മോങ്ക്ടൺ : കാനഡയുടെ വനവൈവിധ്യം വിളിച്ചോതി ആർട്ടെമിസ് II ചന്ദ്രദൗത്യം പ്രയാണം തുടരുന്നു. ജെറമി ഹാൻസൻ ഉൾപ്പെടെയുള്ള നാലംഗ സംഘത്തോടൊപ്പം കാനഡയിലെ വനങ്ങളിൽ നിന്നുള്ള 2,500 വൃക്ഷവിത്തുകളാണ് ബഹിരാകാശ പേടകത്തിലുള്ളത്. ഫ്രെഡറിക്ടണിലെ നാഷണൽ ട്രീ സീഡ് സെന്റർ തിരഞ്ഞെടുത്ത ലോഡ്ജ്പോൾ പൈൻ, ഈസ്റ്റേൺ വൈറ്റ് സിഡാർ, റെഡ് മേപ്പിൾ, വൈറ്റ് ബിർച്ച്, ഈസ്റ്റേൺ വൈറ്റ് പൈൻ എന്നീ അഞ്ചിനം വിത്തുകളാണ് ദൗത്യത്തിൽ ഉൾപ്പെടുത്തിയിരിക്കുന്നത്. കാലാവസ്ഥാ വ്യതിയാനം വനമേഖലയിൽ സൃഷ്ടിക്കുന്ന പ്രത്യാഘാതങ്ങളെക്കുറിച്ച് ആഗോളതലത്തിൽ അവബോധം വളർത്തുക എന്നതാണ് ഇതിലൂടെ ലക്ഷ്യമിടുന്നതെന്ന് കനേഡിയൻ ഫോറസ്റ്റ് സർവീസ് വ്യക്തമാക്കി.
കാലാവസ്ഥാ വ്യതിയാനം, അധിനിവേശ വർഗ്ഗങ്ങളുടെ വ്യാപനം, ആവാസവ്യവസ്ഥയുടെ നാശം എന്നിവ കാനഡയിലെ വനങ്ങളെ ബാധിക്കുന്നതായി നാഷണൽ ട്രീ സീഡ് സെന്റർ കോർഡിനേറ്റർ ഡാരൻ ഡെർബോവ്ക വ്യക്തമാക്കി. കാനഡയിലെ തദ്ദേശീയ വൃക്ഷങ്ങളിൽ 25 ശതമാനവും നിലവിൽ വംശനാശഭീഷണി നേരിടുകയാണെന്ന് അദ്ദേഹം അറിയിച്ചു. ഈ സാഹചര്യത്തിൽ വൃക്ഷ സംരക്ഷണത്തിന്റെ പ്രാധാന്യം ഉയർത്തിക്കാട്ടാനാണ് ചരിത്രപരമായ ഈ ബഹിരാകാശ ദൗത്യത്തെ ഉപയോഗപ്പെടുത്തുന്നത്. കഴിഞ്ഞ ഓഗസ്റ്റിൽ ക്യൂബെക്കിലെ ലോറൻഷ്യൻ ഫോറസ്ട്രി സെന്റർ മുന്നോട്ടുവെച്ച നിർദ്ദേശത്തെത്തുടർന്നാണ് വിത്തുകൾ ദൗത്യത്തിന്റെ ഭാഗമായത്.
ബഹിരാകാശ യാത്രയ്ക്ക് ശേഷം തിരികെ എത്തിക്കുന്ന വിത്തുകൾ ഫ്രെഡറിക്ടണിലെ കേന്ദ്രത്തിൽ സൂക്ഷ്മപരിശോധനയ്ക്ക് വിധേയമാക്കും. ഭൂമിയിൽ തന്നെയുള്ള സമാനമായ വിത്തുകളുമായി ഇവ താരതമ്യം ചെയ്യുമെന്നും തുടർന്ന് മുളപ്പിച്ച് വളർത്തുമെന്നും അധികൃതർ അറിയിച്ചു. ഈ മരങ്ങൾ പിന്നീട് പൊതുജനങ്ങൾക്ക് കാണാൻ സാധിക്കുന്ന സ്ഥലങ്ങളിൽ നട്ടുപിടിപ്പിക്കാനാണ് അധികൃതർ പദ്ധതിയിടുന്നത്. വൃക്ഷ സംരക്ഷണ പ്രവർത്തനങ്ങൾക്ക് രാജ്യവ്യാപകമായി പ്രചോദനം നൽകാൻ ഈ ‘ബഹിരാകാശ വിത്തുകൾക്ക്’ സാധിക്കുമെന്ന് ഡാരൻ ഡെർബോവ്ക വിലയിരുത്തി.
Seeds on a historic journey: 2,500 tree seeds from Fredericton join the lunar mission
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
