ഷാർലറ്റ്ടൗൺ: എം.എസ്.എക്സ് (MSX), ഡെർമോ (Dermo) എന്നീ രോഗബാധകൾ മൂലം പ്രതിസന്ധിയിലായ മുത്തുച്ചിപ്പി (Oyster) കർഷകർക്കും സംസ്കരണ തൊഴിലാളികൾക്കുമായി മൂന്ന് ദശലക്ഷം ഡോളറിന്റെ ധനസഹായം പ്രഖ്യാപിച്ച് പ്രിൻസ് എഡ്വേർഡ് ഐലൻഡ് സർക്കാർ. ‘ഓയിസ്റ്റർ ഇൻഡസ്ട്രി റിലീഫ് പ്രോഗ്രാം’ വഴി മുപ്പത് ശതമാനത്തിലധികം നഷ്ടം സംഭവിച്ചവർക്ക് കടമെടുത്ത വായ്പകളുടെ പലിശ ഇളവ് ഉൾപ്പെടെയുള്ള ആനുകൂല്യങ്ങൾ ലഭിക്കും. കൂടാതെ തൊഴിലാളികളുടെ വേതനത്തിനായി 1.46 ദശലക്ഷം ഡോളറിന്റെ പ്രത്യേക പാക്കേജും സർക്കാർ പ്രഖ്യാപിച്ചിട്ടുണ്ട്.
കർഷകരുടെ സാമ്പത്തിക ബാധ്യത കുറയ്ക്കാനും മേഖലയെ പഴയ രീതിയിലേക്ക് തിരികെ കൊണ്ടുവരാനുമാണ് ഈ പദ്ധതിയെന്ന് സർക്കാർ വാർത്താക്കുറിപ്പിൽ അറിയിച്ചു. 2024 ജൂലൈയിൽ ബെഡെക് ബേയിലാണ് ആദ്യമായി എം.എസ്.എക്സ് രോഗബാധ കണ്ടെത്തിയത്. തുടർന്ന് 2025-ൽ ഡെർമോ ബാധയും സ്ഥിരീകരിച്ചു. ഈ രോഗങ്ങൾ മനുഷ്യർക്ക് ഭീഷണിയല്ലെങ്കിലും മുത്തുച്ചിപ്പികളുടെ വളർച്ചയെയും ആയുസ്സിനെയും ഇത് സാരമായി ബാധിക്കുന്നുണ്ട്.
നിലവിൽ പ്രിൻസ് എഡ്വേർഡ് ഐലൻഡിന് പുറമെ നോവ സ്കോഷ്യ, ന്യൂ ബ്രൺസ്വിക്ക് തുടങ്ങിയ പ്രവിശ്യകളിലും ഈ രോഗബാധ റിപ്പോർട്ട് ചെയ്തിട്ടുണ്ട്. ഏകദേശം 27 ദശലക്ഷം ഡോളർ വരുമാനം നൽകുന്ന ഈ വ്യവസായ മേഖലയെ സംരക്ഷിക്കാൻ ഇതുവരെ 12 ദശലക്ഷത്തിലധികം ഡോളറാണ് സർക്കാർ ചെലവഴിച്ചത്. മുത്തുച്ചിപ്പി വളർത്തലിലും വിപണനത്തിലുമായി മേഖലയിൽ പ്രവർത്തിക്കുന്ന നൂറുകണക്കിന് ആളുകൾക്ക് പുതിയ പാക്കേജ് വലിയ ആശ്വാസമാകുമെന്നാണ് കരുതപ്പെടുന്നത്.
P.E.I. offering $3 million to oyster fishers impacted by MSX, Dermo
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
