ക്യുബെക്ക്: അന്താരാഷ്ട്ര വിദ്യാർത്ഥികൾക്കും വിദേശ തൊഴിലാളികൾക്കും സ്ഥിരതാമസത്തിന് എളുപ്പവഴിയൊരുക്കിയിരുന്ന ‘പി.ഇ.ക്യൂ’ (PEQ) പദ്ധതി നിർത്തലാക്കി പുതിയ കുടിയേറ്റ നയം നടപ്പിലാക്കാൻ തീരുമാനിച്ച് ക്യുബെക്ക് സർക്കാർ. നിലവിലുണ്ടായിരുന്ന ‘പ്രോഗ്രാം ഡി എക്സ്പീരിയൻസ് ക്യുബെക്കോയിസ്’ (PEQ) പദ്ധതിക്ക് പകരം കൂടുതൽ നിയന്ത്രണങ്ങളുള്ള ‘സ്കിൽഡ് വർക്കർ സെലക്ഷൻ പ്രോഗ്രാം’ (PSTQ) ആണ് സർക്കാർ ഔദ്യോഗികമായി അവതരിപ്പിച്ചത്. തൊഴിൽ വിപണിയിലെ അടിയന്തര ആവശ്യങ്ങൾ പരിഗണിച്ചും ഫ്രഞ്ച് ഭാഷാ പ്രാവീണ്യം നിർബന്ധമാക്കിയുമാണ് പുതിയ മാറ്റങ്ങൾ കൊണ്ടുവന്നിട്ടുള്ളതെന്ന് കുടിയേറ്റ മന്ത്രി ജീൻ-ഫ്രാൻസ്വാ റോബർജ് വ്യക്തമാക്കി.
പുതിയ പി.എസ്.ടി.ക്യൂ (PSTQ) പദ്ധതി പ്രകാരം അപേക്ഷകർ ‘അരിമ’ (Arrima) എന്ന ഓൺലൈൻ പ്ലാറ്റ്ഫോം വഴി താൽപ്പര്യം രേഖപ്പെടുത്തേണ്ടതുണ്ട്. നിശ്ചിത പോയിന്റ് അടിസ്ഥാനത്തിൽ ഓരോ മാസവും തിരഞ്ഞെടുക്കപ്പെടുന്നവർക്ക് മാത്രമേ സ്ഥിരതാമസത്തിന് അപേക്ഷിക്കാനാവൂ. ഈ വർഷം 29,000 പേരെയാണ് ഈ പദ്ധതിയിലൂടെ ലക്ഷ്യമിടുന്നത്. ഇതിൽ ആരോഗ്യസംരക്ഷണം, വിദ്യാഭ്യാസം, നിർമ്മാണം എന്നീ മേഖലകളിൽ ജോലി ചെയ്യുന്നവർക്കും മോണ്ട്രിയൽ, ലാവൽ എന്നീ നഗരങ്ങൾക്ക് പുറത്തുള്ള പ്രദേശങ്ങളിൽ താമസിക്കുന്നവർക്കും പ്രത്യേക മുൻഗണന നൽകും. നിലവിൽ ക്യുബെക്കിലുള്ളവർക്ക് മുൻഗണന നൽകണമെന്ന ആവശ്യം ഉയരുന്നുണ്ടെങ്കിലും, അനിയന്ത്രിതമായ കുടിയേറ്റം പാർപ്പിട-ആരോഗ്യ മേഖലകളിൽ സമ്മർദ്ദമുണ്ടാക്കുമെന്നാണ് സർക്കാരിന്റെ നിലപാട്.
അതേസമയം, കുടിയേറ്റ നിയമങ്ങളിലെ ഈ മാറ്റം നിലവിൽ ക്യുബെക്കിൽ ജോലി ചെയ്യുന്ന ആയിരക്കണക്കിന് ആരോഗ്യപ്രവർത്തകരെയും വിദേശ തൊഴിലാളികളെയും ആശങ്കയിലാഴ്ത്തിയിട്ടുണ്ട്. 2026 അവസാനത്തോടെ ജോലി അനുമതി (Work Permit) കാലാവധി തീരുന്ന 6,300-ഓളം ആരോഗ്യപ്രവർത്തകരുടെ ഭാവി അനിശ്ചിതത്വത്തിലാണെന്ന് പ്രതിപക്ഷ കക്ഷികളും ബിസിനസ് സംഘടനകളും ചൂണ്ടിക്കാട്ടുന്നു. എന്നാൽ, അത്യാവശ്യ ജീവനക്കാരെ 2026-നുള്ളിൽ തന്നെ പുതിയ പദ്ധതി വഴി തിരഞ്ഞെടുക്കുമെന്നും അവരുടെ ജോലി അനുമതി ദീർഘിപ്പിക്കുന്നതിന് ഫെഡറൽ സർക്കാരുമായി ചർച്ചകൾ നടത്തുന്നുണ്ടെന്നും മന്ത്രി ഉറപ്പുനൽകി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Quebec government tightens immigration policy; replaces PEQ program with new selection method
