ക്യുബെക്ക് : ക്യുബെക്കിൽ അഭയം തേടിയ കുടുംബങ്ങളിലെ ഭിന്നശേഷിക്കാരായ കുട്ടികൾക്ക് നൽകി വരുന്ന പ്രതിമാസ അലവൻസ് നിർത്തലാക്കാൻ സർക്കാർ തീരുമാനിച്ചു. അടുത്ത മാസം മുതൽ നടപ്പിലാകുന്ന ഈ തീരുമാനം മുന്നൂറിലധികം കുട്ടികളെ നേരിട്ട് ബാധിക്കുമെന്നാണ് കണക്കുകൾ സൂചിപ്പിക്കുന്നത്. നിലവിൽ 413 ഡോളറാണ് ഇത്തരത്തിൽ ഒരു കുട്ടിക്ക് പ്രതിമാസം ലഭിക്കുന്നത്. സർക്കാർ നീക്കം ഈ കുടുംബങ്ങളുടെ ജീവിതസാഹചര്യങ്ങളെ സാരമായി ബാധിക്കുമെന്ന് സന്നദ്ധ പ്രവർത്തകർ ചൂണ്ടിക്കാട്ടുന്നു.
പദ്ധതി നിർത്തലാക്കുന്നത് കുട്ടികളുടെ ചികിത്സയെയും വിദ്യാഭ്യാസത്തെയും ദോഷകരമായി ബാധിക്കുമെന്ന് മോൺട്രിയൽ ചിൽഡ്രൻസ് ഹോസ്പിറ്റലിലെ പീഡിയാട്രീഷ്യൻ ഡോ. ജൂലി നടൗ-ലെസാർഡ് വ്യക്തമാക്കി. സാമ്പത്തിക ബുദ്ധിമുട്ട് കാരണം മാതാപിതാക്കൾക്ക് ജോലിക്കു പോകേണ്ടി വരുന്നതോടെ കുട്ടികളുടെ മെഡിക്കൽ അപ്പോയിന്റ്മെന്റുകൾ മുടങ്ങാൻ സാധ്യതയുണ്ടെന്നും ഇത് അവരുടെ വളർച്ചയെ പിന്നോട്ടടിക്കുമെന്നും അവർ കൂട്ടിച്ചേർത്തു. എന്നാൽ, നിലവിലെ മാർഗ്ഗനിർദ്ദേശങ്ങൾക്ക് വിരുദ്ധമായാണ് ഈ ആനുകൂല്യം നൽകി വരുന്നതെന്നും മറ്റ് പ്രവിശ്യകളിലൊന്നും ഇത്തരമൊരു സാമ്പത്തിക സഹായം നിലവിലില്ലെന്നുമാണ് ക്യുബെക് ആരോഗ്യ മന്ത്രാലയത്തിന്റെ വിശദീകരണം.
സർക്കാർ തീരുമാനത്തിനെതിരെ പ്രതിപക്ഷ കക്ഷികളായ ക്യുബെക് ലിബറൽ പാർട്ടിയും ക്യുബെക് സോളിഡയറും ശക്തമായ പ്രതിഷേധവുമായി രംഗത്തെത്തി. സർക്കാർ ഫണ്ട് വിനിയോഗിക്കുന്നതിൽ മുൻഗണന നിശ്ചയിക്കുന്നതിൽ പരാജയപ്പെട്ടുവെന്ന് ലിബറൽ പാർട്ടിയുടെ ഇമിഗ്രേഷൻ ക്രിട്ടിക് ആന്ദ്രെ മോറിൻ വിമർശിച്ചു. അതേസമയം, ഒന്റാറിയോ പോലുള്ള മറ്റ് പ്രവിശ്യകളിൽ 600 ഡോളറിലധികം സമാനമായ സഹായം നൽകുന്നുണ്ടെന്ന് സന്നദ്ധ സംഘടനയായ ‘ടേബിൾ ഡി കൺസേർട്ടേഷൻ’ വക്താവ് ലൂയിസ് ഫിലിപ്പ് ജനാർഡ് വെളിപ്പെടുത്തി. മാർച്ച് ഒന്ന് മുതൽ പദ്ധതി ഔദ്യോഗികമായി അവസാനിക്കും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Quebec decides to abolish disability allowance: The future of over 300 children is in crisis
