പ്രദേശങ്ങളിൽ ചൊവ്വാഴ്ച രാത്രിയോടെ ചൂടിന് നേരിയ ശമനമുണ്ടാകുമെങ്കിലും തെക്കൻ ഒന്റാറിയോയിൽ ബുധൻ അല്ലെങ്കിൽ വ്യാഴം വരെ ഉയർന്ന താപനില തുടരുമെന്നാണ് വെതർ സ്പെഷ്യലിസ്റ്റ് ജെസ് സ്മിത്തിന്റെ വിലയിരുത്തൽ.
വടക്കൻ മാനിറ്റോബയിലെ നോർവേ ഹൗസ്, ഫ്ലിൻ ഫ്ലോൺ എന്നീ കമ്മ്യൂണിറ്റികളിലും വെസ്റ്റേൺ ക്യുബെക്കിലെ മാറ്റഗാമി, വേക്ക്ഫീൽഡ്, റൂയിൻ, ഗാറ്റിനോ തുടങ്ങിയ പ്രദേശങ്ങളിലും ഉയർന്ന താപനിലയെ തുടർന്ന് മുന്നറിയിപ്പ് പുറപ്പെടുവിച്ചിട്ടുണ്ട്. നോർത്ത് വെസ്റ്റ് ടെറിട്ടറീസിലെ ഫോർട്ട് സിംപ്സൺ, ഹേ റിവർ എന്നിവിടങ്ങളിൽ പകൽ താപനില 30 ഡിഗ്രി സെൽഷ്യസിന് അടുത്തെത്തിയേക്കാം. ഇവിടെ പകൽ സമയത്തെ കടുത്ത ചൂട് വാരാന്ത്യം വരെ തുടരുമെന്നാണ് റിപ്പോർട്ടുകൾ സൂചിപ്പിക്കുന്നത്.
കടുത്ത ചൂടിനൊപ്പം കാട്ടുതീ പടരുന്നതും മാനിറ്റോബ, ഒന്റാറിയോ, നോർത്ത് വെസ്റ്റ് ടെറിട്ടറീസ് എന്നിവിടങ്ങളിലെ വായുനിലവാരത്തെ ദോഷകരമായി ബാധിച്ചിട്ടുണ്ട്. വായു മലിനീകരണം കൂടിയ നഗരങ്ങളുടെ ആഗോള പട്ടികയിൽ IQAir കണക്കുകൾ പ്രകാരം ടൊറന്റോ 31-ാം സ്ഥാനത്തും മോൺട്രിയൽ 47-ാം സ്ഥാനത്തും വാൻകൂവർ 102-ാം സ്ഥാനത്തുമാണ് നിലവിലുള്ളത്. പുകപടലങ്ങൾ കാരണം വായുനിലവാരം കുറയുന്ന സാഹചര്യത്തിൽ ജനങ്ങൾ പുറംവേദികളിലെ കായിക വിനോദങ്ങളും മറ്റ് പരിപാടികളും പരിമിതപ്പെടുത്തണമെന്ന് എൻവയോൺമെന്റ് കാനഡ നിർദേശിച്ചു.
Severe heat wave in various provinces of Canada; Humidex index may rise to 45, warning
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
