സഡ്ബറി: വടക്കൻ ഒന്റാറിയോ മേഖലകളിൽ ഒപ്പിയോയിഡ് മയക്കുമരുന്നിന്റെ അമിത ഉപയോഗം മൂലമുള്ള മരണങ്ങൾ വർധിക്കുന്നതായി ഔദ്യോഗിക കണക്കുകൾ. ശരാശരിയേക്കാൾ വളരെ ഉയർന്ന നിരക്കിലാണ് ഇവിടെ മരണങ്ങൾ റിപ്പോർട്ട് ചെയ്യുന്നത്. ഒന്റാറിയോ കോറോണേഴ്സ് ഓഫീസ് പുറത്തുവിട്ട ഏറ്റവും പുതിയ വിവരങ്ങളിലാണ് ഈ ആശങ്കാജനകമായ സാഹചര്യമുള്ളത്. പ്രതിസന്ധി നേരിടുന്നതിനായി ‘പബ്ലിക് ഹെൽത്ത് സുഡ്ബറി ആൻഡ് ഡിസ്ട്രിക്റ്റ്സ്’ പുതിയ ജനകീയ ആരോഗ്യ പ്രതിരോധ പദ്ധതി പ്രഖ്യാപിച്ചു. മയക്കുമരുന്നിന് അടിമപ്പെട്ടവർക്ക് ചികിത്സ ഉറപ്പാക്കുക, പുനരധിവാസ കേന്ദ്രങ്ങളുടെ പ്രവർത്തനം വിപുലീകരിക്കുക എന്നിവയാണ് പുതിയ പദ്ധതിയുടെ ലക്ഷ്യം.
ഒന്റാറിയോയിലെ വിവിധ നഗരങ്ങളിൽ ഒപ്പിയോയിഡ് മരണനിരക്ക് ക്രമാതീതമായി ഉയരുകയാണ്. റിപ്പോർട്ടുകൾ പ്രകാരം തണ്ടർ ബേ നഗരത്തിലാണ് ഏറ്റവും ഉയർന്ന മരണനിരക്കുള്ളത്; ഇവിടെ പ്രതിമാസം ഒരു ലക്ഷം പേരിൽ 53 പേർ വീതം മരണപ്പെടുന്നു. നോർത്ത് ബേയിൽ 31-ഉം, ഗ്രേറ്റർ സുഡ്ബറിയിൽ 28-ഉം, സൂ സെന്റ് മേരിയിൽ 23-ഉം ആണ് മരണനിരക്ക്. ഒന്റാറിയോ പ്രവിശ്യയിലെ പൊതുവായ ശരാശരി മരണനിരക്ക് ഒൻപത് ആണെന്നിരിക്കെയാണ് വടക്കൻ മേഖലയിലെ ഈ ഉയർന്ന കണക്കുകൾ.
കഴിഞ്ഞ ഏപ്രിൽ മാസത്തിൽ മാത്രം സുഡ്ബറിയിൽ എട്ടുപേരും നോർത്ത് ബേയിൽ നാലുപേരും മയക്കുമരുന്നിന്റെ അമിത ഉപയോഗം (ഓവർഡോസ്) കാരണം മരണപ്പെട്ടിരുന്നു. ഏപ്രിൽ ആദ്യം പുറപ്പെടുവിച്ച ഡ്രഗ് അലർട്ട് ഈ മേഖലകളിൽ ഇപ്പോഴും തുടരുകയാണ്.
വടക്കൻ ഒന്റാറിയോയിൽ ഒപ്പിയോയിഡ് മരണങ്ങൾ വർധിക്കാൻ വ്യക്തമായ കാരണങ്ങളുണ്ടെന്ന് നോസ്ം (NOSM) സർവകലാശാലയിലെ ഗവേഷണ വിഭാഗം വൈസ് പ്രസിഡന്റും ലഹരിവിമുക്ത വിദഗ്ധനുമായ ഡോ. ഡേവിഡ് മാർഷ് വ്യക്തമാക്കുന്നു. മുൻകാലങ്ങളിൽ ഈ മേഖലയിലെ ഡോക്ടർമാർ രോഗികൾക്ക് മറ്റ് പ്രവിശ്യകളെ അപേക്ഷിച്ച് കൂടുതൽ ഒപ്പിയോയിഡ് മരുന്നുകൾ കുറിച്ചു നൽകിയിരുന്നു.
കൂടാതെ, ഇവിടുത്തെ നിർമാണ-ഖനന മേഖലകളിലെ തൊഴിലാളികൾക്ക് ജോലി സംബന്ധമായ പരിക്കുകളും വിട്ടുമാറാത്ത വേദനകളും ഉണ്ടാകാനുള്ള സാധ്യത കൂടുതലാണ്. ഇതാണ് പലരെയും വേദനസംഹാരികളായ ഒപ്പിയോയിഡുകളിലേക്ക് നയിച്ചത്. വടക്കൻ ഒന്റാറിയോയുടെ ഭൂമിശാസ്ത്രപരമായ പ്രത്യേകതകൾ കാരണം വിദൂര പ്രദേശങ്ങളിൽ ചികിത്സാ സൗകര്യങ്ങൾ കൃത്യമായി എത്തിക്കാൻ സാധിക്കാത്തതും പ്രതിസന്ധി രൂക്ഷമാക്കുന്നു.
നിലവിലെ സാഹചര്യം മറികടക്കാൻ പബ്ലിക് ഹെൽത്ത് സുഡ്ബറി മൂന്ന് പ്രധാന കാര്യങ്ങളൂന്നിയുള്ള തന്ത്രമാണ് ആവിഷ്കരിച്ചിരിക്കുന്നത്:
ലഹരി ഉപയോഗം തടയൽ: ശക്തമായ സാമൂഹിക പിന്തുണ ഉറപ്പാക്കി ജനങ്ങൾ ലഹരിയിലേക്ക് തിരിയുന്നത് തടയുക.
ആശ്വാസം ഉറപ്പാക്കൽ: നിലവിൽ ലഹരിക്ക് അടിമപ്പെട്ടവർക്ക് പാർപ്പിടവും മറ്റ് അടിസ്ഥാന സൗകര്യങ്ങളും നൽകി ജീവിതം സുരക്ഷിതമാക്കുക.
ചികിത്സാ സൗകര്യങ്ങൾ മെച്ചപ്പെടുത്തൽ: ലഹരിവിമുക്ത ചികിത്സകൾ കൂടുതൽ എളുപ്പത്തിൽ ലഭ്യമാക്കുക.
സേവനങ്ങൾ ലഭ്യമാക്കുന്നതിലെ അപാകതകൾ പരിഹരിക്കുകയാണ് പ്രധാന ലക്ഷ്യമെന്ന് സുഡ്ബറി ഡിസ്ട്രിക്റ്റ് മെഡിക്കൽ ഓഫീസർ ഡോ. മുസ്തഫ ഹിർജി പറഞ്ഞു. ജയിലിൽ നിന്ന് മോചിതരാകുന്നവർക്കും ആശുപത്രി വാസത്തിന് ശേഷമുള്ളവർക്കും കൃത്യമായ തുടർചികിത്സ ലഭിക്കുന്നില്ല. 18 വയസ്സ് തികയുമ്പോൾ കുട്ടികളുടെ വിഭാഗത്തിൽ നിന്നുള്ള ചികിത്സ പെട്ടെന്ന് നിലയ്ക്കുകയും മുതിർന്നവരുടെ ചികിത്സാ വിഭാഗത്തിലേക്ക് കൃത്യമായ മാറ്റം ഉണ്ടാകാതിരിക്കുകയും ചെയ്യുന്നത് വലിയ പോരായ്മയാണ്. ഇതിനൊപ്പം ലഹരിവിമുക്ത കിടക്കകളുടെ കുറവ് പരിഹരിക്കാൻ പ്രവിശ്യാ സർക്കാരിന്റെ സാമ്പത്തിക സഹായം ആവശ്യപ്പെട്ടിട്ടുണ്ട്. 2024-ൽ ഫണ്ട് ലഭ്യതക്കുറവ് മൂലം അടച്ചുപൂട്ടിയ സുഡ്ബറിയിലെ സൂപ്പർവൈസ്ഡ് കൺസപ്ഷൻ സെന്റർ പുനരാരംഭിക്കണമെന്ന ആവശ്യവും ശക്തമാണ്.
ലഹരി പ്രതിസന്ധി കണക്കിലെടുത്ത് അടിയന്തരാവസ്ഥ പ്രഖ്യാപിക്കണമെന്ന് സുഡ്ബറിയിലെ സാമൂഹിക പ്രവർത്തകർ ആവശ്യപ്പെടുന്നുണ്ടെങ്കിലും ഒന്റാറിയോ ആരോഗ്യ മന്ത്രാലയം വ്യത്യസ്തമായ സമീപനമാണ് സ്വീകരിക്കുന്നത്. മുൻപുണ്ടായിരുന്ന മയക്കുമരുന്ന് കുത്തിവെപ്പ് കേന്ദ്രങ്ങൾക്ക് (ഡ്രഗ് ഇഞ്ചക്ഷൻ സൈറ്റുകൾ) പകരം ‘ഹോംലെസ് ആൻഡ് അഡിക്ഷൻസ് റിക്കവറി ട്രീറ്റ്മെന്റ്’ (HART) ഹബുകൾ സ്ഥാപിക്കാനാണ് സർക്കാരിന്റെ തീരുമാനം. ഇതിനായി പ്രവിശ്യയിലുടനീളം 29 ഹബുകൾ നിർമിക്കാൻ 560 മില്യൺ ഡോളർ നിക്ഷേപിക്കുന്നതായി ഒന്റാറിയോ ആരോഗ്യ മന്ത്രിയുടെ വക്താവ് എമ പോപോവിച്ച് അറിയിച്ചു. പുതിയ നയത്തിന്റെ ഫലപ്രാപ്തി എല്ലാ വർഷവും പബ്ലിക് റിപ്പോർട്ട് കാർഡിലൂടെ വിലയിരുത്തുമെന്നും വരും വർഷങ്ങളിൽ മരണനിരക്ക് ഗണ്യമായി കുറയ്ക്കാനാകുമെന്നാണ് പ്രതീക്ഷയെന്നും ആരോഗ്യവിഭാഗം വ്യക്തമാക്കുന്നു.
Opioid deaths rock Canada; crisis deepens in Ontario
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
