ഒട്ടാവ: പാക്കറ്റ് ഭക്ഷണങ്ങളിലെ ‘ബെസ്റ്റ് ബിഫോർ’ തീയതിയെക്കുറിച്ചുള്ള കൺഫ്യൂഷൻ കാരണം കാനഡയിൽ വർഷംതോറും 12.3 ബില്യൺ ഡോളറിന്റെ ഗുണനിലവാരമുള്ള ഭക്ഷണങ്ങൾ പാഴാകുന്നതായി റിപ്പോർട്ട്. കാനഡയിലെ പ്രമുഖ ഫുഡ് റെസ്ക്യൂ ഓർഗനൈസേഷനായ ‘സെക്കൻഡ് ഹാർവെസ്റ്റ്’ പുറത്തുവിട്ട പുതിയ പഠനത്തിലാണ് ഈ ഞെട്ടിക്കുന്ന വിവരമുള്ളത്. കഴിക്കാൻ തികച്ചും സുരക്ഷിതമായ ഭക്ഷണസാധനങ്ങളാണ് തീയതി കഴിഞ്ഞു എന്ന പേരിൽ കടകളിൽ നിന്നും വീടുകളിൽ നിന്നും വൻതോതിൽ വലിച്ചെറിയപ്പെടുന്നത്.
ഇത്തരത്തിൽ തീയതികൾ മാത്രം നോക്കി വിപണിയിൽ നിന്നും ഒഴിവാക്കുന്ന ഭക്ഷണത്തിന് മാത്രം ഏകദേശം 12.3 ബില്യൺ ഡോളർ വിലവരുമെന്ന് റിപ്പോർട്ട് വ്യക്തമാക്കുന്നു. കാനഡയിലെ നിയമപ്രകാരം 90 ദിവസത്തിൽ താഴെ മാത്രം കേടുകൂടാതെ ഇരിക്കുന്ന ഭക്ഷണസാധനങ്ങൾക്ക് ‘ബെസ്റ്റ് ബിഫോർ’ തീയതി നിർബന്ധമാണ്. എന്നാൽ ഇത് ഭക്ഷണത്തിന്റെ ഏറ്റവും മികച്ച ഗുണനിലവാരം അറിയാനുള്ള തീയതി മാത്രമാണെന്നും, ഭക്ഷണ സുരക്ഷയുമായി ഇതിന് ബന്ധമില്ലെന്നുമാണ് ഗവേഷകർ പറയുന്നത്. ഉപഭോക്താക്കൾ ‘ബെസ്റ്റ് ബിഫോർ’ തീയതിയെ ‘എക്സ്പയറി’ തീയതിയായി തെറ്റിദ്ധരിക്കുന്നതാണ് പ്രശ്നം. ഈ ആശയക്കുഴപ്പം കാരണം കാനഡയിലെ ഒരു സാധാരണ കുടുംബത്തിന് വർഷത്തിൽ 150 മുതൽ 300 ഡോളർ വരെയാണ് നഷ്ടം വരുന്നത്.
ഈ വലിയ ഭക്ഷ്യനഷ്ടം ഒഴിവാക്കാൻ പാക്കറ്റുകളിലെ ലേബലിംഗ് രീതി കൂടുതൽ ലളിതമാക്കണമെന്നും ദേശീയതലത്തിൽ പുതിയ നിയമങ്ങൾ കൊണ്ടുവരണമെന്നും ആവശ്യമുയർന്നിട്ടുണ്ട്. അതേസമയം, കൃത്യമായ പ്ലാനിംഗിലൂടെയും സൂക്ഷിച്ചുവെക്കുന്ന രീതികൾ മാറ്റുന്നതിലൂടെയും വീടുകളിലെ ഭക്ഷ്യമാലിന്യം വലിയ തോതിൽ കുറയ്ക്കാൻ സാധിക്കുമെന്ന് വിദഗ്ധർ ചൂണ്ടിക്കാണിക്കുന്നു. ആവശ്യമുള്ള സാധനങ്ങളുടെ ലിസ്റ്റ് കൃത്യമായി ഉണ്ടാക്കുക, കേടാകുന്നതിന് മുൻപ് ഫ്രീസ് ചെയ്യുക തുടങ്ങിയ ചെറിയ ശീലങ്ങളിലൂടെ പണനഷ്ടവും പരിസ്ഥിതി ആഘാതവും ഒരുപോലെ കുറയ്ക്കാൻ കഴിയും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Confusion over 'Best Before' labels: Report finds 12 billion pounds of food wasted annually in Canada
