സസ്കാറ്റൂൺ: സസ്കാറ്റൂണിലെ ആരോഗ്യമേഖലയെ സ്തംഭിപ്പിച്ചുകൊണ്ട് പാരാമെഡിക്സുകൾ പണിമുടക്കിന് ഒരുങ്ങുന്നു. ജോലിഭാരവും കടുത്ത ജീവനക്കാരുടെ കുറവും മൂലം തങ്ങൾ അങ്ങേയറ്റം പ്രതിസന്ധിയിലാണെന്ന് വ്യക്തമാക്കിയാണ് സസ്കാറ്റൂൺ പാരാമെഡിക് അസോസിയേഷൻ സമരത്തിലേക്ക് നീങ്ങുന്നത്. ചൊവ്വാഴ്ച നടന്ന യോഗത്തിൽ അംഗങ്ങൾ ഏകകണ്ഠമായാണ് പണിമുടക്കിന് അനുകൂലമായി വോട്ട് രേഖപ്പെടുത്തിയത്.
2024 മാർച്ച് മുതൽ പുതിയ തൊഴിൽ കരാറുകളോ ശമ്പള പരിഷ്കരണമോ ഇല്ലാതെയാണ് പാരാമെഡിക്സുകൾ ജോലി ചെയ്യുന്നത്. നഗരത്തിലെ ആംബുലൻസ് സർവീസ് നടത്തുന്ന മെഡാവി ഹെൽത്ത് സർവീസസ് വെസ്റ്റ് നേരിടുന്ന കടുത്ത സ്റ്റാഫ് കുറവ് കാരണം അടിയന്തര ഘട്ടങ്ങളിൽ പോലും ആംബുലൻസുകൾ ലഭിക്കാൻ രോഗികൾ മണിക്കൂറുകളോളം കാത്തിരിക്കേണ്ടി വരുന്ന അവസ്ഥയാണെന്ന് അസോസിയേഷൻ പ്രസിഡന്റ് റസ്സൽ ഗ്രാന്റ് പറഞ്ഞു.
പലപ്പോഴും പന്ത്രണ്ട് മണിക്കൂർ നീളുന്ന ഷിഫ്റ്റുകളിൽ ഭക്ഷണം കഴിക്കാനോ ഒന്ന് വിശ്രമിക്കാനോ പോലും സമയം ലഭിക്കാറില്ലെന്ന് ജീവനക്കാർ പരാതിപ്പെടുന്നു. പോലീസിനെയും ഫയർഫോഴ്സിനെയും അപേക്ഷിച്ച് മുപ്പത് ശതമാനത്തോളം കുറഞ്ഞ ശമ്പളമാണ് പാരാമെഡിക്സുകൾക്ക് ലഭിക്കുന്നത്. ഈ വിവേചനവും കടുത്ത മാനസിക സമ്മർദ്ദവും കാരണം നിരവധി ജീവനക്കാർ ജോലി ഉപേക്ഷിച്ചു പോവുകയാണ്. മണിക്കൂറുകളോളം കാത്തിരുന്ന രോഗികളെ നേരിടേണ്ടി വരുന്നത് തങ്ങളെ മാനസികമായി തളർത്തുന്നുവെന്നും ഇവർ പറയുന്നു.
അതേസമയം, പണിമുടക്ക് പ്രഖ്യാപിച്ചെങ്കിലും നഗരത്തിലെ അടിയന്തര സേവനങ്ങളെ (911) ഇത് ബാധിക്കില്ലെന്ന് അധികൃതർ അറിയിച്ചു. അത്യാവശ്യ ഘട്ടങ്ങളിൽ ജനങ്ങൾക്ക് സേവനം ഉറപ്പാക്കാൻ പാരാമെഡിക്സുകൾ ബാധ്യസ്ഥരാണെന്നും നിലവിൽ ചർച്ചകൾ പുരോഗമിക്കുകയാണെന്നും അധികൃതർ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Saskatoon paramedics vote for job action
