മോൺട്രിയൽ: ക്യുബെക് പ്രവിശ്യയിലുടനീളമുള്ള പാരാമെഡിക്കൽ ജീവനക്കാരും ആംബുലൻസ് ടെക്നീഷ്യൻമാരും അനിശ്ചിതകാല പണിമുടക്ക് ആരംഭിക്കാൻ ഒരുങ്ങുന്നു. നാൽപ്പതോളം ആംബുലൻസ് സർവീസുകളിലായി ജോലി ചെയ്യുന്ന രണ്ടായിരത്തിലധികം ജീവനക്കാരാണ് സമരത്തിന് ആഹ്വാനം ചെയ്തിരിക്കുന്നത്. ഡിസംബർ 24 ബുധനാഴ്ച മുതലാണ് സമരം പ്രാബല്യത്തിൽ വരുന്നത്.
ഫെഡറേഷൻ ഓഫ് പ്രീഹോസ്പിറ്റലിയർ ഓഫ് ക്യുബെക്കിന് (FPQ) കീഴിലുള്ള 39 യൂണിയനുകൾ സംയുക്തമായാണ് പ്രതിഷേധം സംഘടിപ്പിക്കുന്നത്. പെൻഷൻ ആനുകൂല്യങ്ങൾ വർദ്ധിപ്പിക്കുക എന്നതാണ് സമരക്കാരുടെ പ്രധാന ആവശ്യം. നിലവിലെ തൊഴിൽ കരാർ കഴിഞ്ഞ മാർച്ചിൽ അവസാനിച്ചിട്ടും പുതിയ പരിഷ്കരണങ്ങൾ നടപ്പിലാക്കാത്തതിനെ തുടർന്നാണ് ജീവനക്കാർ സമരത്തിലേക്ക് നീങ്ങിയത്.
പണിമുടക്ക് പ്രഖ്യാപിച്ചിട്ടുണ്ടെങ്കിലും പൊതുജനങ്ങളെ ബാധിക്കുന്ന ആംബുലൻസ് സേവനങ്ങളെയും മറ്റ് അത്യാഹിത വിഭാഗങ്ങളെയും ഇതിൽ നിന്ന് ഒഴിവാക്കിയിട്ടുണ്ട്. ജീവനക്കാർ അവരുടെ ഷിഫ്റ്റുകളിൽ കൃത്യമായി ജോലിയിൽ പ്രവേശിക്കുമെന്നും അതിനാൽ രോഗികൾക്ക് ലഭിക്കേണ്ട സേവനങ്ങളിൽ കുറവുണ്ടാകില്ലെന്നും യൂണിയൻ വക്താവ് ജെറമി കോർണോ-ലാൻഡ്രി അറിയിച്ചു.
അതേസമയം, ചില ഭരണപരമായ ജോലികളിൽ നിന്ന് ജീവനക്കാർ വിട്ടുനിൽക്കും. ഇന്റേണുകൾക്ക് മേൽനോട്ടം നൽകുക, മെഡിക്കൽ ഉദ്യോഗസ്ഥരെ കൊണ്ടുപോകുക തുടങ്ങിയ അധിക ചുമതലകൾ ഇക്കാലയളവിൽ നിർവഹിക്കില്ലെന്ന് യൂണിയൻ വ്യക്തമാക്കി. പൊതുജനാരോഗ്യത്തെയും സുരക്ഷയെയും ബാധിക്കാത്ത രീതിയിലാണ് സമരമെന്ന് ഉറപ്പാക്കാൻ പ്രത്യേക കർമ്മപദ്ധതിയും തയ്യാറാക്കിയിട്ടുണ്ട്.
അവശ്യ സേവനങ്ങൾ മുടക്കമില്ലാതെ തുടരുമെന്ന യൂണിയന്റെ ഉറപ്പ് പരിഗണിച്ച് പ്രവിശ്യാ ലേബർ ട്രിബ്യൂണൽ സമരത്തിന് അനുമതി നൽകി. പണിമുടക്ക് പൊതുസുരക്ഷയ്ക്ക് ഭീഷണിയാകില്ലെന്ന് ട്രിബ്യൂണൽ വിലയിരുത്തി. കഴിഞ്ഞ ഒമ്പത് മാസമായി നിലനിൽക്കുന്ന തർക്കത്തിന് പരിഹാരം കാണാൻ സർക്കാർ അടിയന്തരമായി ഇടപെടണമെന്നാണ് ജീവനക്കാരുടെ ആവശ്യം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Pension benefit: Paramedics in Quebec to go on indefinite strike
