റെജീന : ഒട്ടാവ പ്രഖ്യാപിച്ച പുതിയ സോവറിൻ വെൽത്ത് ഫണ്ട് നല്ലൊരു തുടക്കമാണെന്ന് സസ്കാച്ചവാൻ പ്രീമിയർ സ്കോട്ട് മോ പറഞ്ഞു. എന്നാൽ പ്രധാനമന്ത്രി മാർക്ക് കാർണിക്ക് വലിയ പദ്ധതികളിൽ നിക്ഷേപം ഉറപ്പാക്കാൻ താല്പര്യമുണ്ടെങ്കിൽ, വികസനത്തിന് തടസ്സമാകുന്ന പരിസ്ഥിതി നയങ്ങൾ സർക്കാർ പിൻവലിക്കണമെന്ന് അദ്ദേഹം ആവശ്യപ്പെട്ടു. വിവിധ മേഖലകളിലെ പ്രമുഖ വ്യവസായ പദ്ധതികൾക്കായി 25 ബില്യൺ ഡോളറിന്റെ പ്രാഥമിക നിക്ഷേപത്തോടെയാണ് ഫെഡറൽ സർക്കാർ സോവറിൻ വെൽത്ത് ഫണ്ട് ആരംഭിക്കുന്നത്.
ദേശീയ താല്പര്യമുള്ള പദ്ധതികളെ ഫണ്ട് പിന്തുണയ്ക്കുമെന്ന് പ്രധാനമന്ത്രി വ്യക്തമാക്കിയെങ്കിലും, കാർബൺ പ്രൈസിങ് സംബന്ധിച്ച പുതിയ കരാറുകളും ഇംപാക്ട് അസസ്മെന്റ് നടപടികൾ ഒഴിവാക്കുന്നതുമാണ് സമ്പദ്വ്യവസ്ഥയ്ക്ക് കൂടുതൽ ഗുണകരമാവുകയെന്ന് സ്കോട്ട് മോ വിലയിരുത്തി. സസ്കാച്ചുവൻ സ്വന്തമായി സോവറിൻ വെൽത്ത് ഫണ്ട് രൂപീകരിക്കുന്നതിനെക്കുറിച്ച് ചർച്ചകൾ നടത്തിയിരുന്നു. എന്നാൽ തുടർച്ചയായ ബജറ്റ് കമ്മി കാരണം പദ്ധതി നടപ്പിലാക്കാൻ സാധിച്ചില്ലെന്ന് റെജീനയിൽ മാധ്യമപ്രവർത്തകരോട് സംസാരിക്കവെ അദ്ദേഹം അറിയിച്ചു.
അടുത്ത അഞ്ച് വർഷത്തേക്ക് 50 ബില്യൺ ഡോളറിലധികം കമ്മി പ്രതീക്ഷിക്കുന്ന ഒട്ടാവയ്ക്കും ഈ പ്രതിസന്ധി വെല്ലുവിളിയാകുമെന്ന് പ്രീമിയർ ചൂണ്ടിക്കാട്ടി. വെൽത്ത് ഫണ്ടിനെക്കുറിച്ചുള്ള ചർച്ചകൾ സ്വാഗതാർഹമാണെങ്കിലും ബാങ്കുകളിൽ നിന്നോ മറ്റ് സ്ഥാപനങ്ങളിൽ നിന്നോ പണം കടമെടുക്കാതെ ഫണ്ട് ഫലപ്രദമായി പ്രവർത്തിപ്പിക്കണമെങ്കിൽ സാമ്പത്തിക വളർച്ച അനിവാര്യമാണെന്നും അദ്ദേഹം വ്യക്തമാക്കി. നിക്ഷേപം നടത്താൻ കടം വാങ്ങുന്ന രീതി കാനഡക്കാർക്കിടയിൽ ആശങ്കയുണ്ടാക്കുമെന്നും അദ്ദേഹം കൂട്ടിച്ചേർത്തു.
Saskatchewan Premier says wealth fund is a good move; calls for easing environmental policies
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
