തായ്‌ലാന്റിൽ സ്‌കൂളിൽ വെടിവെപ്പ്: ആറ് മരണം; നിരവധി പേർക്ക് പരിക്ക്, അക്രമി വിദ്യാർത്ഥി

ബാങ്കോക്ക്: തായ്‌ലാന്റിലെ ഹൈസ്കൂളിൽ വിദ്യാർത്ഥി നടത്തിയ വെടിവെപ്പിൽ ആറ് പേർ കൊല്ലപ്പെട്ടതായി റിപ്പോർട്ട്. ബാങ്കോക്കിന് സമീപമുള്ള നോന്തബുരി പ്രവിശ്യയിലെ ഡെബ്സിരിൻ നോന്തബുരി സ്കൂളിലാണ് വെള്ളിയാഴ്ച ദാരുണമായ സംഭവം നടന്നത്. ആക്രമണത്തിൽ നിരവധി പേർക്ക് പരിക്കേറ്റിട്ടുണ്ട്. സംഭവത്തിന് പിന്നാലെ പോലീസ് സ്ഥലത്തെത്തി കെട്ടിടത്തിൽ കുടുങ്ങിയ വിദ്യാർത്ഥികളെയും അധ്യാപകരെയും സുരക്ഷിതമായി പുറത്തെത്തിച്ചു.

ആക്രമണത്തെക്കുറിച്ചും ആളപായത്തെക്കുറിച്ചും വ്യക്തതയില്ലാത്തതും പരസ്പരവിരുദ്ധവുമായ വിവരങ്ങളാണ് നിലവിൽ പുറത്തുവരുന്നത്. മൂന്ന് അധ്യാപകരും മൂന്ന് വിദ്യാർത്ഥികളുമാണ് കൊല്ലപ്പെട്ടതെന്നും അക്രമി പരിക്കുകളോടെ ഗുരുതരാവസ്ഥയിൽ ആശുപത്രിയിലാണെന്നുമാണ് റോയൽ തായ് പോലീസ് വക്താവ് ത്രൈറോങ് പിവ്പാൻ വ്യക്തമാക്കിയത്. എന്നാൽ, അഞ്ച് അധ്യാപകർ കൊല്ലപ്പെട്ടെന്നും സ്കൂളിലേക്ക് എത്തുന്നതിന് മുമ്പ് അക്രമി സ്വന്തം വീട്ടിൽ വെച്ച് മുത്തശ്ശനെയും മുത്തശ്ശിയെയും വധിച്ചിരുന്നുവെന്നും ഡെപ്യൂട്ടി ആഭ്യന്തരമന്ത്രി പോലാപി സുവാൻചവി അറിയിച്ചു. ആക്രമണം നടത്തിയ വിദ്യാർത്ഥി ആശുപത്രിയിൽ വെച്ച് മരിച്ചതായും അദ്ദേഹം കൂട്ടിച്ചേർത്തു.

ആക്രമണത്തിൽ 22 പേർക്ക് പരിക്കേറ്റതായും ഇതിൽ ഒമ്പത് പേരുടെ നില ഗുരുതരമാണെന്നുമാണ് തായ്‌ലാന്റ് ആരോഗ്യ മന്ത്രി പട്ടണ പ്രോംഫാറ്റ് വ്യക്തമാക്കിയത്. ഭയന്നോടുന്നതിനിടയിൽ വീണും മറ്റും ആളുകൾക്ക് പരിക്കേറ്റിട്ടുണ്ടെന്നും ഇതിൽ എത്രപേർക്കാണ് വെടിയേറ്റതെന്ന് വ്യക്തമല്ലെന്നും അദ്ദേഹം പറഞ്ഞു. സ്വന്തം കുടുംബാംഗത്തിന്റെ തോക്കെടുത്താണ് വിദ്യാർത്ഥി സ്കൂളിലെത്തിയതെന്നാണ് പ്രാഥമിക നിഗമനം. ആക്രമണത്തിന്റെ യഥാർത്ഥ കാരണം കണ്ടെത്താൻ പോലീസ് അന്വേഷണം ഊർജ്ജിതമാക്കിയിട്ടുണ്ട്.

ദാരുണ സംഭവത്തിൽ തായ്‌ലാന്റ് പ്രധാനമന്ത്രി അനുതിൻ ചാർൺവിരകുൽ കടുത്ത അനുശോചനം രേഖപ്പെടുത്തി. ഇരയായവർക്കും അവരുടെ കുടുംബങ്ങൾക്കും ആവശ്യമായ എല്ലാവിധ സഹായങ്ങളും അടിയന്തരമായി നൽകാൻ ബന്ധപ്പെട്ട ഉദ്യോഗസ്ഥർക്ക് പ്രധാനമന്ത്രി നിർദേശം നൽകി. ദുരന്തത്തിന് പിന്നാലെ ഭീതിയിലായ വിദ്യാർത്ഥികളെയും ബന്ധുക്കളെയും ആശ്വസിപ്പിക്കാൻ വൻ ജനക്കൂട്ടമാണ് സ്കൂളിന് പുറത്ത് തടിച്ചുകൂടിയത്.

അടുത്തിടെയായി തായ്‌ലാന്റിൽ തോക്കുപയോഗിച്ചുള്ള അതിക്രമങ്ങൾ വർദ്ധിച്ചുവരുന്നത് വലിയ ആശങ്ക സൃഷ്ടിക്കുന്നുണ്ട്. കഴിഞ്ഞ ഫെബ്രുവരിയിൽ ദക്ഷിണ തായ്‌ലാന്റിലെ പബ്ലിക് ഹൈസ്കൂളിൽ 17-കാരൻ പോലീസിൽ നിന്ന് തോക്ക് മോഷ്ടിച്ച് നടത്തിയ വെടിവെപ്പിൽ ഒരാൾ കൊല്ലപ്പെടുകയും രണ്ടുപേർക്ക് പരിക്കേൽക്കുകയും ചെയ്തിരുന്നു. കൂടാതെ, 2023-ൽ ബാങ്കോക്കിലെ പ്രമുഖ ഷോപ്പിംഗ് മാളിൽ 14-കാരൻ നടത്തിയ വെടിവെപ്പും വലിയ വാർത്തയായിരുന്നു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

School shooting in Thailand: Six dead, many injured; attacker is a student.