ഒട്ടാവ : കാനഡയിലെ പ്രമുഖ ടെലികോം, മീഡിയ കമ്പനിയായ റോജേഴ്സ് കമ്മ്യൂണിക്കേഷൻസ് ഇൻക് ഏകദേശം 10,000 ജീവനക്കാർക്ക് വൊളന്ററി ബൈഔട്ട് (സ്വമേധയാ പിരിഞ്ഞുപോകൽ) പാക്കേജുകൾ വാഗ്ദാനം ചെയ്തു. നിലവിലെ ബിസിനസ് സാഹചര്യങ്ങൾക്കനുസരിച്ച് പ്രവർത്തനച്ചെലവ് ക്രമീകരിക്കുന്നതിന്റെ ഭാഗമായാണ് ഈ നടപടിയെന്ന് കമ്പനി അറിയിച്ചു. ഏകദേശം 25,000 ജീവനക്കാരുള്ള കമ്പനിയിലെ പകുതിയോളം സ്റ്റാഫിനാണ് ഈ ആനുകൂല്യം ലഭിക്കുക. പ്രോഗ്രാമിലൂടെ എത്ര ജീവനക്കാർ പിരിഞ്ഞുപോകുമെന്ന് കമ്പനി ഔദ്യോഗികമായി വ്യക്തമാക്കിയിട്ടില്ല.
കഴിഞ്ഞ വർഷത്തെ അപേക്ഷിച്ച് മൂലധനച്ചെലവിൽ 30 ശതമാനം കുറവ് വരുത്താൻ പദ്ധതിയിടുന്നതായി കഴിഞ്ഞ ആഴ്ച പുറത്തിറക്കിയ ത്രൈമാസ റിപ്പോർട്ടിൽ റോജേഴ്സ് വ്യക്തമാക്കിയിരുന്നു. നിയന്ത്രണ ഏജൻസികളിൽ നിന്നുള്ള കർശനമായ നിയമങ്ങളും വിപണിയിലെ മത്സരവുമാണ് ചെലവ് വെട്ടിക്കുറയ്ക്കാൻ കാരണമായി കമ്പനി ചൂണ്ടിക്കാട്ടുന്നത്. കോർപ്പറേറ്റ് വിഭാഗങ്ങളിലെയും വിവിധ ബിസിനസ് യൂണിറ്റുകളിലെയും ജീവനക്കാർക്ക് ബൈഔട്ട് ലഭ്യമാണെങ്കിലും, ഓൺ-എയർ ടാലന്റ്, സ്പോർട്സ്നെറ്റ്, ടൊറന്റോ ബ്ലൂ ജെയ്സ് ജീവനക്കാർ, യൂണിയൻ അംഗങ്ങൾ എന്നിവരെ ഇതിൽ നിന്നും ഒഴിവാക്കിയിട്ടുണ്ട്.
2023-ൽ 26 ബില്യൺ ഡോളർ ചിലവിട്ട് ഷാ കമ്മ്യൂണിക്കേഷൻസിനെ ഏറ്റെടുത്തതിനെത്തുടർന്നുണ്ടായ കടബാധ്യതകൾ കമ്പനിക്ക് വലിയ സാമ്പത്തിക സമ്മർദ്ദം സൃഷ്ടിക്കുന്നതായി സാമ്പത്തിക വിദഗ്ധർ വിലയിരുത്തുന്നു. പലിശ നിരക്കുകൾ വർദ്ധിക്കുന്നത് കടം തിരിച്ചടയ്ക്കുന്നതിൽ വെല്ലുവിളിയായേക്കാമെന്നും ഇവർ ചൂണ്ടിക്കാട്ടുന്നു. വെസ്റ്റേൺ കാനഡയിൽ 3,000 പുതിയ തൊഴിലവസരങ്ങൾ സൃഷ്ടിക്കുമെന്ന സർക്കാരുമായുള്ള മുൻ കരാറുകളിൽ കമ്പനി ഇപ്പോഴും ഉറച്ചുനിൽക്കുന്നുണ്ട്. ഉപഭോക്തൃ സേവനത്തിനായി കമ്പനി ഇപ്പോൾ ആർട്ടിഫിഷ്യൽ ഇന്റലിജൻസിനെ (AI) കൂടുതൽ ആശ്രയിക്കുന്നതായി ആഭ്യന്തര വൃത്തങ്ങൾ സൂചിപ്പിച്ചു.
Rogers Communications cuts staff in Canada; buyout package for 10,000 people
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
