ഭക്ഷണത്തിന് എന്തിന് നികുതി? താൽക്കാലിക നികുതി ഇളവ് സ്ഥിരമാക്കണമെന്ന് റെസ്റ്റോറന്റ്സ് കാനഡ

ഒട്ടാവ: ജീവിതച്ചെലവ് വർധിച്ചതോടെ കാനഡയിൽ റെസ്റ്റോറന്റുകളിൽ പോയി ഭക്ഷണം കഴിക്കുന്നവരുടെ എണ്ണത്തിൽ വൻ കുറവ് രേഖപ്പെടുത്തുന്നതായി റിപ്പോർട്ട്. ജനങ്ങളുടെ കൈവശം ചിലവഴിക്കാൻ അധികപ്പണമില്ലാത്തത് റെസ്റ്റോറന്റ് മേഖലയെ വലിയ സമ്മർദ്ദത്തിലാക്കുന്നതായി റെസ്റ്റോറന്റ്സ് കാനഡ പ്രസിഡന്റും സിഇഒയുമായ കെല്ലി ഹിഗ്ഗിൻസൺ അറിയിച്ചു. ഈ സാഹചര്യത്തിൽ ഭക്ഷണസാധനങ്ങൾക്കുമേലുള്ള നികുതി ഒഴിവാക്കണമെന്ന ആവശ്യവും ശക്തമായിട്ടുണ്ട്.

ഒന്റാറിയോയിൽ 2024 ഡിസംബർ 14 മുതൽ 2025 ഫെബ്രുവരി 15 വരെ റെസ്റ്റോറന്റ് ഭക്ഷണങ്ങൾക്കും സ്നാക്കുകൾക്കും മദ്യത്തിനും അനുവദിച്ചിരുന്ന ജിഎസ്ടി/എച്ച്എസ്ടി നികുതി ഇളവ് സ്ഥിരമാക്കണമെന്ന് റെസ്റ്റോറന്റ്സ് കാനഡ ആവശ്യപ്പെട്ടു. താങ്ങാനാവാത്ത ജീവിതച്ചെലവ് നേരിടുന്ന ഈ സമയത്ത് ഭക്ഷണത്തിന് നികുതി ചുമത്തുന്നത് മോശം പൊതുനയമാണെന്നും ഹിഗ്ഗിൻസൺ വ്യക്തമാക്കി. ഭക്ഷണം എവിടെനിന്ന് കഴിക്കുന്നു എന്നത് പരിഗണിക്കാതെ തന്നെ എല്ലാ ഭക്ഷ്യവസ്തുക്കളുടെയും നികുതി ഒഴിവാക്കണമെന്ന് സാമ്പത്തിക വിദഗ്ധനായ ചാർലെബോയിസും അഭിപ്രായപ്പെട്ടു.

റെസ്റ്റോറന്റുകളിലെ മദ്യപാനത്തിൽ ഉണ്ടായ കുറവും ഈ മേഖലയ്ക്ക് തിരിച്ചടിയായിട്ടുണ്ട്. ഒക്ടോബറിലെ കണക്കുകൾ പ്രകാരം രാജ്യത്തുടനീളം മദ്യവിൽപ്പനയിൽ 10.6 ശതമാനം ഇടിവ് രേഖപ്പെടുത്തി. മദ്യവിൽപ്പന കുറയുന്നത് റെസ്റ്റോറന്റുകളുടെ വരുമാനത്തെ നേരിട്ട് ബാധിക്കുന്നതായാണ് വിലയിരുത്തൽ. ഉപഭോക്താക്കളുടെ മാറുന്ന ശീലങ്ങൾ റെസ്റ്റോറന്റ് വിപണിയിൽ വലിയ മാറ്റങ്ങൾ ഉണ്ടാക്കുന്നതായും റിപ്പോർട്ടുകൾ സൂചിപ്പിക്കുന്നു.
ടിപ്പിംഗ് (Tipping) സമ്പ്രദായത്തോടുള്ള ഉപഭോക്താക്കളുടെ വിയോജിപ്പും റെസ്റ്റോറന്റ് മേഖലയെ പ്രതികൂലമായി ബാധിക്കുന്നുണ്ട്.

ഇരുന്നു ഭക്ഷണം കഴിക്കുന്ന റെസ്റ്റോറന്റുകളിൽ ടിപ്പ് നൽകുന്നതിൽ പലർക്കും എതിർപ്പില്ലെങ്കിലും, ഫാസ്റ്റ് ഫുഡ് കൗണ്ടറുകളിൽ ടിപ്പ് ആവശ്യപ്പെടുന്നത് ഉപഭോക്താക്കളെ പ്രകോപിപ്പിക്കുന്നുണ്ടെന്ന് ചാർലെബോയിസ് വ്യക്തമാക്കി. ഇത്തരം പ്രവണതകൾ പലരെയും റെസ്റ്റോറന്റുകളിൽ നിന്ന് അകറ്റാൻ കാരണമാകുന്നുണ്ട്. സാമ്പത്തിക പ്രതിസന്ധിയും മാറുന്ന സാമൂഹിക രീതികളും കാരണം കാനഡയിലെ റെസ്റ്റോറന്റ് വ്യവസായം വലിയ വെല്ലുവിളിയാണ് നേരിടുന്നത്. സർക്കാർ നികുതി ഇളവുകൾ നൽകിയാൽ മാത്രമേ ഈ മേഖലയ്ക്ക് പിടിച്ചുനിൽക്കാൻ സാധിക്കൂ എന്നാണ് റെസ്റ്റോറന്റ് ഉടമകളുടെ വാദം. നിലവിലെ സാഹചര്യം തുടർന്നാൽ കൂടുതൽ റെസ്റ്റോറന്റുകൾ അടച്ചുപൂട്ടേണ്ടി വരുമെന്നും ആശങ്കയുണ്ട്.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

It is reported that the number of people eating out at restaurants in Canada has dropped significantly as the cost of living has increased.