ടൊറന്റോ: ഒന്റാറിയോയിലെ ആശുപത്രികൾ ഗുരുതരമായ സാമ്പത്തിക പ്രതിസന്ധിയിലേക്ക് നീങ്ങുകയാണെന്ന് ഒന്റാറിയോ ഹോസ്പിറ്റൽ അസോസിയേഷൻ (OHA) മുന്നറിയിപ്പ് നൽകി. 2026-ലെ പ്രവിശ്യാ ബജറ്റ് അവതരിപ്പിക്കാനിരിക്കെ, ആശുപത്രികൾ ഏകദേശം ഒരു ബില്യൺ ഡോളറിന്റെ പ്രവർത്തന കമ്മി നേരിടുന്നുണ്ടെന്ന് അസോസിയേഷൻ വ്യക്തമാക്കി. ജനസംഖ്യയിലെ വർദ്ധനവും പ്രായമായവരുടെ എണ്ണക്കൂടുതലും കാരണം ആരോഗ്യമേഖലയിലെ ചിലവുകൾ പ്രതിവർഷം ആറ് ശതമാനം വീതം വർദ്ധിക്കുന്നുണ്ട്. എന്നാൽ സർക്കാർ നൽകുന്ന നാല് ശതമാനം ഫണ്ട് വർദ്ധനവ് ഈ ആവശ്യങ്ങൾ നിറവേറ്റാൻ പര്യാപ്തമല്ലെന്നാണ് ആശുപത്രികളുടെ വിലയിരുത്തൽ.
ആശുപത്രികളിലെ തിരക്ക് കുറയ്ക്കുന്നതിനായി കൂടുതൽ കിടക്കകൾ അനുവദിച്ച സർക്കാർ നടപടിയെ ഒ.എച്ച്.എ അധ്യക്ഷൻ ആന്തണി ഡെയ്ൽ സ്വാഗതം ചെയ്തു. എന്നാൽ കൃത്യമായ സാമ്പത്തിക സഹായമില്ലാതെ അടുത്ത മൂന്ന് വർഷത്തിനുള്ളിൽ ബജറ്റ് സന്തുലിതമാക്കണമെന്ന സർക്കാരിന്റെ കർശന നിർദ്ദേശം നിലവിലെ പുരോഗതിയെ ബാധിക്കുമെന്ന് അദ്ദേഹം അറിയിച്ചു. ദൈനംദിന പ്രവർത്തനങ്ങൾക്കായി ആശുപത്രികൾ തങ്ങളുടെ സാമ്പത്തിക കരുതൽ ശേഖരത്തെ ആശ്രയിക്കേണ്ടി വരുന്നത് പ്രതിസന്ധി വർദ്ധിപ്പിക്കുന്നതായും അദ്ദേഹം ചൂണ്ടിക്കാട്ടി. ഇത് രോഗീ പരിചരണത്തെ ബാധിക്കുമെന്ന ആശങ്കയും ഉയരുന്നുണ്ട്.
ആശുപത്രികളുടെ വിമർശനങ്ങളെ പ്രീമിയർ ഡഗ് ഫോർഡ് പ്രതിരോധിച്ചു. കഴിഞ്ഞ ഏഴ് വർഷത്തിനിടെ ആരോഗ്യമേഖലയിലെ ചിലവുകൾ 27 ബില്യൺ ഡോളർ വർദ്ധിപ്പിച്ചതായും ആശുപത്രികളുടെ വികസനത്തിനായി 50 ബില്യൺ ഡോളർ ചിലവഴിച്ചതായും അദ്ദേഹം അവകാശപ്പെട്ടു. 2018-ൽ അധികാരമേറ്റെടുത്തതിന് ശേഷം സർക്കാർ നടപ്പിലാക്കിയത് അത്ഭുതകരമായ മാറ്റങ്ങളാണെന്ന് അദ്ദേഹം വിശേഷിപ്പിച്ചു. വരും ദിവസങ്ങളിൽ സർക്കാർ നടപ്പിലാക്കിയ ആരോഗ്യ പദ്ധതികളെക്കുറിച്ച് വലിയ തോതിൽ പരസ്യപ്രചാരണം നടത്തുമെന്നും ഫോർഡ് സൂചിപ്പിച്ചു.
ആരോഗ്യ പ്രവർത്തകരുടെ കുറവ് പരിഹരിക്കാൻ സർക്കാർ കൂടുതൽ നിക്ഷേപം നടത്തണമെന്ന് ഒന്റാറിയോ മെഡിക്കൽ അസോസിയേഷൻ (OMA) ആവശ്യപ്പെട്ടു. ആവശ്യത്തിന് നേഴ്സുമാരും ഡോക്ടർമാരും ഇല്ലാതെ പുതിയ ബെഡുകൾ അനുവദിക്കുന്നത് പ്രായോഗികമല്ലെന്ന് ഒ.എം.എ അധ്യക്ഷ ഡോ. സൈനബ് അബ്ദുറഹ്മാൻ വ്യക്തമാക്കി. കൂടാതെ, ആശുപത്രികളിലെ ‘ഹാൾവേ ഹെൽത്ത് കെയർ’ അഥവാ ഇടനാഴികളിലെ ചികിത്സ സംബന്ധിച്ച കണക്കുകൾ ശേഖരിക്കുന്നത് അവസാനിപ്പിക്കാനുള്ള സർക്കാരിന്റെ നീക്കത്തിൽ അവർ അതൃപ്തി രേഖപ്പെടുത്തി. സുതാര്യത നിലനിർത്തേണ്ടത് അത്യാവശ്യമാണെന്നും അവർ കൂട്ടിച്ചേർത്തു.
ഭവനധിഷ്ഠിത പരിചരണത്തിന് മുൻഗണന നൽകുന്നത് ആശുപത്രികളിലെ തിരക്ക് കുറയ്ക്കാൻ സഹായിക്കുമെന്ന് ഹോം കെയർ ഒന്റാറിയോ സി.ഇ.ഒ കാമറൂൺ മക്കേ അഭിപ്രായപ്പെട്ടു. എന്നാൽ ഈ രംഗത്ത് പ്രവർത്തിക്കുന്നവർക്ക് മത്സരക്ഷമമായ വേതനം ഉറപ്പാക്കാൻ സർക്കാരിന് സാധിക്കണമെന്ന് അദ്ദേഹം ആവശ്യപ്പെട്ടു. പ്രവിശ്യയുടെ സ്വതന്ത്ര സാമ്പത്തിക വിഭാഗത്തിന്റെ റിപ്പോർട്ട് അനുസരിച്ച് വരും വർഷങ്ങളിൽ ആരോഗ്യ മേഖലയിലെ ചിലവ് വർദ്ധനവ് 0.7 ശതമാനമായി കുറയാൻ സാധ്യതയുണ്ടെന്ന് വിലയിരുത്തപ്പെടുന്നു. മാർച്ച് 23-ന് സഭ പുനരാരംഭിച്ചതിന് ശേഷം പുതിയ ബജറ്റ് അവതരിപ്പിക്കാനാണ് സർക്കാർ ലക്ഷ്യമിടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Ontario’s health crisis deepens; hospital association slams government
