ഒട്ടാവ: കാനഡയിലെ പ്രധാന അന്താരാഷ്ട്ര വിമാനത്താവളങ്ങളിലെ പരിശോധനാ കിയോസ്കുകളെ നിശ്ചലമാക്കിയ കമ്പ്യൂട്ടർ സിസ്റ്റം തകരാർ പൂർണ്ണമായും പരിഹരിച്ചതായി കാനഡ ബോർഡർ സർവീസസ് ഏജൻസി (CBSA) അറിയിച്ചു. എന്നാൽ, യാത്രാനടപടികൾ സാധാരണ നിലയിലാകാൻ സമയമെടുക്കുമെന്നതിനാൽ വിമാനത്താവളങ്ങളിൽ ഇപ്പോഴും ചെറിയ രീതിയിലുള്ള കാലതാമസം നേരിടാൻ സാധ്യതയുണ്ടെന്ന് അധികൃതർ യാത്രക്കാർക്ക് മുന്നറിയിപ്പ് നൽകി. തിങ്കളാഴ്ച പുലർച്ചെ ഒട്ടേറെ യാത്രക്കാരെ ബുദ്ധിമുട്ടിച്ചുകൊണ്ടാണ് കാനഡയിലെ പ്രമുഖ വിമാനത്താവളങ്ങളിലെ യാത്രാ-വാണിജ്യ പരിശോധനാ സിസ്റ്റങ്ങളെ ബാധിച്ച തകരാർ ആരംഭിച്ചത്.
ടൊറന്റോ പിയേഴ്സൺ, വാൻകൂവർ, മോൺട്രിയൽ-ട്രൂഡോ, കാൽഗറി, എഡ്മന്റൺ, വിന്നിപെഗ്, ബില്ലി ബിഷപ്പ്, ഒട്ടാവ, ക്യൂബെക് സിറ്റി, ഹാലിഫാക്സ്, ഹാമിൽട്ടൺ എന്നീ 11 അന്താരാഷ്ട്ര വിമാനത്താവളങ്ങളിലെ പ്രവർത്തനങ്ങളെയാണ് ഈ സാങ്കേതിക തകരാർ പ്രധാനമായും ബാധിച്ചത്.
കിയോസ്കുകൾ പ്രവർത്തനരഹിതമായതിനെ തുടർന്ന് യാത്രക്കാരെ സിബിഎസ്എ (CBSA) ഉദ്യോഗസ്ഥർ നേരിട്ട് പരിശോധിക്കുന്ന മാനുവൽ ലൈനുകളിലേക്ക് തിരിച്ചുവിട്ടിരുന്നു. ഇത് വിമാനത്താവളങ്ങളിൽ വലിയ ക്യൂ രൂപപ്പെടുന്നതിനും കടുത്ത കാലതാമസത്തിനും കാരണമായി. യാത്രാ സംവിധാനങ്ങൾ വൈകീട്ടോടെ പുനഃസ്ഥാപിച്ചെങ്കിലും, അതിർത്തി വഴിയുള്ള ചരക്കുനീക്കത്തെ ബാധിച്ച വാണിജ്യ സിസ്റ്റങ്ങളിലെ തകരാർ പൂർണ്ണമായി പരിഹരിക്കാൻ വൈകി. ചരക്കുനീക്കം തടസ്സമില്ലാതെ നടത്തുന്നതിനായി താൽക്കാലികമായി ഇതര മാർഗ്ഗങ്ങൾ ഉപയോഗിച്ചാണ് അധികൃതർ പ്രതിസന്ധി മറികടന്നത്. സാങ്കേതിക തകരാറിന്റെ കൃത്യമായ കാരണം കണ്ടെത്താൻ അന്വേഷണം നടക്കുകയാണ്. എങ്കിലും, പ്രാഥമിക വിവരങ്ങൾ പ്രകാരം ഇതൊരു സൈബർ ആക്രമണം ആകാനുള്ള സാധ്യതയൊന്നും കാണുന്നില്ലെന്ന് CBSA വക്താവ് ലൂക്ക് റെയ്മർ പറഞ്ഞു.
ചരക്കുകൾ വേഗത്തിൽ വിട്ടുകിട്ടുന്നതിനും ബിസിനസ്സ് പങ്കാളികളുടെ ബുദ്ധിമുട്ടുകൾ കുറയ്ക്കുന്നതിനുമായി ഏജൻസി ജീവനക്കാർ ഇരുപത്തിനാല് മണിക്കൂറും കർമ്മനിരതരാണെന്ന് അധികൃതർ അറിയിച്ചു. കാനഡയിലേക്ക് യാത്ര തിരിക്കുന്നവർ നിലവിലെ സാഹചര്യം കണക്കിലെടുത്ത് നേരത്തെ വിമാനത്താവളങ്ങളിൽ എത്തുന്നത് നന്നായിരിക്കുമെന്നും സിബിഎസ്എ ഓർമ്മിപ്പിച്ചു.
Outage impacting inspection kiosks at some of Canada’s busiest airports resolved
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
