ക്യുബെക്ക്: ക്യുബെക്കിലുണ്ടായ ദാരുണമായ ബസ് അപകടത്തിൽ ഒരു കൗമാരക്കാരൻ കൊല്ലപ്പെട്ടു. ശനിയാഴ്ച രാവിലെ ഷൗഡിയർ-അപ്പലാച്ചസ് മേഖലയിലുണ്ടായ അപകടത്തിൽ നിരവധി വിദ്യാർത്ഥികൾക്ക് പരിക്കേറ്റു. അമേരിക്കൻ അതിർത്തിക്ക് സമീപം ക്യുബെക് സിറ്റിയിൽ നിന്നും ഏകദേശം 130 കിലോമീറ്റർ അകലെയാണ് അപകടം നടന്നത്.
പ്രാദേശിക സമയം ശനിയാഴ്ച രാവിലെ 8:30-ഓടെ സെന്റ്-റോസ്-ഡി-വാട്ട്ഫോർഡിലെ റൂട്ട് ഡി ലാ ഗ്രാൻഡെ-ലിഗ്നെ നോർഡിലായിരുന്നു അപകടം. 18 യാത്രക്കാരുമായി തെക്ക് ദിശയിലേക്ക് സഞ്ചരിക്കുകയായിരുന്ന സ്കൂൾ ബസ് നിയന്ത്രണം വിട്ട് റോഡിൽ നിന്നും മറിഞ്ഞാണ് അപകടമുണ്ടായതെന്ന് സുറെറ്റെ ഡു ക്യുബെക് (SQ) പോലീസ് അറിയിച്ചു. പ്രാദേശികമായ ഒരു പരിപാടിയിൽ പങ്കെടുക്കാൻ പോവുകയായിരുന്നു ബസ്സിലുണ്ടായിരുന്ന കുട്ടികൾ.
അപകടത്തിൽ ഒരു കൗമാരക്കാരൻ സംഭവസ്ഥലത്തുതന്നെ മരിച്ചു. ബസ് ഡ്രൈവർ ഉൾപ്പെടെ നാല് പേർക്ക് ഗുരുതരമായി പരിക്കേറ്റിട്ടുണ്ട്. ഇവരെ ഉടൻതന്നെ സമീപത്തെ ആശുപത്രിയിൽ പ്രവേശിപ്പിച്ചു. എന്നാൽ ആരുടെയും പരിക്ക് നിലവിൽ ജീവന് ഭീഷണിയുള്ളതല്ലെന്ന് പോലീസ് വൃത്തങ്ങൾ വ്യക്തമാക്കി. മറ്റ് 15 യാത്രക്കാർക്കും നിസാര പരിക്കുകളുണ്ട്. ഇവർക്ക് പ്രാഥമിക ചികിത്സ നൽകി വരികയാണ്.
റോഡിലെ ഐസ് പാളികളാണ് അപകടത്തിന് കാരണമായതെന്നാണ് പ്രാഥമിക നിഗമനം. ഈ മേഖലയിൽ പെയ്ത മഴയും തണുപ്പും റോഡുകളെ അപകടകരമായ രീതിയിൽ വഴുക്കുള്ളതാക്കി മാറ്റിയിരുന്നു. ഇതാണോ ബസ് നിയന്ത്രണം വിടാൻ ഇടയാക്കിയതെന്ന് പോലീസ് വിശദമായി പരിശോധിച്ചു വരികയാണ്. ശനിയാഴ്ച ഉച്ചകഴിഞ്ഞും പോലീസ് സംഘം സ്ഥലത്തുണ്ടായിരുന്നു. അപകടത്തെക്കുറിച്ചുള്ള കൂടുതൽ വിവരങ്ങൾക്കായി പോലീസ് അന്വേഷണം തുടരുകയാണ്. മരിച്ച കുട്ടിയുടെ പേരോ മറ്റ് വിവരങ്ങളോ ഔദ്യോഗികമായി പുറത്തുവിട്ടിട്ടില്ല.
school-bus-chaudiere-appalaches-
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
