സാസ്കച്ചെവാൻ: സാസ്കച്ചെവാൻ പ്രവിശ്യയിലെ ഒരു ദിവസത്തെ ശിശുപരിപാലനത്തിനായി നിലവിലുള്ള $10 നിരക്കിലുള്ള കരാർ അടുത്ത അഞ്ച് വർഷത്തേക്ക് കൂടി നീട്ടാൻ ഫെഡറൽ-പ്രവിശ്യാ സർക്കാരുകൾ തമ്മിൽ ധാരണയായി. 2026-27 സാമ്പത്തിക വർഷം മുതൽ പ്രാബല്യത്തിൽ വരുന്ന ഈ വിപുലീകരണം, കാനഡ-സസ്കാച്ചെവൻ കാനഡ-വൈഡ് ഏർലി ലേണിംഗ് ആൻഡ് ചൈൽഡ് കെയർ കരാറിന്റെ അഞ്ച് വർഷത്തെ പുതുക്കൽ കൂടിയാണ്. വിദ്യാഭ്യാസമന്ത്രി എവററ്റ് ഹിൻഡ്ലിയും റൂറൽ ഡെവലപ്മെന്റ് സ്റ്റേറ്റ് സെക്രട്ടറി ബക്ക്ലി ബേലാഞ്ചറും ചേർന്ന് റെജീനയിലെ വൈ.എം.സി.എ.യിൽ വെച്ചാണ് സുപ്രധാന പ്രഖ്യാപനം നടത്തിയത്.
പുതിയ കരാർ പ്രകാരം, 2027-28 മുതൽ വാർഷികാടിസ്ഥാനത്തിൽ മൂന്ന് ശതമാനം വർദ്ധനവോടെ $1.6 ബില്യൺ ഡോളറിന്റെ ഫെഡറൽ സഹായം സാസ്കച്ചെവാന് ലഭിക്കും. കൂടാതെ, നിലവിലെ ഉടമ്പടിയിൽ പ്രധാനപ്പെട്ട ഒരു മാറ്റം വരുത്തിയിട്ടുണ്ട്. കിന്റർഗാർട്ടനിൽ പഠിക്കുമ്പോൾ ആറ് വയസ്സ് തികയുന്ന കുട്ടികൾക്കും സ്കൂൾ വർഷം അവസാനിക്കുന്നത് വരെ $10-ന് ഡേ കെയർ പരിചരണം തുടർന്നും ലഭിക്കും. ഈ വിപുലീകരണം കൂടുതൽ കുടുംബങ്ങൾക്ക് പ്രയോജനകരമാകുമെന്ന് സൗത്ത് ഈസ്റ്റ് ചൈൽഡ്കെയർ നൗ ഡയറക്ടർ കാരാ വെർണർ അഭിപ്രായപ്പെട്ടു. ഏർലി ലേണിംഗ് ആൻഡ് ചൈൽഡ് കെയർ ഇൻഫ്രാസ്ട്രക്ചർ ഫണ്ട് 2026-27 വരെ ഒരു വർഷത്തേക്ക് നീട്ടാനും കരാറിൽ വ്യവസ്ഥയുണ്ട്.
അതോടൊപ്പം, പുതിയ കരാർ ചില സ്വകാര്യ (ഫോർ-പ്രോഫിറ്റ്) ഡേ കെയർ സെന്ററുകൾക്ക് സബ്സിഡിയുള്ള $10-ന് ഡേ കെയർ പദ്ധതിയിൽ പ്രവേശനം അനുവദിക്കുമെന്നും വിദ്യാഭ്യാസമന്ത്രി ഹിൻഡ്ലി അറിയിച്ചു. യോഗ്യത നേടുന്നതിനായി ഈ ഫോർ-പ്രോഫിറ്റ് ഓപ്പറേറ്റർമാർ നിലവിലെ കരാറിലെ എല്ലാ നിയമങ്ങളും വ്യവസ്ഥകളും പാലിക്കേണ്ടതുണ്ട്. ഈ തീരുമാനം ഡേ കെയർ രംഗത്ത് പ്രവർത്തിക്കുന്നവർക്ക് ഏറെ ആശ്വാസം നൽകുന്നുണ്ട്. ഡേ കെയർ പ്രവർത്തകരുടെ വേതനത്തിനായി ഒരു സ്ഥിരമായ വേതന ഗ്രിഡ് കൊണ്ടുവരണമെന്നും കൂടുതൽ ഫണ്ട് അനുവദിക്കണമെന്നും ഡേ കെയർ അഡ്വക്കേറ്റുകൾ വർഷങ്ങളായി ആവശ്യപ്പെടുന്നുണ്ട്.
കരാർ പുതുക്കിയതോടെ മാതാപിതാക്കൾക്കും ഡേ കെയർ ഉടമകൾക്കും വലിയ ആശ്വാസമാണ് ലഭിച്ചിരിക്കുന്നത്. രണ്ട് മൂന്ന് കുട്ടികളുള്ള കുടുംബങ്ങൾക്ക് $2,000 അല്ലെങ്കിൽ $3,000 ഫീസ് താങ്ങാൻ കഴിയില്ലെന്നും, ഈ കരാർ ഇല്ലാതായാൽ തങ്ങളുടെ ബിസിനസ് നഷ്ടപ്പെടുമെന്നും സാസ്കറ്റൂണിലെ സ്വീറ്റ് സെക്കൻഡ് ഹോം ഡേ കെയർ ഉടമ ഗുർമീത് ധൻസ പ്രതികരിച്ചു.
ജോലി ചെയ്യുന്ന അമ്മമാർക്ക് ഇത് വലിയ ആശ്വാസമാണെന്ന് റെജീനയിലെ ഷെയ്ല ഡീട്രിക്ക് പറഞ്ഞു. 2021 ഏപ്രിൽ മുതൽ 2025 സെപ്റ്റംബർ വരെ വേതന വർദ്ധനവിനും പരിശീലനത്തിനുമായി $171 മില്യൺ ഡോളറാണ് പ്രവിശ്യ ചെലവഴിച്ചത്. കൂടാതെ 2021 മുതൽ സാസ്കച്ചെവാനിൽ 23,000-ത്തിലധികം പുതിയ ശിശുപരിപാലന ഇടങ്ങൾ അനുവദിച്ചിട്ടുണ്ടെന്നും സർക്കാർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Saskatchewan renews contract to provide $10 subsidy to private daycares
