ക്യുബെക്ക് ഇൻഷുറൻസ് ബോർഡ് അഴിമതി: പദ്ധതിച്ചെലവ് മറച്ചുവെക്കാൻ ഉദ്യോഗസ്ഥർ കള്ളം പറഞ്ഞതായി റിപ്പോർട്ട്

ക്യുബെക്ക്: ക്യുബെക്കിലെ ഓട്ടോമൊബൈൽ ഇൻഷുറൻസ് ബോർഡിന്റെ (SAAQ) ഓൺലൈൻ പ്ലാറ്റ്‌ഫോം നിർമ്മാണവുമായി ബന്ധപ്പെട്ട വൻ സാമ്പത്തിക ക്രമക്കേടുകൾ പുറത്തുകൊണ്ടുവന്ന കമ്മീഷൻ റിപ്പോർട്ട് സമർപ്പിച്ചു. പദ്ധതിയുടെ ചെലവ് വർധിച്ചത് മറച്ചുവെക്കാൻ ഉന്നത ഉദ്യോഗസ്ഥർ പത്ത് വർഷത്തോളം മനഃപൂർവ്വം കള്ളം പറഞ്ഞതായി കമ്മീഷണർ ജഡ്ജി ഡെനിസ് ഗാലന്റ് വെളിപ്പെടുത്തി. സർക്കാർ സേവനങ്ങളുടെ ഡിജിറ്റൽ പരിവർത്തനത്തിന് സ്വകാര്യ കമ്പനികളെ അമിതമായി ആശ്രയിക്കുന്നതിന് പകരം സർക്കാർ തലത്തിൽ തന്നെ വിദഗ്ധ സമിതികളെ (ടൈഗർ ടീം) രൂപീകരിക്കണമെന്ന് റിപ്പോർട്ട് ശുപാർശ ചെയ്യുന്നു.

വാഹന രജിസ്ട്രേഷൻ, ഡ്രൈവിംഗ് ലൈസൻസ് പുതുക്കൽ എന്നിവയ്ക്കായി ‘SAAQclic’ എന്ന പോർട്ടൽ നിർമ്മിക്കുന്നതിന് 2017-ലാണ് ഒരു സ്വകാര്യ കമ്പനിക്ക് കരാർ നൽകിയത്. എന്നാൽ പദ്ധതി ലക്ഷ്യം തെറ്റിയതോടെ സ്വകാര്യ കരാറുകാർ സ്വന്തം വിദഗ്ധരെ നിയമിച്ച് പ്രശ്നങ്ങൾ വിശകലനം ചെയ്യുകയായിരുന്നു. ഈ ഉപകരാറുകാർക്ക് ക്യുബെക്കിലെ സർക്കാർ ഉദ്യോഗസ്ഥരുടെ പരമാവധി ശമ്പളത്തേക്കാൾ ഏഴിരട്ടി വരെ തുക നൽകിയതായി കമ്മീഷൻ കണ്ടെത്തി. പൊതുമുതൽ കൊള്ളയടിക്കപ്പെട്ടതിന് ക്യുബെക്ക് നിവാസികൾ ഇരയായതായി പ്രതിപക്ഷ കക്ഷിയായ ക്യുബെക്ക് സോളിഡയർ വിമർശിച്ചു.

75 ദിവസം നീണ്ടുനിന്ന ഹിയറിംഗിൽ 130 സാക്ഷികളെ വിസ്തരിക്കുകയും രണ്ട് ലക്ഷത്തിലധികം രേഖകൾ പരിശോധിക്കുകയും ചെയ്ത ശേഷമാണ് 26 നിർദേശങ്ങളടങ്ങിയ റിപ്പോർട്ട് സമർപ്പിച്ചത്. സർക്കാർ തലത്തിൽ സാങ്കേതിക വിദഗ്ധരുടെ കുറവുണ്ടെന്നും ഇത് പദ്ധതിച്ചെലവ് കുത്തനെ കൂടാൻ കാരണമാകുന്നുവെന്നും ക്യുബെക്ക് യൂണിയൻ ഓഫ് പബ്ലിക് ആൻഡ് പാരാപബ്ലിക് എംപ്ലോയീസ് (SFPQ) പ്രസിഡന്റ് ക്രിസ്റ്റ്യൻ ഡെയ്ഗിൾ മൊഴി നൽകി. സ്വകാര്യ സ്ഥാപനങ്ങളെ മാറ്റിനിർത്തി അത്യാധുനിക സാങ്കേതിക വൈദഗ്ധ്യം സർക്കാർ ആർജ്ജിക്കണമെന്നാണ് കമ്മീഷന്റെ പ്രധാന ശുപാർശ.

സാങ്കേതിക വിദഗ്ധരുടെ കുറവ് നികത്താൻ പുറംകരാറുകളെ ആശ്രയിക്കുന്നത് നികുതിദായകർക്ക് വലിയ സാമ്പത്തിക ബാധ്യതയുണ്ടാക്കുന്നുവെന്ന് യൂണിയൻ വിലയിരുത്തി. ഡിജിറ്റൽ സേവനങ്ങൾ അത്യന്താപേക്ഷിതമാണെന്നും പേപ്പർ രഹിത സംവിധാനങ്ങളിലേക്ക് മാറാതെ സർക്കാരിന് മുന്നോട്ട് പോകാനാകില്ലെന്നും കമ്മീഷൻ ചീഫ് പ്രോസിക്യൂട്ടർ സൈമൺ ട്രംബ്ലെ വ്യക്തമാക്കി. ഭാവിയിൽ ഇത്തരം പദ്ധതികൾ സുതാര്യമായും ചെലവ് കുറഞ്ഞ രീതിയിലും നടപ്പിലാക്കാൻ ആഭ്യന്തര വൈദഗ്ധ്യം ഉറപ്പാക്കണമെന്നും റിപ്പോർട്ട് ആവശ്യപ്പെടുന്നു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Quebec Insurance Board scandal: Officials reportedly lied to hide project costs