റജീന: കാനഡയിലെ ഊർജ്ജ ആവശ്യങ്ങൾ പരിഹരിക്കുന്നതിനായി വൻകിട ആണവ റിയാക്ടറുകൾ സ്ഥാപിക്കാനുള്ള ചരിത്രപരമായ നീക്കവുമായി സസ്കാച്ചവാൻ പ്രവിശ്യ. ചെറുകിട റിയാക്ടറുകൾക്കൊപ്പം (SMR) വലിയ തോതിലുള്ള വൈദ്യുതി ഉത്പാദന ശേഷിയുള്ള റിയാക്ടറുകളെയും ഉൾപ്പെടുത്തി പ്രവിശ്യയുടെ ഊർജ്ജ നയം പരിഷ്കരിക്കാനാണ് സർക്കാർ തീരുമാനം. കഴിഞ്ഞ ബുധനാഴ്ച സാസ്ക് പവർ (SaskPower) സിഇഒ രൂപൻ പാണ്ഡ്യയാണ് പ്രവിശ്യയുടെ ഭാവി സുരക്ഷിതമാക്കുന്നതിനുള്ള ഈ സുപ്രധാന പദ്ധതി പ്രഖ്യാപിച്ചത്. ലോകത്തിലെ യുറേനിയം സമ്പത്തിന്റെ നാലിലൊന്ന് കൈവശമുള്ള സസ്കാച്ചവാന് ഈ നീക്കം ആഗോള തലത്തിൽ തന്നെ വലിയ അവസരങ്ങൾ തുറന്നുനൽകുമെന്നാണ് വിലയിരുത്തപ്പെടുന്നത്.
സാങ്കേതിക വിദ്യ തിരഞ്ഞെടുക്കൽ ആദ്യ ഘട്ടം
പദ്ധതിയുടെ ഭാഗമായി ഏറ്റവും അനുയോജ്യമായ ആണവ സാങ്കേതിക വിദ്യ തിരഞ്ഞെടുക്കുന്ന പ്രവർത്തനങ്ങൾക്കാണ് നിലവിൽ തുടക്കമിട്ടിരിക്കുന്നത്. 650 മെഗാവാട്ട് മുതൽ 1400 മെഗാവാട്ട് വരെ ശേഷിയുള്ള മൂന്ന് രൂപകൽപ്പനകളാണ് നിലവിൽ സർക്കാരിന്റെ പരിഗണനയിലുള്ളതെന്ന് സാസ്ക് പവറിന്റെ ചുമതലയുള്ള മന്ത്രി ജെറമി ഹാരിസൺ വ്യക്തമാക്കി.
എസ്റ്റെവൻ മേഖലയിൽ ചെറുകിട റിയാക്ടറുകൾക്കായി നേരത്തെ കണ്ടെത്തിയ രണ്ട് സ്ഥലങ്ങൾക്ക് പുറമെ, വൻകിട പദ്ധതികൾക്കായി പുതിയ മേഖലകളും പരിശോധിക്കും. ഖനികളിൽ നിന്ന് ലഭിക്കുന്ന യുറേനിയം നേരിട്ട് പ്രയോജനപ്പെടുത്തി വൈദ്യുതി ഉത്പാദിപ്പിക്കുന്നതിലൂടെ പ്രവിശ്യയ്ക്ക് വലിയ സാമ്പത്തിക നേട്ടമുണ്ടാക്കാൻ സാധിക്കുമെന്നും അദ്ദേഹം കൂട്ടിച്ചേർത്തു.
ലക്ഷ്യം 2050; കടമ്പകൾ ഏറെ
നിലവിൽ കൽക്കരിയെയും പ്രകൃതിവാതകത്തെയും ആശ്രയിക്കുന്ന വൈദ്യുതി ഉത്പാദനം 2050-ഓടെ പൂർണ്ണമായും ആണവോർജ്ജത്തിലേക്ക് മാറ്റാനാണ് സസ്കാച്ചുവാൻ ലക്ഷ്യമിടുന്നത്. എന്നാൽ വൻകിട റിയാക്ടറുകൾ പ്രവർത്തനസജ്ജമാകാൻ ഏകദേശം 20 വർഷത്തോളം സമയമെടുക്കുമെന്നാണ് കണക്കാക്കുന്നത്. കനേഡിയൻ ന്യൂക്ലിയർ സേഫ്റ്റി കമ്മീഷന്റെ കർശനമായ പരിശോധനകളും നിയമപരമായ നടപടിക്രമങ്ങളും പൂർത്തിയാക്കേണ്ടതുണ്ട്. വരും വർഷങ്ങളിൽ വൈദ്യുതിയുടെ ആവശ്യം ഇരട്ടിയിലധികം വർദ്ധിക്കുമെന്ന റിപ്പോർട്ടുകൾക്കിടയിൽ, കേന്ദ്ര സർക്കാരുമായി സഹകരിച്ച് പദ്ധതി വേഗത്തിൽ പൂർത്തിയാക്കാനുള്ള ശ്രമത്തിലാണ് പ്രവിശ്യാ ഭരണകൂടം.
saskpower-looking-to-bring-large-nuclear-reactors-to-saskatchewan
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
