ബ്രിട്ടീഷ് കൊളംബിയ: ബ്രിട്ടീഷ് കൊളംബിയയിൽ ഒരേസമയം ഒന്നിലധികം സ്ത്രീകളെ വിവാഹം കഴിച്ച് വഞ്ചിച്ച മുൻ യുഎസ് സൈനികനെതിരെ പോലീസ് അന്വേഷണം ആരംഭിച്ചു. മുൻ യുഎസ് മറൈൻ ഉദ്യോഗസ്ഥനും എംഎംഎ ഫൈറ്ററുമായ ജേസൺ വാഷിംഗ്ടൺ ആണ് ഈ വമ്പൻ വിവാഹ തട്ടിപ്പിന് പിന്നിൽ. മുൻപത്തെ വിവാഹങ്ങൾ നിയമപരമായി വേർപെടുത്താതെ തന്നെ പത്ത് വർഷത്തിനിടെ നാല് സ്ത്രീകളെ ഇയാൾ വിവാഹം കഴിച്ചതായാണ് റിപ്പോർട്ടുകൾ. കാനഡയിലെ പ്രമുഖ മാധ്യമമായ W5 നടത്തിയ അന്വേഷണത്തിലൂടെയാണ് ഈ ഞെട്ടിക്കുന്ന വിവരങ്ങൾ പുറത്തുവന്നത്.
നിലവിൽ വിവാഹിതനായിരിക്കെ തന്നെ വീണ്ടും വിവാഹ ലൈസൻസ് നേടാൻ ജേസണ് സാധിച്ചത് കാനഡയിലെ വിവാഹ രജിസ്ട്രേഷൻ സംവിധാനത്തിലെ വലിയ പാളിച്ചയായാണ് ചൂണ്ടിക്കാണിക്കപ്പെടുന്നത്. തന്നെ വിവാഹം കഴിക്കുന്ന സമയത്ത് ജേസണ് മറ്റ് മൂന്ന് ഭാര്യമാർ കൂടി ഉണ്ടായിരുന്നുവെന്ന് താൻ അറിഞ്ഞില്ലെന്നും വലിയൊരു ചതിയാണ് നടന്നതെന്നും ഇരയായ ഒരു സ്ത്രീ വെളിപ്പെടുത്തി. വഞ്ചിക്കപ്പെട്ട സ്ത്രീകളുടെ പരാതിയെത്തുടർന്ന് ഡെൽറ്റ പോലീസ് കേസ് രജിസ്റ്റർ ചെയ്ത് അന്വേഷണം ഊർജിതമാക്കിയിട്ടുണ്ട്. ബ്രിട്ടീഷ് കൊളംബിയയിൽ കഴിഞ്ഞ പത്ത് വർഷത്തിനിടയിലെ ആദ്യത്തെ ബിഗാമി കേസായിരിക്കും ഇതെന്ന് അധികൃതർ സൂചിപ്പിച്ചു.
കുറ്റവാളികൾക്ക് ഇത്തരം തട്ടിപ്പുകൾ നടത്താൻ അവസരമൊരുക്കുന്ന നിലവിലെ രീതി മാറണമെന്ന് വനിതാ സംരക്ഷണ സംഘടനകൾ ശക്തമായി ആവശ്യപ്പെട്ടു. വിവാഹ ലൈസൻസ് നൽകുന്നതിന് മുൻപ് അപേക്ഷകരുടെ പശ്ചാത്തലം കൃത്യമായി പരിശോധിക്കണമെന്നും സർക്കാർ സംവിധാനങ്ങൾ ഇതിൽ ജാഗ്രത പുലർത്തണമെന്നും ആവശ്യപ്പെട്ട് ഇവർ സർക്കാരിന് കത്തയക്കാൻ ഒരുങ്ങുകയാണ്. മുൻപ് വധഭീഷണി ഉൾപ്പെടെയുള്ള ക്രിമിനൽ കേസുകളിൽ ശിക്ഷിക്കപ്പെട്ട വ്യക്തിയാണ് ജേസൺ വാഷിംഗ്ടൺ. എന്നാൽ താൻ തെറ്റൊന്നും ചെയ്തിട്ടില്ലെന്നും തന്റെ ഭാര്യമാരാണ് വിവാഹ മോചനത്തിനുള്ള പേപ്പറുകൾ ശരിയാക്കേണ്ടിയിരുന്നതെന്നുമാണ് ഇയാൾ വാദിക്കുന്നത്.
നിയമപരമായി ആദ്യത്തെ വിവാഹം നിലനിൽക്കുമ്പോൾ ചെയ്യുന്ന തുടർന്നുള്ള വിവാഹങ്ങൾ അസാധുവാണെന്ന് നിയമവിദഗ്ധർ വ്യക്തമാക്കുന്നു. ഇത്തരം സാഹചര്യങ്ങളിൽ സ്ത്രീകൾക്ക് സ്വത്തവകാശം ഉൾപ്പെടെയുള്ള കാര്യങ്ങളിൽ വലിയ നിയമക്കുരുക്കുകൾ നേരിടേണ്ടി വരും. തന്റെ വിവാഹം അസാധുവാക്കാൻ ശ്രമിക്കുന്ന ഒരു സ്ത്രീക്ക്, ഭർത്താവ് മുൻപ് വിവാഹമോചനം നേടിയിട്ടില്ലെന്ന് തെളിയിക്കാൻ ഓരോ പ്രവിശ്യയിലും കയറിയിറങ്ങേണ്ടി വരുന്ന ദുരവസ്ഥയും ഈ റിപ്പോർട്ട് പുറത്തുകൊണ്ടുവരുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Police investigate man who is married to multiple women
