കനേഡിയൻ വിശ്വാസം ചോരുന്നു: സസ്‌കച്ചെവാനിലും മാനിറ്റോബയിലും കുടിയേറ്റക്കാരോടുള്ള പൊതുജന പിന്തുണ ഏറ്റവും താഴ്ന്ന നിലയിൽ

സസ്‌കച്ചെവാൻ: സസ്‌കച്ചെവാനിലും മാനിറ്റോബയിലും കുടിയേറ്റക്കാരോടും അഭയാർത്ഥികളോടുമുള്ള പൊതുജന വിശ്വാസം രാജ്യത്ത് ഏറ്റവും താഴ്ന്ന നിലയിലെന്ന് പുതിയ സർവ്വേ. സർവ്വേ ഫലങ്ങൾ ഗൗരവമായ ഉൾക്കാഴ്ച നൽകുന്നുണ്ടെന്നും, അവിശ്വാസത്തിൻ്റെ യഥാർത്ഥ കാരണം കണ്ടെത്താൻ കൂടുതൽ ചർച്ചകൾ അനിവാര്യമാണെന്നും സസ്‌കറ്റൂൺ ഓപ്പൺ ഡോർ സൊസൈറ്റി (Open Door Society) CEO അലി അബുക്കർ അഭിപ്രായപ്പെട്ടു.
പുതിയ സാഹചര്യത്തിൽ, രാഷ്ട്രീയ നേതാക്കളുടെ പ്രതികരണങ്ങളും സന്ദേശങ്ങളും കൂടുതൽ ശ്രദ്ധിക്കണമെന്ന് അബുക്കർ മുന്നറിയിപ്പ് നൽകി. കാനഡയുടെ സാമ്പത്തിക വികസനത്തിലും ജനസംഖ്യാ വർധനയിലും കുടിയേറ്റത്തിനുള്ള പങ്ക് പുനർവിചിന്തനം ചെയ്യേണ്ടതുണ്ട്. അതോടൊപ്പം, അഭയാർത്ഥികളെ സംരക്ഷിക്കാനുള്ള രാഷ്ട്രമെന്ന നിലയിലുള്ള നമ്മുടെ ഉത്തരവാദിത്തം നാം മറക്കരുതെന്നും അദ്ദേഹം ഓർമ്മിപ്പിച്ചു.

വർധിച്ചുവരുന്ന ജീവിതച്ചെലവ്, സാമ്പത്തിക പ്രതിസന്ധി തുടങ്ങിയ വിഷയങ്ങളിൽ കൂടുതൽ ആളുകൾ രാജ്യത്തേക്ക് എത്തുന്നത് മാത്രമാണ് ഏക കാരണം എന്ന രീതിയിലുള്ള രാഷ്ട്രീയക്കാരുടെ സംസാരങ്ങൾ പൊതുജനത്തിൽ ആശങ്കയും അവിശ്വാസവും വർദ്ധിപ്പിക്കാൻ കാരണമാവുന്നുണ്ട്. ഇത്തരം വാദങ്ങൾ ‘ഭയം’ സൃഷ്ടിക്കുമെന്നും, അത് അവിശ്വാസമായി പുറത്തുവരുമെന്നും അലി അബുക്കർ ചൂണ്ടിക്കാട്ടി. കൂടാതെ, അഭയാർത്ഥികളെക്കുറിച്ചുള്ള പൊതുചർച്ചകൾ വംശീയതയും വിവേചനവും പ്രോത്സാഹിപ്പിക്കാൻ ഒരു മറയായി ഉപയോഗിക്കപ്പെടരുത് എന്നും അദ്ദേഹം കൂട്ടിച്ചേർത്തു.

അസോസിയേഷൻ ഫോർ കനേഡിയൻ സ്റ്റഡീസിന് (ACS) വേണ്ടി ലെഗർ മാർക്കറ്റിംഗ് നടത്തിയ സർവ്വേയുടെ ഫലങ്ങൾ പ്രകാരം, സസ്‌കച്ചെവാനിലും മാനിറ്റോബയിലും 31% പേർ മാത്രമാണ് അഭയാർത്ഥികളെ വിശ്വസിക്കുന്നതായി അഭിപ്രായപ്പെട്ടത്. ഇത് ദേശീയ ശരാശരിയായ 36% നെക്കാൾ വളരെ കുറവാണ്. കുടിയേറ്റക്കാരുടെ കാര്യത്തിൽ, ഈ രണ്ട് പ്രവിശ്യകളിലും 37% പേർ മാത്രം വിശ്വാസം രേഖപ്പെടുത്തിയപ്പോൾ ദേശീയതലത്തിൽ ഇത് 46% ആയിരുന്നു. അഭയാർത്ഥികളോടും കുടിയേറ്റക്കാരോടുമുള്ള വിശ്വാസത്തിൽ വന്ന വ്യത്യാസം, അഭയം നൽകുന്ന പ്രക്രിയയുടെ കൃത്യതയെക്കുറിച്ച് പൊതുജനത്തിന് സംശയമുണ്ടോ എന്നതിലേക്ക് വിരൽചൂണ്ടുന്നതായി ACS പ്രസിഡൻ്റ് ജാക്ക് ജെഡ്‌വാബ് നിരീക്ഷിച്ചു.

ഭവനപ്രതിസന്ധി, തൊഴിലില്ലായ്മ തുടങ്ങിയ സങ്കീർണ്ണമായ പ്രശ്നങ്ങൾക്ക് പുതുതായി എത്തുന്നവരെ മാത്രം ഒറ്റപ്പെടുത്തി കുറ്റപ്പെടുത്തുന്നത് ശരിയായ രീതിയല്ല. പ്രശ്നങ്ങൾക്ക് കാരണമാകുന്ന വിവിധ ഘടകങ്ങളെക്കുറിച്ച് സമഗ്രമായ പഠനം നടത്തേണ്ടതുണ്ട്. ഈ ആശങ്കകൾക്ക് കാരണമായതെന്താണെന്ന് തിരിച്ചറിഞ്ഞ്, നയരൂപകർത്താക്കളുമായി ചേർന്ന് ഉചിതമായ പരിഹാരങ്ങൾ കാണണമെന്നും അബുക്കർ ആവശ്യപ്പെട്ടു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Canadian trust is eroding: Public support for immigrants at lowest level in Saskatchewan and Manitoba