സാസ്കച്ചെവാനിലെ ആശുപത്രികളിലെ പ്രസവ വാർഡുകളിൽ രോഗികളുടെ സുരക്ഷ ഉറപ്പുവരുത്താൻ ആവശ്യമായ സൗകര്യങ്ങളില്ലെന്ന് നഴ്സുമാർ. മതിയായ ജീവനക്കാരില്ലാത്തതും, ആവശ്യത്തിന് കിടക്കകളില്ലാത്തതും, കാലഹരണപ്പെട്ട ഉപകരണങ്ങളും ഗുരുതരമായ പ്രശ്നങ്ങളുണ്ടാക്കുന്നുവെന്ന് സാസ്കച്ചെവാൻ യൂണിയൻ ഓഫ് നഴ്സസ് (SUN) ചൂണ്ടിക്കാട്ടി. ജിം പാറ്റിസൺ ചിൽഡ്രൻസ് ഹോസ്പിറ്റലിലെയും റെജീന ജനറൽ ഹോസ്പിറ്റലിലെയും അവസ്ഥകൾ വിശദീകരിച്ച് നഴ്സുമാർ അയച്ച കത്തുകൾ സാസ്കച്ചെവാൻ യൂണിയൻ ഓഫ് നഴ്സസ് സോഷ്യൽ മീഡിയയിൽ പങ്കുവെച്ചു. രോഗികളുടെ എണ്ണത്തിനനുസരിച്ച് നഴ്സുമാരുടെ എണ്ണം ഇല്ലാത്തത് സുരക്ഷാ പ്രശ്നങ്ങൾക്ക് കാരണമാകുന്നു. ഗർഭിണികളായ രോഗികളിൽ ഉയർന്ന രക്തസമ്മർദ്ദം, പ്രമേഹം, സിഫിലിസ് തുടങ്ങിയ രോഗങ്ങൾ കൂടി കാണുന്നതിനാൽ അവരുടെ പരിചരണം കൂടുതൽ സങ്കീർണ്ണമാകുന്നു എന്നും യൂണിയൻ പ്രസിഡന്റ് ബ്രൈസ് ബോയ്ന്റൺ വ്യക്തമാക്കി.
റെജീന ജനറൽ ഹോസ്പിറ്റലിലെ പ്രസവ വാർഡിലും സമാനമായ പ്രശ്നങ്ങളുണ്ടെന്ന് നഴ്സുമാർ പറയുന്നു. രോഗികൾക്ക് അടിസ്ഥാന പരിചരണം പോലും ലഭിക്കുന്നില്ല. മണിക്കൂറുകളോളം കാത്തിരിപ്പ് മുറികളിൽ കഴിയേണ്ടിവരുന്നു. കിടക്കകളില്ലാത്തതിനാൽ ട്രിയേജ് ബെഡുകളിൽ പ്രസവം നടക്കേണ്ട അവസ്ഥയുമുണ്ട്. കാലഹരണപ്പെട്ട ഉപകരണങ്ങളും വലിയ പ്രശ്നങ്ങളുണ്ടാക്കുന്നു. രോഗികളിൽ ഉപയോഗിക്കുമ്പോൾ തന്നെ ഫീറ്റൽ മോണിറ്ററുകൾ ഉൾപ്പെടെയുള്ള ഉപകരണങ്ങൾ പ്രവർത്തനരഹിതമാകുന്നുവെന്നും നഴ്സുമാർ കത്തുകളിൽ വിശദീകരിക്കുന്നു. രണ്ട് നഴ്സുമാർ ചെയ്യേണ്ട ജോലികൾ ഒരു നഴ്സ് ഒറ്റയ്ക്ക് ചെയ്യേണ്ടിവരുന്ന സാഹചര്യങ്ങളുമുണ്ട്. ജീവനക്കാരെ നിലനിർത്താനും പുതിയ ആളുകളെ നിയമിക്കാനും സർക്കാർ ശ്രദ്ധിക്കണമെന്ന് യൂണിയൻ ആവശ്യപ്പെട്ടു.
അതേസമയം, ജിം പാറ്റിസൺ ചിൽഡ്രൻസ് ഹോസ്പിറ്റലിൽ ജൂലൈ മാസത്തിൽ ഉയർന്ന ജനനനിരക്കും ജീവനക്കാരുടെ അവധിയും രോഗങ്ങളും കാരണമാണ് ജീവനക്കാരുടെ കുറവുണ്ടായതെന്ന് സാസ്കച്ചെവാൻ ഹെൽത്ത് അതോറിറ്റി (SHA) പ്രസ്താവനയിൽ അറിയിച്ചു. ഓഗസ്റ്റിൽ സ്ഥിതി സാധാരണ നിലയിലായെന്നും രോഗികളുടെ സുരക്ഷയാണ് തങ്ങളുടെ പ്രധാന മുൻഗണനയെന്നും അവർ കൂട്ടിച്ചേർത്തു. എന്നാൽ, റെജീന ജനറൽ ഹോസ്പിറ്റലിലെ ഉപകരണങ്ങളുടെ പ്രശ്നങ്ങളെക്കുറിച്ച് സാസ്കച്ചെവാൻ ഹെൽത്ത് അതോറിറ്റി പ്രതികരിച്ചില്ല. ജിം പാറ്റിസൺ ചിൽഡ്രൻസ് ഹോസ്പിറ്റലിൽ ആവശ്യമായ എല്ലാ ഉപകരണങ്ങളുമുണ്ടെന്നും അവർ വ്യക്തമാക്കി.
Saskatchewan maternity wards lack facilities and staff; patients are suffering
