ഒട്ടാവ: ഒട്ടാവയിൽ കുറച്ചുദിവസമായി തുടരുന്ന ചൂടുള്ള കാലാവസ്ഥയ്ക്ക് പിന്നാലെ വരുംദിവസങ്ങളിൽ കടുത്ത തണുപ്പും മഴയും അനുഭവപ്പെടുമെന്ന് എൻവയോൺമെന്റ് കാനഡ അറിയിച്ചു. ഏപ്രിൽ 19 ഞായറാഴ്ച ഒട്ടാവയിൽ പരമാവധി താപനില 6 ഡിഗ്രി സെൽഷ്യസും കുറഞ്ഞ താപനില -2 ഡിഗ്രി സെൽഷ്യസും രേഖപ്പെടുത്തി. ഞായറാഴ്ച വൈകുന്നേരത്തോടെ 60 ശതമാനം മഴയ്ക്കും തുടർന്ന് മഞ്ഞുവീഴ്ചയ്ക്കും സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം വ്യക്തമാക്കി.
തിങ്കളാഴ്ചയും ചൊവ്വാഴ്ചയും സമാനമായ കാലാവസ്ഥ തുടരുമെന്നാണ് പ്രവചനം. തിങ്കളാഴ്ച ആകാശം മേഘാവൃതമായിരിക്കുമെന്നും പരമാവധി താപനില 3 ഡിഗ്രി സെൽഷ്യസായിരിക്കുമെന്നും അധികൃതർ അറിയിച്ചു. ചൊവ്വാഴ്ച താപനില 5 ഡിഗ്രി സെൽഷ്യസായി ഉയരുമെങ്കിലും 60 ശതമാനം മഴയ്ക്കോ മഞ്ഞുവീഴ്ചയ്ക്കോ സാധ്യതയുണ്ട്. വരുംദിവസങ്ങളിലും തണുപ്പ് തുടരുമെന്നാണ് കാലാവസ്ഥാ വകുപ്പിന്റെ വിലയിരുത്തൽ.
അതേസമയം, കിഴക്കൻ ഒന്റാറിയോയുടെയും ക്യൂബെക്കിന്റെയും വിവിധ ഭാഗങ്ങളിൽ പ്രളയ മുന്നറിയിപ്പ് നൽകിയിട്ടുണ്ട്. പെംബ്രോക്ക് (Pembroke), ആൺപ്രിയർ (Arnprior) മേഖലകൾക്കിടയിൽ പ്രളയ മുന്നറിയിപ്പും ആൺപ്രിയർ മുതൽ ഹോക്സ്ബറി (Hawkesbury) വരെയുള്ള ലോവർ ഒട്ടാവ നദീതീരങ്ങളിൽ പ്രളയ ജാഗ്രതാ നിർദ്ദേശവുമാണ് പുറപ്പെടുവിച്ചിരിക്കുന്നത്. ഗാറ്റിനോയിലെ തെരുവുകളിൽ നിലവിൽ വെള്ളപ്പൊക്കം റിപ്പോർട്ട് ചെയ്തിട്ടുണ്ട്. മുൻകരുതൽ നടപടികളുടെ ഭാഗമായി ഒട്ടാവ, ഗാറ്റിനോ നഗരസഭകൾ മണൽചാക്കുകൾ വിതരണം ചെയ്യുന്നുണ്ടെന്നും അധികൃതർ അറിയിച്ചു.
Cold Weather Warning in Ottawa: Rain & Snow Expected
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
