കാനഡയിലും അമേരിക്കയിലും വിറ്റഴിച്ച കുട്ടികളുടെ പ്ലേ കിച്ചൻ തിരിച്ചുവിളിച്ചു. ഒറിഗോണിൽ 23 മാസം പ്രായമുള്ള ഒരു കുട്ടി ഈ പ്ലേ കിച്ചന്റെ ഒരു മെറ്റൽ ഹുക്കിൽ കുടുങ്ങി ശ്വാസം മുട്ടി മരണപ്പെട്ടതിനെത്തുടർന്നാണ് ഉത്പന്നം തിരിച്ചുവിളിച്ചത്. KidKraft Farm to Table Model Play Kitchen എന്ന 53411മോഡൽ നമ്പർ ഉള്ള ഉൽപ്പന്നമാണ് തിരിച്ചുവിളിക്കുന്നത്. കാനഡയിൽ ഈ ഉൽപ്പന്നവുമായി ബന്ധപ്പെട്ട് അപകടമൊന്നും റിപ്പോർട്ട് ചെയ്തിട്ടില്ലെന്ന് ഹെൽത്ത് കാനഡ അറിയിച്ചു.
“അമേരിക്കയിൽ, ഉത്പന്നത്തിന്റെ പുറകുവശത്തുള്ള ദ്വാരത്തിലൂടെ കുട്ടി കയറുകയും ഇറങ്ങുകയും ചെയ്യുമ്പോൾ കുട്ടിയുടെ വസ്ത്രം ഉത്പ്പന്നത്തിന്റെ ഒരു മെറ്റൽ ഹുക്കിൽ കുടുങ്ങി, ശ്വാസം മുട്ടി മരിച്ചതായി അടുത്തിടെ ഒരു റിപ്പോർട്ട് കമ്പനിക്ക് ലഭിച്ചു,” ഹെൽത്ത് കാനഡയുടെ വെബ്സൈറ്റിലെ തിരിച്ചുവിളിക്കൽ അറിയിപ്പിൽ ഇങ്ങനെയാണ് പറയുന്നത്.
ഹെൽത്ത് കാനഡയുടെ കണക്കനുസരിച്ച്, യു.എസിൽ ഏകദേശം 192,000 യൂണിറ്റുകളും കാനഡയിൽ ഏകദേശം 5,800 യൂണിറ്റുകളും വിറ്റഴിച്ചിട്ടുണ്ട്. തിരിച്ചുവിളിച്ച ഉത്പന്നം 2018 മുതൽ 2023 വരെ KidKraft, Inc. ഇറക്കുമതി ചെയ്യുകയും 2024 മെയ് വരെ കമ്പനി ഉൽപ്പന്നങ്ങൾ വിതരണം ചെയ്യുകയും വിൽക്കുകയും ചെയ്തു.
കമ്പനി റിപ്പോർട്ട് ചെയ്തതനുസരിച്ച്, Backyard Kids കാനഡയിൽ 12 യൂണിറ്റുകൾ മാത്രമാണ് വിറ്റഴിച്ചത്, KidKraft, Inc. ഏകദേശം 5,770 യൂണിറ്റുകൾ വിറ്റഴിച്ചു. തിരിച്ചുവിളിച്ച യൂണിറ്റുകളുടെ ഉപയോഗം ഉടനടി നിർത്തണമെന്ന് ഹെൽത്ത് കാനഡ പറയുന്നു.
Children’s play kitchen recalled in Canada
