ഫെഡറൽ നിർമ്മാണ കരാറുകളുടെ നടത്തിപ്പിൽ തുടർച്ചയായി പ്രശ്നങ്ങൾ ഉണ്ടാകുന്നതായി റിപ്പോർട്ട്. ഇതുമായി ബന്ധപ്പെട്ട് കാനഡയുടെ ഓഫീസ് ഓഫ് ദ പ്രൊക്യുർമെൻ്റ് ഓംബുഡ് (OPO) ആണ് പുതിയ പഠന റിപ്പോർട്ട് പുറത്തിറക്കിയത്. കഴിഞ്ഞ കുറച്ചുകാലമായി ഈ കരാറുകളെക്കുറിച്ച് ധാരാളം പരാതികൾ ലഭിച്ചതിനെത്തുടർന്നാണ് OPO ഈ പഠനം നടത്തിയത്. ഈ പ്രശ്നങ്ങളുടെ കാരണം കണ്ടെത്താനും കരാറുകൾ കൂടുതൽ മെച്ചപ്പെടുത്താനുമുള്ള വഴികൾ നിർദ്ദേശിക്കാനുമാണ് പഠനം പ്രധാനമായും ലക്ഷ്യമിടുന്നത്.
കരാർ രേഖകളുടെ ഉപയോഗത്തിലെ പിഴവുകൾ, വ്യവസ്ഥകളിലെ വ്യക്തതയില്ലായ്മ, കാര്യക്ഷമമല്ലാത്ത തർക്ക പരിഹാര സംവിധാനങ്ങൾ എന്നിവയാണ് പഠനത്തിൽ കണ്ടെത്തിയ പ്രധാന പ്രശ്നങ്ങൾ. ഈ വിഷയങ്ങൾ ചെറുകിട, ഇടത്തരം സംരംഭങ്ങളെയും ബാധിക്കാൻ തുടങ്ങിയിട്ടുണ്ട്. ഇത് നിർമ്മാണ പദ്ധതികൾ വൈകുന്നതിനും ചെലവ് കൂടുന്നതിനും തർക്കങ്ങൾ ഉണ്ടാകുന്നതിനും കാരണമാകുന്നു. കനേഡിയൻ ജനതയുടെ പണത്തിന്റെ ശരിയായ ഉപയോഗത്തെയും ഫെഡറൽ നിർമ്മാണ പദ്ധതികളുടെ കാര്യക്ഷമമായ നടത്തിപ്പിനെയും ഈ പ്രശ്നങ്ങൾ ദോഷകരമായി ബാധിക്കും.
നിർമ്മാണ കരാറുകളുമായി ബന്ധപ്പെട്ട പ്രശ്നങ്ങൾ അന്വേഷിക്കാനും മധ്യസ്ഥത വഹിക്കാനും അധികാരമുള്ള ഏക ഫെഡറൽ സ്ഥാപനമാണ് OPO. തങ്ങളുടെ A D R സേവനങ്ങൾ ഉപയോഗിക്കാൻ ഫെഡറൽ വകുപ്പുകളെയും വിതരണക്കാരെയും OPO പ്രോത്സാഹിപ്പിക്കുന്നുണ്ട്. ഈ സേവനങ്ങൾ തർക്കങ്ങൾ വേഗത്തിലും കുറഞ്ഞ ചെലവിലും പരിഹരിക്കാനും നിർമ്മാണ പദ്ധതികൾ തടസ്സങ്ങളില്ലാതെ മുന്നോട്ട് കൊണ്ടുപോകാനും സഹായിക്കും.
