സസ്കാച്ചവാനിൽ പാർട്ട് ടൈം ഡേകെയറുകൾക്ക് പൂട്ടുവീഴുമോ?; ആശങ്കയിൽ മാതാപിതാക്കൾ

സസ്‌കാറ്റൂൺ: സസ്‌കാച്ചവാൻ സർക്കാരിന്റെ പുതിയ ഡേകെയർ ഫണ്ടിംഗ് പരിഷ്കാരം പാർട്ട് ടൈം, കാഷ്വൽ ചൈൽഡ് കെയർ സംവിധാനങ്ങളെ തകർക്കുമെന്ന് ആശങ്ക. ഒരു കുട്ടിക്ക് ഒരു ദിവസം 10 ഡോളർ നിരക്കിൽ ഡേകെയർ നൽകുന്ന പദ്ധതിയുടെ ഫണ്ടിംഗ് രീതിയിൽ വരുത്തുന്ന മാറ്റങ്ങളാണ് ഡേകെയർ ഉടമകളെയും മാതാപിതാക്കളെയും ഒരുപോലെ പ്രതിസന്ധിയിലാക്കുന്നത്. മാറ്റങ്ങൾ നിലവിൽ വരുന്നതോടെ നിലവിലുള്ള പാർട്ട് ടൈം സൗകര്യങ്ങൾ പലതും നിർത്തലാക്കേണ്ടി വരുമെന്ന് പ്രമുഖ ഡേകെയർ ഓപ്പറേറ്റർമാർ മുന്നറിയിപ്പ് നൽകുന്നു.

എന്താണ് പുതിയ ഫണ്ടിംഗ് പരിഷ്കാരം?

നിലവിൽ ഡേകെയറിൽ എൻറോൾ ചെയ്യുന്ന ഓരോ കുട്ടിക്കും അനുസരിച്ചാണ് സർക്കാരിൽ നിന്ന് ഫണ്ട് ലഭിക്കുന്നത്. എന്നാൽ വരുന്ന ജൂലൈ 1 മുതൽ, ലൈസൻസുള്ള ഒരു സീറ്റിന് ഒരു ഗ്രാന്റ് മാത്രമേ ലഭിക്കൂ എന്ന് സർക്കാർ വ്യക്തമാക്കുന്നു. ഒരു സീറ്റ് ഒന്നിലധികം കുട്ടികൾ മാറിമാറി ഉപയോഗിച്ചാലും ആ സീറ്റിന് ഒറ്റ ഗ്രാന്റ് മാത്രമേ അനുവദിക്കൂ. ഡേകെയർ ഫീസ് ദിവസേന 10 ഡോളറായി സർക്കാർ നിജപ്പെടുത്തിയതിനാൽ, ബാക്കി വരുന്ന വലിയ തുക ഡേകെയറുകൾ സ്വന്തം കയ്യിൽ നിന്ന് മുടക്കേണ്ടി വരും.

ഒരു ദിവസം 10 ഡോളർ വെച്ച് അഞ്ച് കുട്ടികളിൽ നിന്ന് ലഭിക്കുന്നത് 50 ഡോളർ മാത്രമാണെന്നും എന്നാൽ ഒരു ജീവനക്കാരന് ദിവസം 160 ഡോളറോളം ശമ്പളം നൽകണമെന്നും ഡാൽമെനി ഡേകെയർ ഡയറക്ടർ ഡാരിസ് ആൻഡേഴ്സൺ ചൂണ്ടിക്കാണിക്കുന്നു. അതായത്, പാർട്ട് ടൈം കുട്ടികളെ സഹായിക്കാൻ നോക്കിയാൽ ഒരു ഡേകെയറിന് ദിവസം 90 ഡോളറിന്റെ നഷ്ടമുണ്ടാകും.

കാത്തിരിപ്പ് പട്ടിക നീളുന്നു; നഗരങ്ങളിൽ നിന്ന് ഗ്രാമങ്ങളിലേക്ക് നെട്ടോട്ടം

നിലവിൽ ഡാൽമെനി ഡേകെയറിൽ മാത്രം നൂറിലധികം കുട്ടികളാണ് വെയ്റ്റിംഗ് ലിസ്റ്റിലുള്ളത്. സസ്‌കാറ്റൂൺ നഗരത്തിൽ ഒരിടത്തും ഒഴിവില്ലാത്തതിനാൽ 20 മിനിറ്റിലധികം വണ്ടി ഓടിച്ച് കുട്ടികളെ ഗ്രാമപ്രദേശങ്ങളിലെ ഡേകെയറുകളിൽ വിട്ട ശേഷം ജോലിക്ക് പോകുന്ന മാതാപിതാക്കൾ നിരവധിയാണ്. പുതിയ നിയമം വരുന്നതോടെ പാർട്ട് ടൈം സീറ്റുകൾ കൂടി ഇല്ലാതായാൽ ഇവരുടെ അവസ്ഥ കൂടുതൽ ദുരിതത്തിലാകും.

സർക്കാരിന്റെ വാദം

പുതിയ മോഡൽ അനുസരിച്ച് ഓരോ ലൈസൻസ്ഡ് സ്പേസിനും പൂർണ്ണമായ ഫണ്ട് ഉറപ്പാക്കുന്നുണ്ടെന്നാണ് വിദ്യാഭ്യാസ മന്ത്രാലയത്തിന്റെ വിശദീകരണം. ഒരു സീറ്റിന് തന്നെ ഒന്നിലധികം തവണ ഗ്രാന്റ് നൽകുന്നത് നീതിയല്ലെന്നും, സുസ്ഥിരത ഉറപ്പാക്കാനാണ് ഈ മാറ്റമെന്നും മന്ത്രാലയം അറിയിച്ചു. അതേസമയം ഫെഡറൽ സർക്കാരിൽ നിന്ന് കൂടുതൽ സാമ്പത്തിക സഹായം ലഭിച്ചാലേ ഈ പദ്ധതി മുന്നോട്ട് കൊണ്ടുപോകാൻ കഴിയൂ എന്ന് വിദ്യാഭ്യാസ മന്ത്രി എവററ്റ് ഹിൻഡ്‌ലി വ്യക്തമാക്കി. എന്നാൽ ജൂലൈ 1-ലെ ഈ പരിഷ്കാരം താൽക്കാലികമായി മരവിപ്പിച്ചു കൊണ്ട് കൃത്യമായ മറ്റൊരു ഫണ്ടിംഗ് മാതൃക കൊണ്ടുവരണമെന്നാണ് ഡേകെയർ അധികൃതർ ആവശ്യപ്പെടുന്നത്.

Sask. daycare warns funding changes could reduce part-time care

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla